İrəliləmiş mərhələli qastrointestinal stromal şiş (GİST) üçün ripretinib FDA təsdiqi aldı

15 may 2020-də ABŞ Qida və Dərman İdarəsi imatinib daxil olmaqla 3 və ya daha çox kinaza inhibitoru ilə əvvəllər müalicə almış, irəliləmiş mərhələli qastrointestinal stromal şişi (GİST) olan yetkin xəstələr üçün ripretinib (Qinlock, Deciphera Pharmaceuticals, LLC.) adlı tablet şəklində dərmanı təsdiqlədi.

Qastrointestinal stromal şiş (GİST) nədir, müalicəsi necədir?

Qastrointestinal stromal şişlər (GİST) nadir şişlərdən olsa da, qlobal illik tezliyi milyonda 10-15 hal olmaqla ən geniş yayılmış mezenximal xərçənglərdəndir. GİST Cajalın interstisial hüceyrələrindən, əsasən qastrointestinal (Gİ) yoldan qaynaqlanır, əksəriyyəti mədədə olur (% 60).

Aşağıda qastrointestinal stromal şişlərin bədəndə hansı orqanlarda hansı tezlikdə görüldüyü təsvir edilib.

Ripretinibə FDA təsdiqi gətirən INVICTUS araşdırması

Ripretinibin effektivliyi əvvəllər imatinib, sunitinib və regorafenib ilə müalicə edilmiş 129 GİST xəstəsini əhatə edən beynəlxalq, çoxmərkəzli, randomizə edilmiş (2:1), ikiqat kor, plasebo nəzarətli INVICTUS araşdırmasında qiymətləndirilib.

Xəstələr xəstəlik irəliləyənədək və ya qəbuledilməz toksiklik yarananadək gündə bir dəfə ağızdan 150 mg ripretinib 150 mg və ya plasebo alıblar. Plaseboya ayrılmış xəstələrdə xəstəlik irəlilədikdə digər müalicəyə keçməyə icazə verilib.

Əsas effektivlik nəticə meyarı, proqressiyasız (irəliləməsiz) sağqalım (PFS) olaraq müəyyən edilib. Əlavə effektivlik nəticə meyarlarına ümumi cavab göstəricisi və ümumi sağqalım daxildir.

Nəticələr

• Araşdırma ripretinib qolundakı xəstələrdə plasebo qoluna nisbətən PFS-də statistik əhəmiyyətli yaxşılaşma göstərdi (HR 0.15;% 95 CI: 0.09, 0.25; p <0.0001).
• Median PFS ripretinib üçün 6,3 ay (% 95 CI: 4,6, 6,9), plasebo üçün isə 1,0 ay (% 95 CI: 0,9, 1,7) idi.
• Obyektiv cavab göstəricisi ripretinib qolunda % 9 (% 95 CI: 4.2, 18), plasebo qolunda isə % 0 (% 95 CI: 0, 8) idi, lakin bu fərq statistik əhəmiyyətli deyildi.
• Ripretinib qolunda median ümumi sağqalım 15,1 ay (% 95 CI: 0,21, 0,62), plasebo qolunda isə 6,6 ay (% 95 CI: 4,1, 11,6) idi.

Ripretinibin təsir mexanizmi nədir?

Protein kinazalar hüceyrə funksiyalarında mühüm rol oynayır və onların nizamsızlığı kanserogenezə səbəb ola bilər. Ripretinib təbii tip və mutant trombosit mənşəli böyümə faktoru reseptoru A (PDGFRA) və qastrointestinal stromal şişlərin (GIST) əksəriyyətinə səbəb olan KIT daxil olmaqla protein kinazaları inhibə edir. In vitro ripretinibin PDGFRB, BRAF, VEGF və TIE2 genlərini inhibə etdiyi göstərilib.

Ripretinib KIT geninin 9, 11, 13, 14, 17 və 18 ekzonlarının, həmçinin PDGFRA geninin 12, 14 və 18-ci ekzonlarının mutasiyaları ilə əlaqəli reseptorlara bağlanır. Protein kinazanın “açar cibi” normalda aktivləşmə dövrəsinə bağlıdır və kinazanın “açıb-bağlama açarı” kimi işləyir. Ripretinib həm kinazanın açar cibinə, həm aktivləşmə dövrəsinə bağlanan bənzərsiz ikili mexanizmə malikdir; beləliklə kinazanı və onun nizamsız hüceyrə böyüməsi yaratma qabiliyyətini söndürür.

Ripretinib ilə ən geniş yayılmış (≥% 20) yan təsirlər alopesiya, yorğunluq, ürəkbulanma, qarın ağrısı, qəbizlik, mialgiya, ishal, iştahanın azalması, palmar-plantar eritrodizesteziya və qusmadır. Ripretinibin digər mühüm risklərinə yeni birincili dəri bədxassəli xəstəlikləri, hipertoniya və ürək disfunksiyası daxildir.

Tövsiyə olunan ripretinib dozası, qida ilə və ya qidasız gündə bir dəfə ağızdan 150 mg-dır.