İrəliləmiş və ya metastatik xolangiokarsinoma müalicəsində ivosidenib FDA təsdiqi aldı

25 avqust 2021-ci ildə FDA (ABŞ Qida və Dərman İdarəsi) izositrat dehidrogenaza-1 (IDH1) mutasiyası müsbət, əvvəllər müalicə almış, yerli irəliləmiş və ya metastatik xolangiokarsinoması(öd yolu xərçəngi) olan yetkin xəstələr üçün ivosidenib (Tibsovo) adlı tablet şəklində qəbul edilən ağıllı xərçəng dərmanını təsdiqlədi. Ivosidenib xolangiokarsinomalı xəstələr üçün təsdiqlənən 3-cü ağıllı dərman olmaqla yanaşı, IDH1 mutasiyalı xolangiokarsinoma xəstələri üçün təsdiqlənən ilk ağıllı dərmandır. 

Eyni zamanda FDA ivosidenib müalicəsi üçün xolangiokarsinomalı xəstələrin seçilməsinə kömək edəcək genetik test cihazı Oncomine Dx Hədəf Testini (Life Technologies Corporation) də təsdiqlədi.

QEYD: IDH1/2 genetik dəyişiklikləri qaraciyərdaxili xolangiokarsinomalı xəstələrin təxminən %20-də yaranır.

Tibsovo əvvəllər 2018-ci ildə IDH1 mutasiyası olan residivli, refrakter kəskin mieloid leykemiyada (AML), 2019-cu ildə isə kimyaterapiya üçün uyğun olmayan IDH1 mutasiyalı AML xəstələrinin birinci sıra müalicəsində monoterapiya kimi təsdiqlənmişdi.

Xolangiokarsinomalı xəstələr üçün FDA təsdiqi alan əvvəlki 2 ağıllı dərman bunlardır: Daha əvvəl pemigatinib, 17 aprel 2020-ci ildə fibroblast böyümə faktoru reseptoru-2 (FGFR2) mutasiyası müsbət xolangiokarsinomada FDA təsdiqi alan ilk dərman olmuşdu. 28 may 2021-ci ildə təsdiq alan infigratinib isə FGFR2 mutasiyası müsbət xolangiokarsinomada FDA təsdiqi alan 2-ci dərman oldu.

Xolangiokarsinomaların müalicəsi yeni yaranan dəqiq dərman strategiyaları ilə sürətlə dəyişir. Tədqiqatlar qaraciyərdaxili xolangiokarsinomalı (qaraciyərdaxili öd yolu xərçəngli) xəstələrin təxminən % 40-da FGFR2 birləşmələri və IDH1 mutasiyaları aşkaredir.

Ivosidenibə xolangiokarsinomada FDA təsdiqi gətirən tədqiqatlar

Ivosidenib IDH1 mutasiyalı yerli irəliləmiş və ya metastatik xolangiokarsinoması olan 185 yetkin xəstədə randomizə edilmiş (2:1), çoxmərkəzli, ikiqat kor, plasebo nəzarətli klinik tədqiqat olan Study AG120-C-005çərçivəsində araşdırılmışdır. Xəstənin xəstəliyi ən azı bir gemsitabin və ya 5-florourasil tərkibli rejim daxil olmaqla, ən azı bir, lakin ikidən çox olmayan əvvəlki rejimdən sonra irəliləmiş olmalıdır. Xəstələr xəstəliyin proqressiyasına və ya qəbuledilməz toksikliyə qədər gündə bir dəfə ağızdan 500 mg ivosidenib və ya uyğunlaşdırılmış plasebo almağa təsadüfi təyin edilmişdir.

Tədqiqatda ölçülməsi nəzərdə tutulan birincili effektivlik sonlanım nöqtəsi müstəqil qiymətləndirmə komitəsinin RECIST 1.1 üzrə müəyyən etdiyi proqressiyasız sağqalım (PFS) idi.

Nəticələr

• Ivosidenib alan xəstələrdə PFS üzrə statistik əhəmiyyətli yaxşılaşma görüldü (HR 0.37; %95 GA: 0.25, 0.54; p<0.0001). Yəni xəstələrin ivosidenib alması xərçəngdə proqressiya riskini %63 azaltdı.
• Ümumi sağqalım təhlili isə statistik əhəmiyyətli deyildi (0.79; %95 GA: 0.56, 1.12; p=0.093). Başlanğıcda plasebo alan xəstələrin %70-i radioloji xəstəlik proqressiyasından sonra ivosidenib almağa keçmişdir. Ümumi sağqalımda əhəmiyyətli fərq yaranmamasının səbəbi bu ola bilər.

Xolangiokarsinomalı xəstələrdə ən geniş yayılmış (≥%15) yan təsirlər yorğunluq, ürəkbulanma, qarın ağrısı, ishal, öskürək, iştahanın azalması, assit (qarında maye), qusma, anemiya və səpkidir.

Xolangiokarsinoma üçün tövsiyə edilən ivosidenib dozası, xəstəliyin proqressiyasına və ya qəbuledilməz toksikliyə qədər yeməklə və ya yeməksiz gündə bir dəfə 500 mg-dır.