Qaraciyər xərçəngində immunoterapiyalar tirozin kinaza inhibitorlarından daha təhlükəsizdir

Yeni tədqiqata görə irəliləmiş mərhələli hepatosellülar karsinomada (qaraciyər xərçəngi) neoadyuvant (əsas müalicədən əvvəl kiçildici) müalicə kimi immunoterapiyalar, qaraciyər xərçənginin standart müalicəsi olan tirozin kinaza inhibitorlarından "daha uyğun" ola bilər.

JAMA Network Open jurnalında dərc olunmuş meta-analizə görə irəliləmiş hepatosellülar karsinomalı (HCC) xəstələrdə neoadyuvant müalicə kimi immun nəzarət nöqtəsi inhibitorları sinfindən immunoterapiyalar "ağıllı xərçəng dərmanı" kimi tanınan tirozin kinaza inhibitorlarından (TKİ-lər) daha təhlükəsiz ola bilər.

Tədqiqatçılar immunoterapiyalarda TKİ-lərlə müqayisədə daha aşağı nisbətdə "ciddi yan təsirlər" aşkar etdilər. Bununla belə, qaraciyər toksikliyi göstəriciləri 2 müalicə növündə oxşar idi.

Tədqiqatçılar bu meta-analizi xüsusən neoadyuvant müalicə üçün klinik sınaqların hazırlanmasına diqqət yetirərək, irəliləmiş qaraciyər xərçəngi müalicələrinin yan təsir profillərinə dair mövcud sübutları qiymətləndirmək məqsədilə apardılar.

Analizə 30 təkqruplu, plasebo nəzarətli və iki agentli faza 2 və 3 klinik sınağından əldə edilmiş məlumatlar daxil idi. Sınaqlar irəliləmiş qaraciyər xərçəngi olan 12921 xəstəni əhatə edirdi.

Tədqiqatçılar TKİ alan xəstələrin 46%-sında, immunoterapiya alan xəstələrin 24%-ündə və immunoterapiya ilə TKI kombinasiyası alan xəstələrin 36%-sında ciddi yan təsirlər yarandığını aşkar etdilər.

TKİ alan xəstələrin 21%-ində və immunoterapiya alan xəstələrin 28%-ində qaraciyərə aid yan təsirlər müşahidə edildi.

Tədqiqatçılar həmçinin qaraciyər xərçəngində ən çox seçilən TKİ olan sorafenibi digər TKI-lərlə müqayisə etdilər və qruplar arasında oxşar qaraciyər yan təsiri riski aşkar etdilər (risk nisbəti [RR], 1,06; 95% GA, 0,92-1,24).

Tədqiqatçılar immunoterapiyaları sorafeniblə müqayisə etdikdə qaraciyər və digər yan təsirlər üzrə oxşar risk aşkar etdilər.

Nəticə etibarilə bu tədqiqatda immunoterapiyalar irəliləmiş qaraciyər xərçəngi olan xəstələrdə TKI-lərdən daha əlverişli yan təsir profilinə malik idi və buna görə neoadyuvant müalicə kimi daha uyğun dərmanlar ola bilər.

*

Xarici məzmunu görmək üçün seçimləri tənzimləyin