Şəkər əvəzinə şirinləşdirici istifadə etmək arıqlamağa kömək edirmi?

Çox maraq doğuran daha bir sual cavabını tapdı! Kanada Tibb Assosiasiyasının jurnalında dərc edilmiş araşdırmaya görə şəkər əvəzinə şirinləşdirici istifadə etmək arıqlamağa kömək etmir; düşünüldüyünün əksinə həm çəki artımına, həm də müxtəlif sağlamlıq problemlərinə səbəb ola bilər.

Aspartam, stevioside və sukraloza kimi təbii və ya süni şirinləşdiricilərin istehlakı olduqca geniş yayılmışdır və artır. Qida dəyəri olmayan bu şirinləşdiricilərin, dəqiq olmasa da, metabolizmə zərər verdiyi, bağırsaq florasına və iştahaya təsir etdiyi düşünülür.

Tədqiqatda müntəzəm və uzunmüddətli şirinləşdirici istehlakının sağlamlığa necə təsir etdiyinə dair təxminən 400.000 şəxsi əhatə edən 37 müxtəlif araşdırmanın nəticələri analiz edilmişdir. Bu araşdırmalar ümumilikdə 10 ildən çox davam etmişdir.

Araşdırmalar nəticəsində şəkər əvəzinə istifadə olunan şirinləşdiricilərin arıqlamağa kömək etmədiyi, hətta çəki, piylənmə, yüksək təzyiq, diabet, ürək xəstəlikləri və digər sağlamlıq problemlərinə səbəb ola bildiyi müəyyən edilmişdir. Bəs buna necə səbəb olur?

Qidalarda (xüsusilə içkilərdə) sıfır şəkər olduğu halda şirinləşdirici istifadəsinin arıqlamağa kömək etməməsinin səbəbi şirinləşdiricilərin yemək asılılığını tətikləməsi ola bilər. Yəni dad duyğumuz və buna görə daha çox yemək istəyi bu məhsullarla dəstəklənir.

Nəticə olaraq milyonlarla insanın şəkər çəki artırır deyə seçdiyi şirinləşdiricilərin düşünüldüyünün əksinə çəkiyə nəzarətdə kömək etmədiyi və sağlamlıq problemlərinə səbəb ola bildiyi ortaya çıxmışdır. Şirin ehtiyacı meyvələrlə qarşılana bilər, həmçinin arıqlamaq üçün əsas prinsipin az istehlak etmək və hərəkətli həyat tərzini mənimsəmək olduğu unudulmamalıdır.