Velosiped və müntəzəm idman immun sistemini yeniləyir

Fiziki fəallıq bütün dünyada azalır. Gündəlik həyata fəallıq qatmaq üçün velosiped sürmək və ya gəzmək xüsusi tövsiyə edilir. Bəs fəal həyat niyə bu qədər vacibdir? Müntəzəm velosiped sürməklə və ya gəzməklə necə bir addım öndə olarıq?

Aprel 2017 tarixində BMJjurnalında nəşr edilmiş və 263 min iştirakçının araşdırıldığı əhali əsaslı gələcəyə yönəlmiş (prospektiv) tədqiqatda fəal həyatın xüsusilə qadınlar üçün daha aşağı ürək-damar (kardiovaskulyar) xəstəliyi riski ilə əlaqəli olduğu bildirildi. Fəaliyyətlərin ömür və xərçəng əlaqəsinə təsirləri də nəzərdən qaçırıla bilməyəcək qədər vacibdir. İngiltərədəki bu genişmiqyaslı araşdırmanın nəticələri müxtəlif fəaliyyətlərlə ürək-damar xəstəliyi, xərçəng və bütün səbəblərdən ölüm arasındakı əlaqəni araşdırmaq üçün istifadə edildi. Bu fəaliyyətlərdən velosiped və gəzinti önə çıxdı. Sonda müntəzəm velosiped sürməyin bütün səbəblərdən ölüm riskini % 40-dan çox, xərçəng və ürək xəstəlikləri riskini % 45 azaltdığı tapıldı.

İdmanla yaşlanmanın bizi daha kövrək və zəif etməsinin qarşısını ala bilərik

Velosiped sürməyin yaşlanma təsirlərini yavaşlada və immun sistemini yeniləyə biləcəyi irəli sürülür. 55-79 yaşındakı 125 həvəskar velosipedçini müntəzəm idman etməyən sağlam yetkinlərlə müqayisə etdilər. Aging Cell jurnalında nəşr edilmiş iki məqalədə ümumiləşdirilən nəticələrə görə velosipedçilərin bədən yağı və xolesterol səviyyələrini, əzələ kütləsi və dözümlülüyünü yaşın təsirinə qarşı qoruduğu göstərildi. Kişilərdə görülən fərq testosteron səviyyələrinin yüksəlməsi oldu. Təəccüblü tərəfi isə velosipedin yaşlanmaya qarşı təsirlərinin immun sisteminə qədər uzanmağa başlamasıdır.

T-hüceyrələri adlanan immun hüceyrələrinin yaranmasında iştirak edən timus orqanı normalda 20 yaşdan etibarən kiçilməyə başlayır. Lakin yaşlı velosipedçilərin timuslarının ən azı gənclərinki qədər çox T hüceyrəsi istehsal etdiyi ortaya çıxdı.

• İdman bir çox pəhriz və dərmandan daha çox ömrü uzadır

Eramızdan əvvəl 400-cü illərdə yaşamış və tibbin atası sayılan Hippokrat belə idmanın insanın ən yaxşı dərmanı olduğunu bildirmişdir, lakin bu bilik zamanla itdi və getdikcə daha oturaq, hərəkətsiz olduq.

Müntəzəm velosiped sürən və bunu icma / qrupla edənlərin başqa nəqliyyatdan istifadə edənlərlə müqayisədə fiziki sağlamlıqla yanaşı ruhi sağlamlığının da daha güclü, daha xoşbəxt və depressiyaya az meylli olduğunu dəstəkləyən çoxsaylı tədqiqat vardır.

• İdman etməyə İSTƏKLİ OLMAQ ən azı idman etmək qədər vacibdir