Yoqa xərçəng xəstələrinə necə fayda verir?

Yoqa Hindistan mənşəli, tarixi çox qədimlərə gedən, həm bədəni, həm zehni rahatlatmağa əsaslanan təcrübədir. İndiki həyatın gətirdiyi yüklər və çətinliklər üzündən insanlar rahatlıq axtarmağa başlayıblar. Buna görə yoqa bütün dünyada getdikcə yayılıb. Xərçəng diaqnozu almaq və müxtəlif dərəcələrdə bu xəstəliklə mübarizə aparmaq gündəlik həyat çətinliklərimizdən çox kənarda insanı hər cəhətdən çətinliyə salır. Bu ağır prosesdə insanın həyatına bir boşalma texnikasını yerləşdirmiş olması həyat keyfiyyətində əhəmiyyətli fərq yaradacaq. Xərçəng xəstələrində yoqanın qiymətləndirildiyi elmi tədqiqatlarda yoqanın həm xəstəliyin yaratdığı psixoloji stresi azaltdığı, həm emosional, həm fiziki yaxşılıq verdiyi göstərilib.

Yoqanın psixoloji vəziyyətə müsbət təsirləri

Xərçəng diaqnozundan sonra tez-tez təşviş problemi və depressiya əlamətləri ola bilər. Yuxu problemləri, mənfi düşüncələrə qapılmaq, ruh düşkünlüyü və yorğunluq hissi, diqqəti cəmləyə bilməmək bunlara nümunədir. Yoqanın bu əlamətlərin də daxil olduğu psixoloji problemləri azaltdığı sübut olunub. Yoqa ilə iç-içə olan meditasiya və dərin nəfəs məşqləri, zehni təmizləyərək həmin anın, həyatın və alınan hər nəfəsin gözəlliyinə yönəlməyə imkan verir. Yoqa insanın özünə yardım mexanizmini və həyata qarşı fərqindəliyini təmin edərək xəstələrin stresli hallarla mübarizəsini asanlaşdırır. Xüsusilə ilk diaqnozda təsirlənən mənəvi duyğuların və daxili dincliyin yenidən qazanılmasını təmin edir. Adətən həmfikirlərlə birlikdə edilən yoqa ortaq cəhətlərin və birgə yanaşmaların görüşməsi, bir araya gəlmə və yoldaşlıq hissi yaradır. Beləcə xəstəliyin gətirdiyi cəmiyyətdən təcrid və yadlaşma hissi aşılır. Xəstəlik zamanı qazanılan bu bədən və zehin boşalmasının idarəsi müalicə bitəndə də müsbət nəticələr verir. Xəstəlikdən sonrakı yoxlamalar arasındakı müddətin rahat keçməsini, müayinələrin nəticələrini daha sakit gözləməyi və xəstəliyin təkrarlanması narahatlığının azalmasını təmin edir.

Xərçəng və müalicəsinin yan təsirləri ilə mübarizədə YOQAnın GÜCÜ

Xərçəngdə həm xəstəliyin özündən, həm müalicələrdən (kimyaterapiya, radioterapiya, cərrahi müalicələr) qaynaqlanan ağrı, ürəkbulanma, iştahasızlıq, halsızlıq kimi problemlər ola bilər. Xəstəyə uyğunlaşdırılmış yoqadakı müxtəlif dartınma hərəkətləri ağrını və bədən sərtliyini azalda bilər. Qarın nahiyəsinə yönəlmiş yoqa duruşlarının kimyaterapiyaya bağlı ürəkbulanma, qusma və iştaha itkisinə yaxşı gəldiyi göstərilib. Bir əlamətin yaxşılaşması domino təsiri ilə digərlərini də yaxşılaşdırır. Məsələn, ağrının azalması yuxu problemlərinin yaxşılaşmasına gətirər. Süd vəzi xərçəngi diaqnozlu 61 qadın xəstədə aparılan tədqiqatda həftədə 2 dəfə yoqaya qatılan xəstələrlə eyni sayda yoqa etməyən xəstələrin nəticələri müqayisə edildi. Yoqaya qatılan qadınların daha enerjili, daha az yuxulu, fiziki funksiyalarının daha yaxşı və ümumi həyat keyfiyyətinin daha yüksək olduğu göstərildi.

Xəstəlik proseslərinə YOQAnın daxil edilməsi

Xəstələrə həkim, onkologiya tibb bacısı və ya tibbi komandanın digər üzvlərinin bədən və zehin üçün faydalı üsulun əhəmiyyətini vurğulaması çox vacibdir. Yoqanın çox yaxşı seçim olduğu deyilməlidir. Yoqanın xərçəng komandalarının yanaşmalarına daxil edilməsi təşviq edilməlidir. Bəzi özəl mərkəzlər bu yanaşmanı təqdim etsə də, həm özəl, həm dövlət müəssisələrində səhiyyə xidmətinin hissəsi olması üçün məlumatlı xəstələrin tələbi də vasitə ola bilər. Yoqanın faydalarını bilən xəstələr uyğunluq barədə həkimlərinin fikrini almalıdırlar. Yoqa üçün xəstənin fiziki uyğunluğu da qiymətləndirilməlidir. Çətinlik dərəcəsi fərqli çoxlu yoqa texnikası vardır. Xəstənin fiziki uyğunluğu və meylinə görə yanaşma seçilə bilər. Nəfəs texnikaları və bəzi sadə məşqlər hər yerdə edilə bilər.

Nəticə

Nəticə olaraq əvvəlki yazılarımızda da dediyimiz kimi, yoqa bir çox xərçəng xəstəsinin həyat keyfiyyətinə çox müsbət təsir edən və təsiri elmi tədqiqatlarla sübut olunmuş yanaşmadır. Bu yazıda həyata gözəllik qata biləcək təklifi xatırlatmaq istədik. Hər nəfəsi dincliklə doldura bilən fərqindəliklə qalmağınız ümidi ilə, əmin-amanlıq və sevgi ilə…