Yumşaq toxuma sarkomasının müalicəsində əməliyyatdan əvvəl şişi kiçildən yeni nanohissəcik dərmanı: NBTXR3

NBTXR3 kod adlı, nanohissəcik quruluşlu eksperimental dərmanın və ardınca radioterapiya tətbiqinin ətrafların (qol-ayaq) və gövdə divarının yumşaq toxuma sarkoması olan xəstələrdə təsirli və təhlükəsiz tapıldığı, ESMO 2018-də təqdim edilən bir faza 2-3 klinik tədqiqat ilə göstərildi.

Radioterapiya ilə aktivləşdirilən NBTXR3 hafnium oksid nanohissəcikləri ilə müalicə alan, diaqnoz zamanı əməliyyat edilə bilməyən ətrafların və gövdə divarının lokal irəliləmiş yumşaq toxuma sarkoması olan xəstələrin şişləri tək radioterapiya ilə müalicə edilən xəstələrinkindən əhəmiyyətli dərəcədə daha çox kiçildi.

Bu beynəlxalq, çoxmərkəzli, randomizə və açıq etiketli faza 2-3 klinik tədqiqat Parisdəki Curie İnstitutunun Sarkoma Cərrahiyyəsi rəhbəri Sylvie Bonvalot tərəfindən təqdim edildi.

Tədqiqatın təfərrüatları

NBTXR3-301 tədqiqatına 180 xəstə daxil edildi və 176 xəstənin nəticələri effektivlik təhlillərinə uyğun tapıldı. Xəstələr neoadjuvant (əməliyyatdan əvvəl kiçildici) müalicə üçün təsadüfi qaydada iki qola ayrıldı; bir qola şişdaxili (şişin içinə) tək doza NBTXR3 inyeksiyası və ardınca radioterapiya tətbiq olundu, digər qola isə yalnız radioterapiya tətbiq edildi.

Hər iki müalicə qolunun şişləri daha sonra əməliyyatla çıxarıldı və xəstələr yumşaq toxuma sarkomasının histoloji alt növünə görə təbəqələndirildi. Fərqli radioterapiya cihazları istifadə edilsə də, tətbiq olunan radioterapiya dozası 25 fraksiyada 2Gy və ümumilikdə 50 Gy idi.

Araşdırmanın ölçmək istədiyi birincili (əsas) sonlanma nöqtəsi, patoloji tam cavab nisbəti idi. Patoloji tam cavab kiçildici müalicədən sonra %5-dən az canlı xərçəng hüceyrəsinin qalması kimi müəyyənləşdirilir. İkincili sonlanma nöqtələrinə neqativ cərrahi sərhədlər (R0 rezeksiya) və nanohissəcik dərmanının təhlükəsizliyi daxil idi.

Tək radioterapiya ilə müqayisədə «NBTXR3 + radioterapiya» tətbiqi patoloji tam cavab nisbətini iki dəfə artırdı

• Əməliyyatdan əvvəl NBTXR3 + radioterapiya ilə müalicə edilənlərdə patoloji tam cavab nisbəti tək radioterapiya alanlarla müqayisədə iki dəfə çox idi: % 16.1-ə qarşı % 7.9.

Yuxarıdakı şəkil: sağ budun iç nahiyəsində yumşaq toxuma sarkoması olan xəstəyə NBTXR3 nanohissəcik tətbiqinin 3-ölçülü tomoqrafiyası.

• Nanohissəcik tətbiq olunan qrupda təmiz cərrahi sərhədlərlə əməliyyatın (R0 rezeksiya) baş tutma nisbəti % 77.0 olduğu halda, % 64.0 idi.
• Xəstələrin % 13.5-ində inyeksiya yeri ağrısı var idi və NBTXR3 % 7.9 xəstədə ciddi (3. və 4. dərəcə) kəskin immun reaksiyası (allergiya) ilə əlaqəli idi. Bu yan təsirlərin qısamüddətli, idarəolunan olduğu və bəzi hallarda öz-özünə keçdiyi bildirildi.
• İnyeksiya yeri reaksiyalarından başqa NBTXR3 + radioterapiya çox yaxşı dözüldü və tək radioterapiya ilə oxşar təhlükəsizlik profili göstərdi.

Nəticə olaraq, nanohissəcik dərmanı olan NBTXR3-ün şiş daxilinə təhlükəsiz inyeksiya edilə bildiyi və radioterapiya ilə aktivləşə bildiyi tapıldı. Üstəlik, radioterapiyanın effektivliyini artıran xərçəng müalicəsi kimi şişdə tək radioterapiyadan daha yüksək enerji yığılması təmin edir və şiş hüceyrələrinin ölümünün artmasına səbəb olur.

NBTXR3 mövcud müalicələrlə arzu edilən cavabları əldə etmə nisbətinin aşağı və müalicə seçimlərinin məhdud olduğu yumşaq toxuma sarkomalı xəstələrə, nanotexnologiya kimi qabaqcıl texnika ilə yeni və ümidverici seçim təklif edir.

NBTXR3-ün erkən klinik tədqiqatlarının ümid verməsi ilə əlaqədar bu nanohissəcik hazırda residiv / metastatik baş-boyun xərçəngi, metastatik kiçik hüceyrəli olmayan ağciyər xərçəngi, prostat xərçəngi, qaraciyər xərçəngi və düz bağırsaq xərçəngində, yəni radioterapiyanın istifadə edildiyi bir çox xərçəngdə sınaqdan keçirilməyə başlanmışdır.