არამემკვიდრეობითი ძუძუს კიბოს დროს მეორე ძუძუს მოცილების ფსიქოლოგიური და სოციალური გავლენა

ერთ სარძევე ჯირკვალში კიბოს აღმოჩენის შემდეგ მეორე ძუძუშიც კიბოს განვითარების შიშის ან მემკვიდრეობითი კიბოს მატარებლობის გამო მეორე, ჯანმრთელი სარძევე ჯირკვლის ქირურგიულად მოცილებას პროფილაქტიკური კონტრალატერალური მასტექტომია ეწოდება. კლინიკური ონკოლოგიის ჟურნალშიგამოქვეყნდა კვლევა ქალების შესახებ, რომლებსაც ძუძუს მემკვიდრეობითი კიბო არ ჰქონდათ, თუმცა ორივე სარძევე ჯირკვლის მოცილება აირჩიეს. კვლევამ შეისწავლა მათი შიში ძუძუს კიბოსა და გარეგნობასთან დაკავშირებით და მათი ცხოვრების ხარისხი. კვლევის ბოლოს აღმოჩნდა, რომ მეორე ძუძუს მოცილების ამრჩევ ქალებს კიბოსა და სხეულის აღქმის მიმართ უფრო ძლიერი შიში ჰქონდათ. გარდა ამისა, ასეთი ოპერაციის შემდეგ სხეულის აღქმასთან დაკავშირებული სტრესი უფრო მაღალი, ცხოვრების ხარისხი კი უფრო დაბალი იყო.

დაკავშირებული თემა:

• კიბოს მქონე პაციენტის ცხოვრების ხარისხი

კვლევის დეტალები

კვლევა ჰიუსტონში, MD Anderson-ის კიბოს ცენტრში, საშუალოდ 56 წლის ასაკის 288 ქალთან ჩატარდა. ძუძუს კიბოს მქონე ამ პაციენტებიდან 50-მა პროფილაქტიკური კონტრალატერალური მასტექტომია (ჯანმრთელი ძუძუს მოცილება) აირჩია. გამოკითხვები ოპერაციამდე და ასევე 1., 6., 12. და 18. თვეებში ჩატარდა. ძირითადი ფსიქოსოციალური მაჩვენებლები იყო კიბოსთან დაკავშირებული შფოთვა და კიბოსთვის სპეციფიკური სტრესი.

ფსიქოსოციალური მაჩვენებლები ოპერაციამდე და შემდეგ

• აღმოჩნდა, რომ პროფილაქტიკური კონტრალატერალური მასტექტომიის (PKM) მიმღებ ქალებს ძუძუს კიბოს ოპერაციამდე და შემდეგ უფრო მაღალი კიბოსთან დაკავშირებული სტრესი, კიბოს შიში და სხეულის აღქმასთან დაკავშირებული შიში ჰქონდათ.
• PKM ოპერაციის შემდეგ გარეგნობაზე უფრო ძლიერ შფოთვასა და ცხოვრების უარეს ხარისხთან იყო დაკავშირებული.
• ამასთან, PKM-ის ამრჩევ პაციენტებში კიბოსთან დაკავშირებული შფოთვა ყველაზე მაღალი ოპერაციამდე იყო. ამ ჯგუფში შფოთვა დროთა განმავლობაში მცირდებოდა და ხანგრძლივ პერიოდში იმ პაციენტებისას ემსგავსებოდა, რომლებმაც PKM არ აირჩიეს.
• ორივე ჯგუფში ოპერაციამდე ცხოვრების ხარისხი მსგავსი იყო, თუმცა ოპერაციის შემდგომი 1. თვიდან პაციენტებში, რომლებმაც ჯანმრთელი ძუძუს მოცილებაც აირჩიეს, ის უფრო დაბალი იყო და დაბალ დონეზე დარჩა. 

დაკავშირებული თემა:

• დეპრესია და შფოთვა კიბოს მქონე პაციენტში — მიზეზები, სიმპტომები და მკურნალობა

მკვლევართა დასკვნა ამ საკითხზე ასეთია: „ამ პროსპექტული (წინმიმართული) კვლევის შედეგები კლინიკური პრაქტიკისთვის მნიშვნელოვანია და ქალებსა და ექიმებს შორის პროფილაქტიკური კონტრალატერალური მასტექტომიის შესახებ საუბრისას უკეთ ინფორმირებისთვის უნდა გამოიყენებოდეს. ძუძუს კიბოს მქონე ქალებმა ქირურგიული გადაწყვეტილების დროს განცდილი შიშისა და შფოთვის გამო შეიძლება ვერ გაითვალისწინონ PKM-ის ფსიქოლოგიური და სოციალური გავლენა. კლინიკურ შედეგებთან ერთად ისეთი ფსიქოსოციალური შედეგების განხილვა, როგორიცაა კიბოს შიში, ცხოვრების ხარისხი და სხეულის გარეგნობის ცვლილებების გამო წუხილი, ქალებს PKM-ის ფსიქოსოციალური გავლენის სრულად გათვალისწინებაში დაეხმარება. კიბოს გადაჭარბებული შიშის მქონე ქალებისთვის უშუალოდ კიბოსთან დაკავშირებულ შფოთვაზე მიმართული ფსიქოლოგიური მხარდაჭერით შესაძლებელია სხეულის გარეგნობაზე წუხილის მართვა.“

დასკვნა

დადგინდა, რომ ქალებს, რომლებმაც კონტრალატერალური პროფილაქტიკური მასტექტომია აირჩიეს, ოპერაციამდე კიბოსა და გარეგნობასთან დაკავშირებული უფრო ძლიერი შიში ჰქონდათ. ასევე აღმოჩნდა, რომ ოპერაციის შემდეგაც მათ გარეგნობაზე მეტად აწუხებდათ და ცხოვრების ხარისხი უფრო დაბალი ჰქონდათ. ამ მიმართულებით გაწეული ფსიქოლოგიური მხარდაჭერით ამ შფოთვისა და შიშის მართვა შესაძლებელია.

• ვინ უნდა ჩაიტაროს მემკვიდრეობითი ძუძუს კიბოს გენეტიკური ტესტი?
• სიახლეები ძუძუს კიბოს მკურნალობაში - 2017 და 2018
• საკუთარი ქსოვილით ძუძუს აღდგენის მიმღები ქალები უფრო ბედნიერები არიან