პროსტატის კიბოში პირველად PARP ინჰიბიტორმა FDA-ს დამტკიცება მიიღო: რუკაპარიბი

15 მაისს აშშ-ის სურსათისა და წამლის ადმინისტრაციამ (FDA) მანამდე ანდროგენის რეცეპტორის მიზნობრივი თერაპიით და ტაქსანზე დაფუძნებული ქიმიოთერაპიით ნამკურნალებ, ჩანასახოვანი და/ან სომატური BRCA მუტაციის მქონე, მეტასტაზური და კასტრაციისადმი რეზისტენტული პროსტატის კიბოს პაციენტებისთვის PARP ინჰიბიტორის კლასის პრეპარატ რუკაპარიბს(Rubraca) დაჩქარებული დამტკიცება მისცა.

TRITON2 კვლევა

რუკაპარიბის ეფექტიანობა შეისწავლეს მანამდე ანდროგენის რეცეპტორის მიზნობრივი თერაპიითა და ტაქსანზე დაფუძნებული ქიმიოთერაპიით ნამკურნალები, BRCA-მუტირებული (ჩანასახოვანი და / ან სომატური) მეტასტაზური კასტრაციისადმი რეზისტენტული პროსტატის კიბოს მქონე 115 პაციენტის მომცველ მრავალცენტრულ, ერთჯგუფიან კლინიკურ კვლევაში TRITON2. პაციენტები რუკაპარიბს დღეში ორჯერ, პერორალურად 600 mg დოზით იღებდნენ. ყველა პაციენტს თანმხლებად გონადოტროპინის გამომათავისუფლებელი ჰორმონის ანალოგი ეძლეოდა ან მანამდე ორმხრივი ორქიექტომია (ოპერაციით სათესლე ჯირკვლების ფუნქციონირების შეჩერება) ჰქონდა ჩატარებული.

კვლევის შედეგები

• გაზომვადი დაავადების მქონე 62 პაციენტში შეაფასეს ობიექტური პასუხი და პასუხის ხანგრძლივობა.
• დადასტურებული ობიექტური პასუხის მაჩვენებელი 44% იყო (95% სარწმუნოობის ინტერვალი [CI] = 31-57%).
• პასუხის მედიანური ხანგრძლივობა ვერ შეფასდა. პასუხის ხანგრძლივობის დიაპაზონი 1.7-დან 24+ თვემდე იყო.
• ობიექტური პასუხის დადასტურების მქონე 27 პაციენტიდან 15-ში (56%) პასუხი 6 თვეზე მეტხანს გაგრძელდა.

BRCA-მუტაცია-დადებითი მეტასტაზური კასტრაციისადმი რეზისტენტული პროსტატის კიბოს მქონე 115 პაციენტში ყველაზე ხშირი (≥20) გვერდითი ეფექტები იყო დაღლილობა, გულისრევა, ანემია (სისხლნაკლებობა), ALT / AST-ის მატება, მადის დაქვეითება, გამონაყარი, ყაბზობა, თრომბოციტოპენია (შედედების უჯრედების მატებით სისხლდენის რისკის ზრდა), ღებინება და დიარეა.

რუკაპარიბის რეკომენდებული დოზაარის დღეში ორჯერ 600 mg, საკვებთან ან მის გარეშე. მეტასტაზური კასტრაციისადმი რეზისტენტული პროსტატის კიბოს გამო რუკაპარიბის მიმღებმა პაციენტებმა ასევე უნდა მიიღონ გონადოტროპინის გამომათავისუფლებელი ჰორმონის ანალოგი ან ჩატარებული უნდა ჰქონდეთ ორმხრივი ორქიექტომია.

*

-დაკავშირებული თემა: მოწინავე პროსტატის კიბოს მკურნალობა — ისტორია და მიღწეული თანამედროვე ეტაპი 

*

როგორია რუკაპარიბის მოქმედების მექანიზმი?

კიბოს უჯრედები ნორმალურ უჯრედებზე გაცილებით ხშირად და სწრაფად იყოფა, ამიტომ მათში მეტი DNA-ის დაზიანება, ანუ მუტაცია ვითარდება. DNA-ის დაზიანებისას სხვადასხვა უჯრედშიდა მექანიზმი ერთვება და ან დაზიანებას ასწორებს, ან, თუ აღდგენა შეუძლებელია, უჯრედი აპოპტოზს განიცდის. როგორც PARP, ისე BRCA, DNA-ის აღდგენაში მონაწილე მოლეკულებია. პროსტატის კიბოში PARP ინჰიბიტორ რუკაპარიბის გამოყენებისას კიბოს უჯრედი DNA-ის აღდგენის უნარს ნაწილობრივ კარგავს. თუ ამ უჯრედებში BRCA მუტაციაცაა, DNA-ის აღდგენისა და უკვდავად დარჩენის უნარი გაცილებით მეტად მცირდება.