Prostat xərçəngində ilk dəfə PARP inhibitoru FDA təsdiqi aldı: Rucaparib

15 mayda ABŞ Qida və Dərman İdarəsi (FDA) əvvəllər androgen reseptorunu hədəfləyən müalicə və taksan əsaslı kimyaterapiya almış, germinal və/və ya somatik BRCA mutasiyasına malik metastatik və kastrasiyaya davamlı prostat xərçəngi olan xəstələr üçün PARP inhibitorları sinfindən dərman olan rucaparibə (Rubraca) sürətləndirilmiş təsdiq verdi.

TRITON2 tədqiqatı

Rucaparibin effektivliyi əvvəllər androgen reseptoruna yönəlmiş müalicə və taksan əsaslı kimyaterapiya ilə müalicə edilmiş, BRCA mutasiyalı (germinal və / və ya somatik) metastatik kastrasiyaya davamlı prostat xərçəngi olan 115 xəstənin daxil edildiyi çoxmərkəzli, təkqollu klinik tədqiqat olan TRITON2-də araşdırılıb. Xəstələrə gündə iki dəfə 600 mg ağızdan rucaparib verildi. Bütün xəstələrə eyni zamanda ya qonadotropin azadedici hormon analoqu verildi, ya da əvvəllər ikitərəfli orxiektomiya (əməliyyatla xayaların fəaliyyətinin qarşısının alınması) aparılmışdı.

Tədqiqatın nəticələri

• Ölçülə bilən xəstəliyi olan 62 xəstədə obyektiv cavab nisbəti və cavab müddəti qiymətləndirildi.
• Təsdiqlənmiş obyektiv cavab nisbəti % 44 idi (% 95 etibar intervalı [CI] =% 31-57).
• Median cavab müddəti qiymətləndirilə bilmədi. Cavab müddətinin aralığı 1.7 ilə 24+ ay idi.
• Obyektiv cavabı təsdiqlənən 27 xəstənin 15-də (% 56) cavab müddəti 6 aydan çox idi.

BRCA mutasiyası müsbət metastatik kastrasiyaya davamlı prostat xərçəngi olan 115 xəstədə ən geniş yayılmış (≥ 20) yan təsirlər yorğunluq, ürəkbulanma, anemiya (qanazlığı), artmış ALT / AST, iştahanın azalması, səpgi, qəbizlik, trombositopeniya (laxtalanma hüceyrələrinin artması ilə qanaxma riskinin artması), qusma və ishaldır.

Tövsiyə edilən rucaparib dozasıgündə iki dəfə yeməklə və ya yeməksiz 600 mg-dır. Metastatik kastrasiyaya davamlı prostat xərçəngi üçün rucaparib alan xəstələr eyni zamanda qonadotropin azadedici hormon analoqu almalı və ya ikitərəfli orxiektomiya keçirmiş olmalıdır.

*

-Əlaqədar mövzu: İrəliləmiş prostat xərçənginin müalicəsi – tarixi və gəlinən son nöqtə 

*

Rucaparibin təsir mexanizmi necədir?

Xərçəng hüceyrələri normal hüceyrələrdən daha çox və sürətlə bölündüyü üçün daha çox DNA zədəsi, yəni mutasiya baş verir. DNA-da zədə yarandıqda müxtəlif hüceyrədaxili mexanizmlər işə düşür və ya zədə bərpa edilir, ya da zədə bərpa edilə bilməyəcək səviyyədədirsə, hüceyrə apoptoza gedir. Həm PARP, həm də BRCA DNA bərpasında iştirak edən molekullardır. Prostat xərçəngində PARP inhibitoru olan rucaparib istifadə edildikdə xərçəng hüceyrəsi DNA-sını təmir etmək qabiliyyətini qismən itirir. Bu hüceyrələrdə eyni zamanda BRCA mutasiyası da varsa, xərçəng hüceyrələrinin DNA-larını təmir etmək və ölməz qalmaq qabiliyyətləri daha çox azalır.