შთამბეჭდავი შედეგები olaparib-ით BRCA-მუტანტურ ადრეული სტადიის ძუძუს კიბოში

ონკოლოგიის ახალი პრეპარატების კლასის PARP ინჰიბიტორით — olaparib-ით ერთწლიანმა ადიუვანტურმა მკურნალობამ, ფაზა III OlympiA კვლევის წინასწარ განსაზღვრული შუალედური ანალიზის მიხედვით, მემკვიდრეობითი BRCA1/2 მუტაციების მქონე მაღალი რისკის, ადრეული სტადიის, HER2-უარყოფითი ძუძუს კიბოს პაციენტებში დაავადებისგან თავისუფალი გადარჩენა მნიშვნელოვნად გაახანგრძლივა. კვლევა დოქტორმა Andrew Tutt-მა 4 ივნისს დაწყებულ 2021 წლის ASCO-ს ყოველწლიურ შეხვედრაზეწარადგინა და ის ერთდროულად NEJM-ის ჟურნალში გამოქვეყნდა.

OlympiA კვლევის ძირითადი შედეგები

• 24-თვიანი დაკვირვებით, ადიუვანტური (ოპერაციის შემდგომი დამცავი) olaparib-ით ნამკურნალებ პაციენტთა 85,9% ცოცხალი იყო, ხოლო პლაცებოთი ნამკურნალებ პაციენტთა — 77,1%.
• სავარაუდო 3-წლიანი შორეული დაავადებისგან თავისუფალი გადარჩენა olaparib-ისთვის 87,5% იყო, პლაცებოსთვის კი — 80,4%.
• პლაცებოსთან შედარებით, ადიუვანტურმა olaparib-მა ინვაზიური დაავადებისგან თავისუფალი რეციდივის რისკი პლაცებოსთან შედარებით 42%-ით შეამცირა.
• პლაცებოსთან შედარებით, olaparib-მა შორეული დაავადებისგან თავისუფალი გადარჩენა 43%-ით შეამცირა.
• გვერდითი მოვლენები olaparib-ის არსებულ უსაფრთხოების პროფილს შეესაბამებოდა და კვლევაში უსაფრთხოების ახალი სიგნალი არ გამოვლენილა. ხარისხი 3 გვერდითი მოვლენები იშვიათი იყო.

მნიშვნელობა

OlympiA კვლევამ პირველად წარმოადგინა PARP ინჰიბიტორის გავლენა გადარჩენის საბოლოო წერტილებზე ძუძუს კიბოში ან ნებისმიერ ადიუვანტურ გარემოში და მიანიშნა germline BRCA1/2 მუტაციებთან დაკავშირებული ადრეული ძუძუს კიბოს სტანდარტული მკურნალობის ცვლილებაზე.

BRCA მუტაციის მქონე მაღალი რისკის ადრეული ძუძუს კიბოს პაციენტებს, რომლებიც ოპერაციის შემდგომი დამცავი მიზნით ადიუვანტურ olaparib-ს იღებდნენ, კიბოს გარეშე სიცოცხლისა და 3-წლიანი დაკვირვებისას მეტასტაზის თავიდან აცილების უფრო მაღალი ალბათობა ჰქონდათ. გვერდითი მოვლენები შეზღუდული და მართვადი იყო. ეს მიგნებები მაღალი რისკის BRCA მუტაციის მქონე პაციენტებში სტანდარტული მოვლის შემდეგ 1 წლის განმავლობაში ადიუვანტურ olaparib-ს უჭერს მხარს. შედეგები ძუძუს კიბოს პაციენტებში მემკვიდრეობითი კიბოს გენების შესახებ გენეტიკური ტესტის ჩატარებასაც უჭერს მხარს.

დგება ძუძუს კიბოს ყველა პაციენტში მემკვიდრეობითი გენური ტესტირების დრო?

BRCA მუტაციები ძუძუს კიბოების 5%-დან 10%-მდე ნაწილთან არის დაკავშირებული.

ამ მუტაციებთან დაკავშირებული ახლად დიაგნოსტირებული ძუძუს კიბო შეიძლება აგრესიული და მაღალი რისკის დაავადებით გამოვლინდეს. მულტიმოდალური მკურნალობის (ოპერაცია, დასხივება და ქიმიოთერაპია) დასრულების შემდეგ რეციდივის სიხშირე შეიძლება მაღალი იყოს და ახალი ეფექტიანი მკურნალობა გახდეს საჭირო.

კიბოში მემკვიდრეობითი კიბოს გენის მუტაციის აღმოჩენას ორი მნიშვნელობა აქვს:

1. მემკვიდრეობითი კიბოს მუტაციების მქონე სიმსივნეებში PARP ინჰიბიტორები — DNA-ის აღდგენის ფერმენტზე მიზანმიმართული ახალი თაობის პრეპარატები — საკმაოდ ეფექტიანია
2. კიბოს მემკვიდრეობითობის ცოდნა მნიშვნელოვანია ოჯახის წევრების კიბოს რისკისა და თავად პაციენტში მეორეული კიბოების რისკების გამოსათვლელად და აუცილებელი ზომების მისაღებად.

Olympia კვლევის დეტალები

ორმაგად ბრმა ფაზა III OlympiA კვლევაში ჩაერთო სამმაგად უარყოფითი ძუძუს კიბოს ან HER2-უარყოფითი ჰორმონრეცეპტორდადებითი ძუძუს კიბოსა და BRCA1/2 დადებითობის მქონე მაღალი რისკის ადრეული ძუძუს კიბოს 1836 პაციენტი . ოპერაციით, რადიოთერაპიითა და საჭიროების შემთხვევაში ქიმიოთერაპიით მკურნალობის შემდეგ პაციენტები რანდომულად ორ ჯგუფში განაწილდა და 1 წელი ადიუვანტურ olaparib-ს ან პლაცებოს იღებდა.

დოქტორმა Tutt-მა თქვა: „ინვაზიური დაავადებისგან თავისუფალი და შორეული დაავადებისგან თავისუფალი გადარჩენისთვის მკაცრი კრიტერიუმები გამოვიყენეთ და დაგეგმილ შუალედურ ანალიზში ადრეული ანგარიშგების ეს კრიტერიუმები შესრულდა“.

დოქტორმა Tutt-მა თქვა: „Kaplan-Meier-ის მრუდები ადრევე იყოფა, მკურნალობის ჯგუფებს შორის 3 წელზე 8,8%-იანი აბსოლუტური სხვაობით“.

პლაცებოსთან შედარებით, olaparib-მა დაავადებისგან თავისუფალი შორეული გადარჩენა 43%-ით შეამცირა (ანუ მეტასტაზური ძუძუს კიბოს, ახალი კიბოს ან ნებისმიერი მიზეზით სიკვდილის რისკი [ P < 0,0001]). მკურნალობის ჯგუფებს შორის სხვაობა 3 წელზე 7,1% იყო.

საერთო გადარჩენა ჯერ არ მომწიფებულა, თუმცა olaparib-ის ჯგუფში ნაკლები სიკვდილი დაფიქსირდა.

გვერდითი მოვლენები

გვერდითი მოვლენები olaparib-ის ცნობილ უსაფრთხოების პროფილს შეესაბამებოდა და კვლევაში ახალი უსაფრთხოების სიგნალი არ გამოვლენილა. Olaparib-ს სერიოზული არასასურველი მოვლენების, მათ შორის ჰოსპიტალიზაციის, ლეიკემიისა თუ სხვა კიბოების, სიხშირე არ გაუზრდია. მის მიმღებებში 3. ხარისხის ან უარესი გვერდითი მოვლენები იყო ანემია (8,7%), ნეიტროპენია (4,8%), ლეიკოპენია (3,0%), დაღლილობა (1,8%) და ლიმფოციტოპენია (1,2%).

კომენტარი

OlympiA კვლევის მიგნებები მაღალი რისკის ადრეული ძუძუს კიბოს დიაგნოზის მქონე პაციენტებში BRCA მუტაციების გენეტიკური ტესტირების საჭიროებას უსვამს ხაზს. ამ შედეგებმა ამ ჯგუფის მკურნალობის გადაწყვეტილებებზე მნიშვნელოვანი გავლენა შეიძლება მოახდინოს, მათ შორის BRCA-მუტაციადადებით ადრეულ ძუძუს კიბოში ოპერაციის შემდგომი დამცავი PARP ინჰიბიტორის გამოყენებაზე.