Ağciyər xərçəngində MET mutasiyasına xas ilk müalicə FDA təsdiqi aldı: Capmatinib

6 may 2020-ci ildə ABŞ Qida və Dərman Administrasiyası (FDA), 4-cü mərhələ (bədənin digər bölgələrinə yayılmış) qeyri-kiçikhüceyrəli ağciyər xərçəngi (KHDAK) olan yetkin xəstələrin müalicəsi üçün capmatinib (Tabrecta) adlı dərmana sürətləndirilmiş təsdiq verdi. Capmatinib MET (mezenximal-epitelial keçid) ekzon 14 atlanmasına səbəb olan genetik dəyişikliyə malik ağciyər xərçəngi xəstələri üçün FDA tərəfindən təsdiqlənmiş ilk müalicədir.

FDA eyni zamanda capmatinibə uyğunluq üçün MET ekzon 14 skipping (atlanma) mutasiyasını aşkar edən FoundationOne CDx testini (F1CDx) təsdiqlədi.

Ağciyər xərçəngləri 2 əsas qrupa bölünür: kiçikhüceyrəli və qeyri-kiçikhüceyrəli. Qeyri-kiçikhüceyrəli ağciyər xərçəngləri də aşağıda göründüyü kimi çoxsaylı fərqli genetik və bioloji xüsusiyyətlərə malik alt qruplara bölünür. Hər il bu alt qrupları müəyyən edən genetik dəyişiklikləri hədəfləyən yeni ağıllı dərmanlar hazırlanır. Qeyri-kiçikhüceyrəli ağciyər xərçəngi (KHDAK) bütün ağciyər xərçənglərinin % 85-90-nı təşkil edir.

Ağciyər xərçəngləri çox vaxt irəliləmiş mərhələdə, yəni xərçəng digər orqanlara metastaz verdikdə diaqnoz edilir. Xərçəng metastazı ardıcıl genetik dəyişikliklər nəticəsində yaranır və MET ekzon 14 atlanması xərçənglərin metastazı üçün kritik hadisə sayılır. MET ekzon 14 atlanmasına səbəb olan mutasiyalarağciyər xərçəngi xəstələrinin % 3-4-də mövcuddur.

Tabrecta «kinaza inhibitoru» sinfindən olan kiçik molekullu, ağızdan həb şəklində qəbul edilən dərmandır; şiş hüceyrələrinin böyüməsini dayandırmağa kömək edən mühüm fermenti bloklayaraq işləyir (baxın xərçəng dərmanlarının növləri).

Capmatinibə (Tabrecta) FDA təsdiqi qazandıran tədqiqat GEOMETRY mono-1

• Capmatinibin MET 14 ekzon atlanması mutasiyasına malik metastatik KHDAK xəstələrində effektivliyi 97 xəstəni daxil edən çoxmərkəzli, randomizə edilməmiş, açıq etiketli klinik tədqiqat olan GEOMETRY mono-1 ilə göstərildi.
• Xəstələr xəstəliyin irəliləməsinədək və ya qəbuledilməz yan təsir yarananadək gündə iki dəfə 400 mg capmatinib qəbul etdilər.
• Tədqiqatda ölçülməsi nəzərdə tutulan əsas effektivlik nəticə göstəricisi korlaşdırılmış müstəqil baxış komitəsinin müəyyən etdiyi ümumi cavab nisbəti idi.
• Əvvəllər heç bir müalicə almamış 28 xəstə arasında ümumi cavab nisbəti % 68 (% 95 CI: 48, 84), cavab müddəti isə 12.6 ay (% 95 CI: 5.5, 25.3) idi.
• Əvvəllər müalicə edilmiş 69 xəstə arasında ümumi cavab nisbəti % 41 (% 95 CI: 29, 53), cavab müddəti isə 9.7 ay (% 95 CI: 5.5, 13.0) idi.

• Ən çox rast gəlinən, xəstələrin ən azı % 20-nə təsir edən yan təsirlər periferik ödem, ürəkbulanma, yorğunluq, qusma, təngnəfəslik və iştahanın azalmasıdır. Capmatinib həmçinin interstisial ağciyər xəstəliyi, hepatotoksiklik, işığa həssaslıq və embrio-fetal toksikliyə səbəb ola bilər. Hüceyrələrdə aparılmış erkən laboratoriya tədqiqatlarında fototoksiklik üçün aydın müsbət siqnala əsasən xəstələr günəş işığına daha həssas ola bilərlər; capmatinib qəbul edərkən dərilərini örtmək, günəşdən qoruyucu krem çəkmək və qaralmamaq üçün tədbir görmələri tövsiyə olunur.
• Tövsiyə olunan capmatinib dozasıgündə iki dəfə, yeməklə və ya yeməksiz 400 mg-dır.