Aralıq dənizi pəhrizi yaşla bağlı beyin kiçilməsini azalda bilər

Aralıq dənizi pəhrizinə əməl edən 70 yaş və yuxarı şəxslərdə yaşla bağlı beyin kiçilməsinin ləngidiyi tapılıb.

Aralıq dənizi pəhrizi zeytun yağı, tam taxıllı çörək və emal edilməmiş pendirə əsaslanan pəhrizdir. Bu qidalarla yanaşı tərkibində əsasən taxıllar, paxlalılar, təzə tərəvəz və meyvələr, qabıqlı çərəzlər olur.

Aralıq dənizi pəhrizi barədə əvvəlki yazılarımızdan da xatırlaya biləcəyiniz kimi, bu növ qidalanmanın diabet (şəkərli diabet), xərçəng və piylənmə kimi bəzi xroniki xəstəliklərə tutulma riskini və qocalma sürətini azalda biləcəyi düşünülür. Bu mövzuda sübutlar hər keçən gün artır.

Marağınızı çəkə bilər:

• Dünyanın ən yaxşı pəhriz — qidalanma proqramları siyahısı

Tədqiqat

2017-ci ilin yanvarında Neurology adlı tibb və elm jurnalında dərc edilmiş tədqiqatda Aralıq dənizi tipli qidalanmanın beyin həcmində yaşla bağlı kiçilməni azaltdığı müşahidə edilib.

Aparılmış tədqiqatda demensiya əlaməti göstərməyən 70-li yaşlarında 967 şəxsin qidalanma vərdişləri araşdırılıb.

Şəxslərə keçirilmiş sorğularla qidalanma tərzlərinin Aralıq dənizi pəhrizinə nə qədər yaxın olduğu araşdırılıb. Üç il davam edən tədqiqatın əvvəlində və sonunda şəxslərə MR (maqnit-rezonans görüntüləmə) müayinəsi aparılaraq beyin həcmi və serebral korteksin (beynin ən xarici qatının) qalınlığı ölçülüb.

Tədqiqatın nəticəsində Aralıq dənizi mətbəxi ilə qidalanan şəxslərin bu pəhrizə əməl etməyənlərə nisbətən üç ildə yarıbayarı daha az beyin həcmi itkisinə məruz qaldığı görülüb.

Nəticədə bu tədqiqat az və əsasən tərəvəz istehlakına əsaslanan Aralıq dənizi tipli qidalanmanın ürək sağlamlığına, diabetə və xərçəngə müsbət təsirləri ilə yanaşı yaşla bağlı beyin kiçilməsini azaltdığını göstərməsi baxımından olduqca dəyərlidir.