Əməliyyat edilə bilməyən və ya 4-cü mərhələ melanoma üçün encorafenib və binimetinib FDA təsdiqi aldı

27 iyun 2018-ci ildə ABŞ Qida və Dərman İdarəsi FDA BRAF V600E və ya V600K mutasiyası müsbət olan, əməliyyat edilə bilməyən və ya metastatik (4-cü mərhələ) melanomalı xəstələr üçün kombinasiya şəklində encorafenib və binimetinibdərmanlarını (Braftovi və Mektovi) təsdiqlədi.

Təsdiq BRAF V600E və ya V600K mutasiyası müsbət, cərrahi yolla çıxarıla bilməyən və ya metastatik melanoma diaqnozu qoyulmuş 577 xəstənin daxil edildiyi randomizə edilmiş, aktiv nəzarətli, açıq etiketli, çoxmərkəzli COLUMBUS adlı klinik tədqiqata əsaslanır. COLOMBUS tədqiqatı eyni zamanda ASCO 2018-inən çox diqqət çəkən təqdimatlarından biri idi.

Xəstələr üç qrupa ayrıldı:

• birinci qrupa gündə iki dəfə binimetinib 45 mg və gündə bir dəfə encorafenib 450 mg,
• ikinci qrupa gündə bir dəfə encorafenib 300 mg və
• üçüncü qrupa vemurafenib gündə iki dəfə 960 mg verildi.

Müalicə xəstəliyin irəliləməsinə və ya qəbuledilməz yan təsirlərə qədər davam etdi.

Tədqiqatın ölçmək istədiyi əsas effektivlik göstəricisi proqressiyasız sağqalım (müalicə ilə xəstəliyi nəzarət altında saxlama müddəti) olaraq müəyyən edildi.

Tədqiqatın nəticələrinə görə:

• Median proqressiyasız sağqalım binimetinib və encorafenib alan xəstələrdə 14.9 ay, tək vemurafenib qrupunda isə 7.3 ay idi.
• Bu ikili müalicə standart müalicə olan vemurafeniblə müqayisədə xəstəliyin irəliləmə riskini %46 azaltdı.
• Müalicəyə ümumi cavab göstəriciləri müvafiq olaraq %63 və %40, median cavab müddəti isə müvafiq olaraq 16.6 ay və 12.3 ay olub.
• Müalicə qruplarının bir-biri ilə digər müqayisələrində əhəmiyyətli fərq aşkar edilmədi.

Kombinasiya alan xəstələrdə ən geniş yayılmış (≥25%) yan təsirlər yorğunluq, ürəkbulanma, ishal, qusma, qarın ağrısı və artralgiya idi. Yan təsirlər səbəbindən müalicənin dayandırılması kombinasiya alan xəstələrin % 5-ində baş verib; müalicəni dayandırmağın ən çox rast gəlinən səbəbləri qanaxma və baş ağrıları idi.

Tövsiyə olunan dozalar: gündə iki dəfə binimetinib 45 mg və gündə bir dəfə encorafenib 450 mg-dır.

Nəticə olaraq encorafenib və binimetinib BRAF müsbət melanomanın müalicəsi üçün yeni kombinasiya kimi klinik praktikada yerini alıb. Bu diaqnoz üçün əvvəllər təsdiq almış kombinasiyalardandaha effektiv görünsə də, hələ belə bir müqayisəli tədqiqat yoxdur. Bundan başqa, yan təsirlər baxımından daha üstün görünür.