Əməliyyat oluna bilən ağciyər xərçəngində neoadjuvant-adjuvant nivolumab FDA təsdiqi aldı

3 oktyabr 2024-cü ildə ABŞ Qida və Dərman İdarəsi (FDA) cərrahi yolla çıxarıla bilən (şiş ≥ 4 cm və/və ya limfa düyünü müsbət) kiçikhüceyrəli olmayan ağciyər xərçəngi (KHDAK) olan yetkin pasiyentlər üçün neoadjuvant müalicədə platin əsaslı ikili kimyaterapiya ilə birlikdə təsiredici maddəsi nivolumab olan Opdivo (Bristol Myers Squibb Company) immunoterapiyasını təsdiqlədi. Təsdiq əməliyyatdan sonra adjuvant müalicə kimi tək dərman olaraq nivolumabın tətbiqini də əhatə edir. Bu müalicə məlum epidermal böyümə amili reseptoru (EGFR) mutasiyası və ya anaplastik limfoma kinaz (ALK) yenidənqurulması olmayan pasiyentlərə aiddir.

İmmunoterapiyalarla ağciyər xərçənginin dəyişən taleyi

Ağciyər xərçəngi dünyada hər il 2,5 milyon yeni diaqnozla həm ən çox rast gəlinən, həm də ən çox ölümə səbəb olan xərçəng olaraq qalır. Xüsusilə kiçikhüceyrəli olmayan ağciyər xərçəngi (KHDAK) bu xəstəliyin böyük əksəriyyətini təşkil edir. Rezektabel, yəni cərrahi yolla tam çıxarıla bilən ağciyər xərçənglərində həm neoadjuvant (əməliyyatdan əvvəl), həm də adjuvant (əməliyyatdan sonra) müalicələr xəstəliyin təkrarlanma riskinin azaldılmasında mühüm rol oynayır. Bu baxımdan FDA-nın nivolumabı təsdiqləməsi, xüsusilə cərrahi müdaxilə mümkün olan pasiyentlər üçün çox mühüm addımdır.

CHECKMATE-77T tədqiqatı ilə gələn FDA təsdiqi

FDA təsdiqi nivolumabın effektivliyi və təhlükəsizliyi üzrə aparılmış böyük klinik tədqiqatın nəticələrinə əsaslanır. Plasebo nəzarətli, ikiqat kor CHECKMATE-77T tədqiqatı əvvəllər müalicə almamış, rezektabel KHDAK olan 461 pasiyenti əhatə edir. Tədqiqatda pasiyentlər platin əsaslı kimyaterapiya ilə birlikdə nivolumab və ya plasebo almaq üçün təsadüfi qaydada iki qrupa ayrılıb. Neoadjuvant müalicə zamanı pasiyentlər hər üç həftədən bir dörd siklə qədər müalicə alıb, sonra isə əməliyyatdan sonra tək nivolumab və ya plasebo ilə adjuvant müalicə alıblar.

Əsas effektivlik meyarı: hadisəsiz sağqalım (EFS)

Tədqiqatın əsas effektivlik meyarı kor müstəqil mərkəzi qiymətləndirmə ilə müəyyənləşdirilən hadisəsiz sağqalım (EFS= event free survival) olub.

Nəticələr olduqca diqqətəlayiqdir:

• Nivolumab qrupunda median EFS hələ əldə edilmədiyi halda (95% CI: 28,9, NE), plasebo qrupunda 18,4 ay hesablanıb (95% CI: 13,6, 28,1).
• Bu fərq nivolumabın platin əsaslı kimyaterapiya ilə kombinasiyasının şişin təkrarlanmasını və irəliləməsini 42% gecikdirdiyini göstərir (HR 0,58 [95% CI: 0,43, 0,78]; p-dəyəri 0,00025).
• Median 25,4 aylıq izləmənin sonunda nivolumab alan pasiyentlərdə xəstəliksiz sağqalım göstəricisi 70,2% olduğu halda, yalnız kimyaterapiya alanlarda 50% olub.

Ümumi sağqalım (OS)

Tədqiqatın əvvəlcədən müəyyən edilmiş aralıq təhlilində ümumi sağqalım (OS= overall survival) statistik əhəmiyyət baxımından hələ yoxlanılmasa da, təsviri təhlildə nivolumabın xeyrinə olan nəticəyə mənfi təsir müşahidə edilməyib. Bu, uzunmüddətli sağqalım məlumatlarının sonrakı mərhələlərdə daha da aydınlıq gətirə biləcəyini düşündürür.

Təhlükəsizlik və yan təsirlər

Nivolumabın kimyaterapiya ilə kombinasiyasında müşahidə edilən yan təsirlər əvvəlki tədqiqatlardakı nəticələrlə uyğundur. Neoadjuvant müalicə zamanı nivolumab alan pasiyentlərin 5,3%-i yan təsirlər səbəbindən əməliyyata uyğun hesab edilməyib. Bu göstərici plasebo qrupunda 3,5% olub. Həmçinin əməliyyatın gecikməsi baxımından iki qrupda oxşar göstəricilər (nivolumab qrupunda 4,5%, plasebo qrupunda 3,9%) bildirilib. Bu yan təsirlər müalicə boyu diqqətlə idarə edilməli potensial ağırlaşmalara işarə edir.

Doza

FDA nivolumabın neoadjuvant müalicədə hər üç həftədən bir 360 mg, adjuvant müalicədə isə hər dörd həftədən bir 480 mg dozasını tövsiyə edir. Nivolumab kimyaterapiya ilə eyni gündə tətbiq olunacaqsa, kimyaterapiyadan əvvəl verilməlidir.

*

Əməliyyat oluna bilən ağciyər xərçəngində FDA təsdiqləri

Nivolumabın bu təsdiqi ilə əməliyyat oluna bilən kiçikhüceyrəli olmayan ağciyər xərçəngi üçün FDA ümumilikdə 6 fərqli müalicəni təsdiqləmiş oldu. Bunlara atezolizumab və pembrolizumabın adjuvant müalicə, nivolumabın neoadjuvant müalicə, pembrolizumab, durvalumab və nivolumabın isə perioperativ (həm neoadjuvant, həm də adjuvant) müalicə kimi təsdiqləri daxildir.