Kərəvizin faydaları və Aralıq dənizi mətbəxindən sağlam kərəviz yeməyi resepti

Torpağın altında yetişən, həm kökü, həm də sap hissəsi təzə və ya bişmiş halda yeyilə bilən, kök ailəsinə mənsub kərəviz çox müxtəlif istifadə sahələri olan sağlam və qidalı tərəvəzdir. Yazımızda kərəvizin qida dəyərlərini, sağlamlıq faydalarını və reseptlərdə necə istifadə olunacağını topladıq.

Kərəviz Aralıq dənizi və Şimali Avropa ölkələrində yetişir. Qədim misirlilərin, yunanların və italyanların ondan tibbi və dini məqsədlərlə istifadə etdiyi məlumdur. Tarixi qeydlərə görə ilk dəfə 1600-cü illərdə yemək kimi istifadə edilmişdir və hazırda Avropa başda olmaqla dünyanın bir çox yerində məşhur qida kimi istehlak olunmağa davam edir.

Kərəviz yeməyi resepti

Kərəvizi dilimlənmiş və ya sürtgəcdən keçirilmiş halda yeməklərdə, məzələrdə və salatlarda istifadə edə bilərsiniz. Kərəviz çiy və ya bişmiş yeyilə bilən çoxyönlü tərəvəzdir. Çiy kərəvizin həm sapı, həm də kökü salatda istifadə olunduqda həm dadlı, həm də çox sağlam olur.

Zeytun yağlı, portağallı kərəviz yeməyi (4 nəfərlik)

Lazım olan ərzaqlar:

• 5 ədəd orta ölçülü kərəviz
• 2 ədəd orta ölçülü kök
• 1 ədəd iri baş soğan
• 1 ədəd orta ölçülü kartof
• 1/2 ədəd təzə sıxılmış limonun suyu
• 6 xörək qaşığı sızma zeytun yağı
• 4 ədəd orta ölçülü təzə sıxılmış portağalın suyu
• 1 stəkan su

Kərəviz yeməyinin hazırlanması:

1. Kərəvizləri soyun. İri kublar şəklində doğrayın və qaralmaması üçün az limonlu suda saxlayın.
2. Soyduğunuz kartofu kərəvizlərin ölçüsündə, kökləri halqa-halqa, kərəviz yarpaqlarını nazik, baş soğanı isə yeməklik doğrayın.
3. Soğanları yumşalana qədər yüngülcə qovurun (kalorisini azaltmaq istəyirsinizsə, çox az suda bişirin). Kök dilimlərini də əlavə edib qovurmağa davam edin.
4. Kərəviz və kartof dilimlərini də əlavə edib yavaşca qarışdırın. Xırda doğradığınız kərəviz yarpaqlarını və saplarını bu zaman əlavə edin.
5. Təzə sıxılmış portağal şirəsi ilə suyu ayrı qabda qarışdırın. Qazana qoyduğunuz tərəvəzlərin üzərinə töküb qapağı bağlı qazanda qaynamağa qoyun. Bundan sonra həddən artıq bişməməsi üçün arabir yoxlayaraq kərəvizlər yumşalana qədər bişirin.
6. Portağallı suyu əlavə edin. Qaynamağa başlayanda zəif odda 20-25 dəqiqə bişirməyə davam edin. Portağallı kərəviz yeməyinizi cəfəri və ya kərəviz yarpaqları ilə bəzəyib zeytun yağının bir hissəsini üstünə təzə əlavə edərək sağlam və dadlı yeməyinizi sevdiklərinizlə bölüşə bilərsiniz.

Kərəvizin faydaları

• Yaxşı sidikqovucu xüsusiyyətə malikdir.
• Kərəviz C vitamini ilə zəngin olduğuna görə yüksək təzyiq riskini azalda bilər.
• K vitamini ilə zəngin olduğuna görə sümük sağlamlığına müsbət təsir edə bilər. Aparılmış tədqiqatda K vitamini olan qidaları kifayət qədər istehlak edən şəxslərdə sümük əriməsinə bağlı sınıq riskinin yüzdə 22 azaldığı müəyyən edilmişdir.
• Kərəviz bitkisi kök tərəvəzlərin qəbulunu artırmağın bir yoludur və tip-2 diabet riskini azaldır. Dünyada milyonlarla insanın sağlamlığına təsir edən şəkərli diabet sağlam pəhrizlə idarə edilə bilər. Avropada aparılmış böyük tədqiqatda kök tərəvəzlərlə tip 2 diabet riski arasındakı əlaqə araşdırılmışdır. Kök tərəvəzləri yeyən şəxslərin az miqdarda istehlak edənlərə nisbətən % 13 daha aşağı şəkərli diabet yaranma riski daşıdığı tapılmışdır.
• Az kalorili və lifli olduğuna görə çəkiyə nəzarəti təmin edir və xərçəngdən qorunmaq üçün lazım olan sağlam pəhrizdə olmasını tövsiyə etdiyimiz mühüm tərəvəz növüdür.

- Əlaqəli mövzu: Şəkərli diabet xəstələri meyvə yeyə bilərmi? Meyvələr və diabet haqqında faydalı məlumatlar

Kərəvizdə hansı qida maddələri vardır?

• C vitamini
• K vitamini
• B6 vitamini
• Kalium
• Fosfor
• Lif

Kərəvizin qida tərkibi necədir?

Kiçik bir kasa kərəviz bunları təmin edir:

• 66 kalori
• 2.3 qram zülal
• 0.47 gr yağ
• 14.3 gr karbohidrat
• 2.8 gr lif

Kərəviz qida maddələrinin bol olduğu mənbədir. Kiçik bir kasa kərəvizin qarşıladığı gündəlik ehtiyacın faizləri belədir:

• lifin % 11-i
• kaliumun % 13-ü
• B6 vitamininin % 13-ü
• fosforun % 18-i.