Öd yolu xərçəngində dəqiq onkologiya yanaşması fərq yaratdı

ESMO 2019 Konqresində qaraciyərdaxili öd yolları xərçəngi diaqnozlu xəstələrdə, FGFR dəyişikliyi olan qrupda pemigatinib %35 cavab göstəricisi, 21 aylıq ümumi sağqalım müddəti ilə seçimimizin az olduğu şiş növündə fərq yaratdı.

Biliar sistem (öd yolları) xərçənglərinin, xüsusilə xolangiokarsinomanınidarə edilməsi yeni dəqiq dərman strategiyaları ilə sürətlə dəyişir. Bu xərçəng növündə tədqiqatların çoxu intrahepatik xolangiokarsinomalı (qaraciyərdaxili öd yolu xərçəngli) xəstələrin təxminən % 40-da tapıla bilən fibroblast böyümə amili reseptoru-2 (FGFR2) füzyonları və izositrat dehidrogenaza-1 (IDH1) mutasiyaları olan xəstələrə yönəlir.

ESMO 2019-da təqdim olunmuş FIGHT-202 tədqiqatının gec bildirilmiş xülasəsi əvvəllər müalicə olunmuş, irəli mərhələli xolangiokarsinomalı xəstələrdə pemigatinib müalicəsinin klinik əhəmiyyətli effektivliklə əlaqəli olduğunu göstərir (Xülasə LBA40).

Pemigatinib FGFR inhibitorudur və bu tədqiqatda müalicəyə cavab FGFR2 geninin yenidən düzülməsi və ya füzyonu olan xəstələrlə məhdudlaşmışdır.

Tədqiqatın nəticələri

• Obyektiv cavab göstəricisi, 3 tam cavab və median 7,5 aylıq cavab müddəti daxil olmaqla % 35,5 idi.
• Xəstəliyə nəzarət göstəricisi % 82 idi.
• Median proqressiyasız (irəliləməsiz) sağqalım və ümumi sağqalım müvafiq olaraq 6.9 ay və 21.1 ay idi.
• Ən çox rast gəlinən yan təsir ilk növbədə pəhriz dəyişiklikləri və fosfatbağlayıcıların tətbiqi ilə nəzarətdə saxlanıla bilən yüngül (dərəcə 1-2) hiperfosfatemiya (tezlik % 60) idi (qanda fosfatın yüksəlməsi).

Öd yolu xərçənglərində FGFR hədəfinə yönəlmiş bir neçə dərman hazırlanır. Müqayisəsiz bir faza IIa tədqiqatındabaşqa FGFR2 inhibitoru olan derazantinib üçün də klinik effektivlik göstərilmişdir (Xülasə 721P). FIGHT-202 nəticələrinə oxşar olaraq derazantinibin effektivliyi FGFR2 dəyişikliklərinin mövcudluğunda daha aşkar idi: obyektiv cavab göstəricisi % 21.

FGFR2 füzyonu adlı genetik dəyişikliyi olan xəstələr FGFR füzyonu olmayanlarla müqayisədə mühüm sağqalım üstünlüyünə malik görünür və yeni nəticələr gənc yaşın (<65 yaş), alkoqoldan sui-istifadənin, hepatit B və ya C müsbətliyinin FGFR2 füzyonlarının olma ehtimalını artırdığını göstərir (Xülasə 723P).

Şişin genetik analizi irəli mərhələli xolangiokarsinoma diaqnozlu xəstələr üçün yeni standarta çevriləcək

Yeni birinci xətt agentlərinin araşdırılması daxil olmaqla xolangiokarsinoma müalicəsində əhəmiyyətli irəliləyişlər var. Məsələn, davam edən PROOF tədqiqatında pan-FGFR inhibitoru infigratinib, irəli mərhələli / metastatik və ya əməliyyat edilə bilməyən xolangiokarsinomalı xəstələrdə standart müalicə olan gemsitabin üstəgəl sisplatin ilə müqayisə edilir (Xülasə 832TiP).

İlk dəfə ESMO 2019 Konqresində bildirilən bu nəticələr xolangiokarsinomanın genomik bazasının daha yaxşı anlaşılmasının klinik tədqiqatlarda böyük ümid verən hədəfli müalicələrə gətirdiyini göstərir, lakin yalnız düzgün xəstələrə verildikdə. Dəqiq tibb, uzun illər ağciyər xərçəngi və onkologiyanın digər sahələrində effektivlik göstərmişdir, lakin indi xolangiokarsinoma kimi müalicə seçimləri məhdud xərçəng növü üçün də düşünülməlidir.