Rebel Wilson-un Sağlamlıq ili və arıqlamaq üçün sınadığı Mayr Metod

2020-ci ildə məşhurların sürətlə arıqlaması ilə sosial mediada bu pəhrizlərin tərkibi barədə çoxlu yazı dərc edilməyə başladı. Əvvəlcə, Adele-in dəyişimi və SirtFood pəhrizi gündəmi məşğul edərkən, bu günlərdə avstraliyalı aktrisa, yazıçı, komediyaçı və prodüser Rebel Wilsonun tətbiq etdiyi pəhriz danışılmağa başladı.

Rebel Wilson 2020-ci ili özü üçün “Sağlamlıq ili” elan etdiyini və ilin sonuna 75 kiloya düşməyi hədəflədiyini açıqlamışdı. “Viva Mayr Wellness” klinikasını ziyarət etdikdən sonra, Mayr Method adlı qidalanma modelinə əməl etməyə başlayan Rebel Wilson, artıq 18 kiloya vida edib. Aldığı nəticələrə baxanda tətbiq etdiyi üsulun işə yaramağa başladığı görünür.

Viva Mayr Wellness müasir tamamlayıcı tibbi Mayr Metod-u yaratmış avstriyalı həkim Franz Xaver Mayr-ın ənənəvi diaqnostika və müalicə protokolu ilə birləşdirir. Rəsmi saytında üsullarını belə açıqlayırlar;

“Sizi müalicə etdikdən sonra düzgün qidalanma, məşq və zehni fərqindəliyin artması ilə həyatınızın yeni təməl daşları yaradılır.”

Viva Mayr Wellness klinikasının qurucusu Dr. Harald Stossier Mayr Metod qidalanma modelini spa, psixi sağlamlıq terapiyaları, vitamin əlavələri və fitnes məşqləri ilə birləşdirərək, bütöv yanaşma ilə sağlamlığı yaxşılaşdırdıqlarını iddia edir. Viva Mayr Wellness proqrama əməl edənlərin 14 gündə şok pəhrizlər və ağır məşqlər olmadan daha düz qarına və daha gənc dəriyə sahib ola biləcəyini vəd edir. Proqramda 14 günlük Mayr Metod planı ilə yanaşı onun tətbiqinə kömək edən reseptlər də var.

Rebel Wilson-u arıqlatmağa başlayan Mayr Metod nədir?

Mayr Method yaxşı qidalanma və bağırsaq sağlamlığını ümumi sağlamlığın vacib hissəsi kimi görməyə yönəlir. Proqramın əsas məqsədi bağırsaq sağlamlığı üçün lazım olan qidaları yemək, ona mənfi təsiri düşünü­lən qidaları məhdudlaşdırmaqdır. Mayr Metod fəlsəfəsinin əsas qidalanma tərkibi belədir;

• Qlüten və süd məhsullarının istehlakı azaldılır.
• Ara yeməklər tamamilə çıxarılır.
• Şəkər, kofein, alkoqol və qablaşdırılmış qidalar çıxarılır.
• Yemək zamanı qidalar daha uzun çeynənir (hər tikə orta 40-60 dəfə çeynənir). Çox çeynəməyin səbəbi yemək zamanı beyinə toxluq siqnalının 20-ci dəqiqədə çatmasıdır. Buna görə yemə müddəti uzadılaraq toxluq hissinə çatmağa çalışılır.
• Yemək zamanı tamamilə yeməyə diqqət edilir. Danışmaq, oxumaq qadağan edilir, telefon kimi diqqətyayındıran texnoloji cihazlar masadan uzaqlaşdırılır.
• Tərəvəz ağırlıqlı qidalanma seçilir.
• Hər gün mütləq səhər yeməyi yeyilməlidir, lakin axşam yeməyi ötürülə bilər.
• Axşam 16:00-dan sonra çiy qidalar yeyilmir.
• Su istehlakı artırılır. Hər səhər günə 1 stəkan ilıq su ilə başlanır.

Mayr Metod modelində istehlak edilə bilən nümunə qidalar hansılardır?

Zülal: Orqanik yumurta, alabalıq / quzu / qızılbalıq / mal filesi, hisə verilmiş alabalıq, dərisiz hinduşka döşü, qızılbalıq filesi, hisə verilmiş qızılbalıq, noxud, tofu və kürü.

Tərəvəz: İspanaq, soğan, turp, kərəviz, yerkökü, razyana, kartof, salxım pomidor, kolrabi, kahı, kələm, brokoli, şalğam.

Meyvələr: Kişmiş, zeytun, ərik, qara gavalı qurusu, alma, çiyələk, nar, portağal, sitrus meyvələri, banan, papaya, manqo, avokado.

Taxıllar: Yulaf, qarabaşaq unu, qarğıdalı unu, qlütensiz qarğıdalı lopaları, darı, risotto düyüsü.

Çərəzlər: Qoz, çiy badam.

Süd və süd məhsulları: Kərə yağı, keçi pendiri, xama, parmesan pendiri, süzmə pendir, düyü südü, yulaf südü.

Ədviyyat və dadlandırıcılar: Steviya, tərəvəzli dadlandırıcı, qaya duzu, sızma zeytun yağı, soyuq sıxılmış yağlar (kətan toxumu, çətənə və qoz daxil), kokos yağı, balzamik sirkə, bal, ağcaqayın şərbəti, alma sirkəsi, soya sousu.

İçkilər: Yaşıl çay, nar suyu və su.

Şərh və xülasə

Ümumilikdə Mayr Metod tövsiyələrinə baxdıqda sağlam qidalar təklif edildiyini görürük. Lakin ona əməl edənlər bu qidaların da kalorili olduğunu unutmamalı, artıq istehlakla arıqlamaq əvəzinə kökələ biləcəklərini bilməlidirlər. Həmçinin Rebel Wilson-un 18 kilonu yalnız bu tövsiyələrə əməl etməklə deyil, Viva Mayr Wellness klinikasında geniş səhiyyə komandası ilə işləyərək və intensiv idman edərək verdiyini xatırlatmaq faydalıdır. Bu qədər geniş səhiyyə xidmətinin qiyməti çox yüksəkdir. Qısa müddətdə sürətli arıqladan bir çox pəhriz uzunmüddətli davamlılıq problemlərinə görə istənilən təsiri verməyə bilər. Qısaca, tövsiyə olunan qidalarda bədənə zərər verən qida yoxdur. Bununla belə, kalori məhdudiyyəti və sərt qadağaların olmaması bu modeli tətbiq edilə bilən edir. Aktiv / hərəkətli həyat tərzinin sağlamlığın ayrılmaz hissəsi olduğu unudulmamalıdır. Digər tərəfdən bu qədər müxtəlif qidalanmada vitamin əlavələrinə əslində ehtiyac olmayacağı da aydındır. Bu pəhrizin qidalanma və həyat tərzi tövsiyələrinə baxdıqda Aralıq dənizi pəhrizindən çox uzaq olmadığını görürük. Dünyada ən çox araşdırılmış, sağlamlığa sübut edilmiş müsbət təsirləri olan Aralıq dənizi modelinə əməl edərək də sağlam arıqlaya bilərsiniz.

*

- 2020-ci ilin elmi sübutlu ən yaxşı pəhrizlər siyahısı