Sağlam gələcək nəsillər üçün uşaqlara niyə balıq yedirməliyik?

Aralıq dənizi pəhrizinin ən çox istehlak olunan heyvani qidalarından biri olan balıq xüsusilə uşaqlarda zəkanın inkişafı və ehtiyac duyduqları yuxunun keyfiyyəti üçün böyük əhəmiyyət daşıyır. Pensilvaniya Universitetində aparılan tədqiqatda həftədə ən azı bir gün balıq yeyən uşaqların daha az tezliklə yeyən uşaqlara görə zəka (IQ) ballarının yüksək olduğu tapılmışdır.

Əvvəllər aparılmış müxtəlif tədqiqatlarda bir çox balıqda olan omega-3 yağ turşuları ilə zəkanın inkişafı və daha yaxşı yuxu arasında əlaqə tapılmışdı. Lakin birbaşa əlaqənin olduğu dəqiq bildirilməmişdi. Tədqiqatçıların burada xüsusi araşdırdığı və toxunduğu məqam isə əlavə kimi omega-3 qəbul etmək deyil, qidaları yeyərək istehlak olunan omega 3 yağ turşularıdır.

Çində 9-11 yaşları arasında, %46-sı qız və %54-ü oğlan olmaqla cəmi 541 uşaqla aparılan tədqiqatda uşaqların balıq istehlakı tezliyi sorğu ilə ölçülmüşdür. Uşaqlar “həftədə bir”, “nadir” və ya “heç vaxt” seçimlərindən yalnız birini seçmişlər. Ardınca uşaqlar üçün zəka şkalası - IQ testi Çində aparılmışdır. Daha sonra valideynlər yuxu müddəti, gecə oyanma və ya gündüz yatma tezliyi kimi mövzuları əhatə edən uşaqların yuxu vərdişləri sorğusunda yuxu keyfiyyəti barədə sualları cavablandırmışlar. Sonda tədqiqatçılar valideynlərin təhsili, peşəsi və ailə vəziyyəti kimi demoqrafik məlumatları nəzərə almışlar.

Əlaqəli mövzu:

• Yuxu problemləri öyrənməyə təsir edir - Keyfiyyətli yuxu nədir, yaxşı yuxu üçün nə etmək lazımdır?

Bütün bu məlumatların balları hesablandıqdan sonra hər həftə müntəzəm balıq istehlak edən uşaqların IQ testləri nadir balıq yeyən və ya heç yeməyən uşaqlarınkına nisbətən orta hesabla 4.8 bal yüksək olmuşdur. Bundan əlavə, balıq istehlakı yüksək olan uşaqlarda yuxu keyfiyyətinin də ümumilikdə daha yaxşı olduğu ortaya çıxmışdır. Daha yaxşı yuxunun idrak funksiyaları və sosial davranışlarla birbaşa əlaqəli olduğu bildirilmişdir. Buna görə tədqiqatçılar xüsusilə inkişaf dövründəki uşaqların balıq istehlakına diqqət çəkirlər.

Sağlam qida olan balıq faydaları və inkişafa töhfələri ilə daha çox istehlak edilməlidir. Tədqiqatçılar uşaqların 2 yaşdan başlayaraq balıq yeməsini tövsiyə edirlər. Ailədəki vərdişlər uşaqların inkişafına çox təsir edir və gələcəkdə seçəcəkləri qidalanma tərzi kiçik yaşlarda qazandıqları vərdişlərlə əlaqəlidir.