Səhər yeməyi yeyərək ürək xəstəlikləri riskini necə azalda bilərsiniz?

American College of Cardiology jurnalında nəşr edilmiş yeni araşdırmaya görə səhər yeməyini buraxmağın ateroskleroz (arteriyanın yağlanması, damar sərtliyi) riskini artırdığı və lövhə yığılması ilə damarların sərtləşib daralması ilə əlaqəli olduğu bildirildi.

Sağlam səhər yeməyinin ideal çəki və xolesterol daxil ürək sağlamlığı baxımından da çox vacib olduğu görünür.

Tədqiqatçılar səhər yeməyi vərdişi olmayanların ümumən qeyri-sağlam həyat tərzinə malik olduğunu düşünürlər. Bu tədqiqat da yanlış vərdişi dəyişərək ürək-damar xəstəlikləri riskini necə azalda biləcəklərinə dair sübut təqdim etməyə imkan vermişdir.

Madriddə ürək-damar və ya xroniki böyrək xəstəliyi olmayan qadın və kişi könüllülərdən ibarət 4.052 şəxs araşdırıldı. Səhər yeməyində aldıqları enerji gündəlik ümumi enerjinin faizi ilə müqayisə edildi. %2.9-u səhər yeməyən, %69.4-ü az enerjili, %27.7-si isə normal səhər yeməyi yeyənlər idi.

Damar sərtliyi kimi tanınan ateroskleroz səhər yeməyən və az enerjili, yəni ötəri səhər yeməyi yeyən şəxslərdə daha yüksək nisbətdə görüldü.

Həmçinin müntəzəm səhər yeməyi yeyənlərlə müqayisədə az enerjili yeyənlərdə və ya buraxanlarda kardiometabolik risk göstəriciləri daha geniş yayılmışdı.

Səhər yeməyən şəxslərdə bel çevrəsi daha geniş, bədən kütlə indeksi, qan təzyiqi, qan yağları və acqarına qlükoza daha yüksək olmuşdur. Onların daha qeyri-sağlam yaşadığı, hipertoniya və piylənməyə daha meylli olduğu ortaya çıxmışdır. Bu, arıqlamaq istəyənlərin xüsusilə səhər yeməyini buraxmamalı olduğunu göstərir.

İnsanların %20-30-unun səhər yeməyindən imtina edərək piylənmə riski ilə yanaşı kardiometabolik anormallıqları da getdikcə yaydığı deyilə bilər. Səhər yeməyi vərdişi kiçik yaşda qazanılmalıdır. Uşaqlarda onu buraxmaq erkən piylənmə riskini artırır. Səhər yeməmək günün sonrakı saatlarında daha çox və qeyri-sağlam qidalara yönəldir. Hormonal tarazsızlıq yarada və sirkadiyal ritmə mənfi təsir edə bilər. Bu araşdırma ilə səhər yeməyinin əhəmiyyətini yenidən anladıq.