ადრეული სტადიის ფილტვის კიბოს მკურნალობა — ოპერაცია თუ სხივური თერაპია?
ადრეული სტადიის ფილტვის კიბოს მკურნალობის რომელი ვარიანტი უწყობს საუკეთესოდ ხელს სიცოცხლის ხანგრძლივობასა და დაავადების შედეგებს — ეს ონკოლოგიაში დიდი ხნის განხილვის საგანია. ამ მიზნით ჩატარებული კვლევა, რომლის შედეგებს მოუთმენლად ელოდნენ, 2018 წლის იანვარში Journal of Clinical Oncology-ში გამოქვეყნდა.
ადრეული სტადიის არაწვრილუჯრედოვანი ფილტვის კიბოს სტანდარტული მკურნალობა ოპერაციაა. თუმცა ბოლო წლებში სხივური თერაპიის და ინტერვენციული რადიოლოგიის ტექნოლოგიების განვითარებასთან ერთად არაქირურგიული მკურნალობის ვარიანტებიც აქტუალური გახდა. დასხივების ტექნოლოგიური სიახლეებიდან ერთ-ერთია სხეულის სტერეოტაქსიური სხივური თერაპია (stereotactic body radiation therapy = SBRT). ამ მეთოდით დასხივების საერთო გამოთვლილი დოზა ერთ ან რამდენიმე სეანსში გამოიყენება და მრავალი წერტილიდან სიმსივნეზე ფოკუსირებული სხივებით მისი სრული განადგურება ისახება მიზნად.
კვლევაში აშშ-ის კიბოს ეროვნულ მონაცემთა ბაზაში რეგისტრირებული, ადრეული სტადიის ფილტვის კიბოს მქონე 84.839 პაციენტი შეაფასეს. მათ შორეულ ორგანოებში მეტასტაზი არ ჰქონდათ, სიმსივნის ზომა 4 cm-ზე ნაკლები იყო და არაწვრილუჯრედოვანი ფილტვის კიბო ჰქონდათ. პაციენტთა 76.623-ს ოპერაცია, 8.216-ს კი SBRT ჩაუტარდა.
კვლევის შედეგების მიხედვით;
- 30-დღიანი სიკვდილიანობა ოპერირებულებში % 2.4 იყო, SBRT-ის მიმღებებში კი % 0.79 და
- 90-დღიანი სიკვდილიანობა ქირურგიულ ჯგუფში % 4.2, SBRT-ის ჯგუფში კი % 2.8 იყო (განსხვავებები სტატისტიკურად მნიშვნელოვანი აღმოჩნდა).
- ასევე ოპერაციასთან დაკავშირებული ადრეული (30 – 90-დღიანი) სიკვდილიანობა ასაკისა და ამოღებული ქსოვილის რაოდენობის მატებასთან ერთად იზრდებოდა.
ფილტვის კიბოს მკურნალობის გაიდლაინებში ადრეულ სტადიაზე პირველ ვარიანტად ოპერაციაა რეკომენდებული. ამ კვლევაში კი არაქირურგიული, სიმსივნეზე მიმართული ინტენსიური დასხივების ადრეული შედეგები უკეთესი აღმოჩნდა.
მიმდინარე კვლევები ამ ორი მკურნალობის ხანგრძლივი ეფექტის შეფასებას იმედოვნებს. რადგან ხანგრძლივი შედეგების, მაგალითად 3 ან 5-წლიანი გადარჩენის, ნახვამდე ვერ ვიტყვით, რომ ადრეული ფილტვის კიბოს მკურნალობის ახალი სტანდარტი სხივური თერაპია გახდა. მოკლევადიანი უფრო მაღალი რისკის მიუხედავად, ოპერაცია შეიძლება გრძელვადიანად უფრო ეფექტიან ვარიანტად დარჩეს. თუმცა ამ კვლევაში სხივური თერაპიით სიკვდილიანობის დაბალი მაჩვენებელი ამ მკურნალობის არჩევისა და უკეთ შესწავლის წამახალისებელი გახდა.
წყაროები
Post-Treatment Mortality After Surgery and Stereotactic Body Radiotherapy for Early-Stage Non–Small-Cell Lung Cancer,
Journal of Clinical Oncology (2018).
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.