ძუძუს კიბოს ახალი თაობის პრეპარატები CDK 4/6 ინჰიბიტორები ეფექტიანია როგორც ახალგაზრდა, ისე ხანდაზმულ პაციენტებში

ჰორმონრეცეპტორ-დადებითი, HER2-უარყოფითი მეტასტაზური ძუძუს კიბოს მქონე ქალებში პირველი ხაზის მკურნალობის სახით ციკლინდამოკიდებული კინაზა 4/6-ის (CDK 4/6) ინჰიბიტორის და არომატაზის ინჰიბიტორის კომბინაციის ეფექტიანობისა და უსაფრთხოების შემფასებელი კვლევა იქნა წარმოდგენილი. Journal of Clinical Oncology ჟურნალში გამოქვეყნებულმა შედეგებმა, რომლებიც 3 რანდომიზებული კლინიკური კვლევის მონაცემებს მოიცავდა, აჩვენა, რომ ხანდაზმული და ახალგაზრდა პოსტმენოპაუზური (მენოპაუზაში მყოფი) ქალები ამ მკურნალობით მსგავს სარგებელს იღებდნენ, თუმცა ხანდაზმულ ქალებს მეტი გვერდითი ეფექტი ჰქონდათ.

ძუძუს კიბოს სტანდარტული ჰორმონული მკურნალობის CDK 4/6 ინჰიბიტორთან კომბინაცია ამჟამად ჰორმონრეცეპტორ-დადებითი, HER2-უარყოფითი შორს წასული ძუძუს კიბოს მქონე პოსტმენოპაუზური ქალებისთვის პირველი ხაზის სტანდარტულ ძუძუს ენდოკრინულ თერაპიად მიიჩნევა; ანუ CDK 4 / 6 ინჰიბიტორის (მაგალითად palbociclib, ribociclib, abemaciclib) ერთდროული გამოყენება არომატაზის ინჰიბიტორთან ან ფულვესტრანტთან ერთად.

ძუძუს კიბოს მქონე ხანდაზმული ქალების მაღალი წილის მიუხედავად, ეს ჯგუფი — განსაკუთრებით 75 წლისა და უფროსი ასაკის ქალები — კლინიკურ კვლევებში არასაკმარისად იყო წარმოდგენილი. ამიტომ CDK4/6 ინჰიბიტორთან კომბინირებული ენდოკრინული მკურნალობის კანდიდატი ხანდაზმული პაციენტების შესახებ კლინიკური მონაცემები შეზღუდულია.

ამ ანალიზში 3 კლინიკური კვლევიდან სულ 1105 პაციენტი ჩაერთო:

• PALOMA-2: ლეტროზოლი პალბოციკლიბთან (Ibrance) ერთად ან ცალკე,
• MONALEESA-2: ლეტროზოლი რიბოციკლიბთან (Valamor) ერთად ან ცალკე და 
• MONARCH-3: ანასტროზოლი ან ლეტროზოლი აბემაციკლიბთან (Verzenios) ერთად ან ცალკე.

ამ ჯგუფში 456 (%25) და 198 (%10.8) პაციენტი, შესაბამისად, სულ მცირე 70 ან 75 წლის იყო. სამივე, 3 კვლევის ძირითადი საბოლოო მაჩვენებელი პროგრესირების გარეშე გადარჩენა იყო. ყველა პაციენტი პოსტმენოპაუზური იყო, მეტასტაზური დაავადებისთვის ადრე მკურნალობა არ ჰქონდა მიღებული და საერთო ფუნქციური სტატუსი ECOG 0 ან 1 იყო.

ანალიზის შედეგები

• ანალიზში ჩართული ყველა პაციენტის შემთხვევაში პროგრესირების გარეშე გადარჩენის მედიანა მხოლოდ არომატაზის ინჰიბიტორის მიმღებთათვის 14.8 თვე იყო, ხოლო CDK 4/6 ინჰიბიტორთან კომბინირებული არომატაზის ინჰიბიტორით ნამკურნალებთათვის 27.7 თვე იყო.
• შესაბამისი შედეგები 70 წლისა და უფროსი ასაკის პაციენტებისთვის იყო 19.2 და 33.1 თვე, ხოლო 75 წელზე უფროსებისთვის — 13.7 და 24.9 თვე.
• 75 წელზე უფროსი და 75 წელზე უმცროსი პაციენტების გვერდითი ეფექტების შედარებისას ხანდაზმულებში მძიმე (მე-3 და მე-4 ხარისხის) გვერდითი ეფექტების უფრო მაღალი სიხშირე დაფიქსირდა: %88.8, შედარებით %73.4-თან.
• გარდა ამისა, 75 წლისა და უფროს პაციენტებში უფრო ხშირი იყო დოზის შემცირება / გამოტოვება (%81.6 – %71.1) და მკურნალობის შეწყვეტა (%32.0 – %12.1).
• 75 წლისა და უფროსი პაციენტები არომატაზის ინჰიბიტორთან კომბინირებული CDK 4/6 ინჰიბიტორით მკურნალობისას უფრო ხშირად განიცდიდნენ დიარეას (%53.6, შედარებით %45.5-თან) და დაღლილობას (%54.4 – %44.3). 
• კომბინირებული მკურნალობის მიმღებ 70 წლისა და უფროს პაციენტებში დოზის შემცირება / შეჩერება უფრო ხშირად მკურნალობის 1-დან 3 ციკლამდე ხდებოდა, ხოლო ნეიტროპენია, დიარეა და კრეატინინის მომატება დოზის შემცირებასთან / შეჩერებასთან დაკავშირებული ყველაზე ხშირი გვერდითი ეფექტები იყო.

დასასრულ,, ძუძუს კიბოს მქონე ხანდაზმული ასაკობრივი ჯგუფების პაციენტები CDK 4/6 ინჰიბიტორებით მსგავს სარგებელს იღებენ; ამ ჯგუფში მხარდამჭერმა მკურნალობამ და გვერდითი ეფექტების უფრო მჭიდრო მართვამ შესაძლოა ხანდაზმულ პაციენტებში ამ სამკურნალო სქემის ამტანობა გააუმჯობესოს.

*