პირველად საშვილოსნოს კიბოს მკურნალობაში: იმუნოთერაპიისა და მიზანმიმართული პრეპარატის კომბინაციამ FDA-ს დამტკიცება მიიღო

შორს წასული ენდომეტრიული კარცინომისთვის (საშვილოსნოს კიბოსთვის) იმუნოთერაპია პემბროლიზუმაბისა (Keytruda) და მიზანმიმართული ანტიკიბოს პრეპარატის ლენვატინიბის (Lenvima) კომბინირებულ მკურნალობას აშშ-ის სურსათისა და მედიკამენტების ადმინისტრაციამ (FDA) 17 სექტემბერს 2019 წელს დაჩქარებული დამტკიცება მიანიჭა. საშვილოსნოს კიბოში ამ ახალი ორკომპონენტიანი მკურნალობის გამოსაყენებლად პაციენტებს:

• მიკროსატელიტური არასტაბილურობის მაღალი დონე (MSI-H) არ უნდა ჰქონდეთ,
• შეუსაბამობების აღდგენის დეფიციტი (dMMR) არ უნდა ჰქონდეთ;
• ამასთან, მანამდე ჩატარებული სისტემური ქიმიოთერაპიის შემდეგ დაავადების პროგრესირება უნდა დაფიქსირდეს;
• ასევე არ უნდა იყვნენ კურაციული, სრული განკურნების მიზნით ჩატარებული ოპერაციის ან რადიოთერაპიისთვის შესაფერისნი.

ეს განხილვა FDA-ს ონკოლოგიის სრულყოფილების ცენტრის ინიციატივის, პროექტ Orbis-ის ფარგლებში ჩატარდა. პროექტი საერთაშორისო პარტნიორებს ონკოლოგიური პრეპარატების ერთდროული წარდგენისა და განხილვის ჩარჩოს სთავაზობს. FDA-მ, ავსტრალიის თერაპიული საქონლის ადმინისტრაციამ და Health Canada-მ ამ განხილვაში თანამშრომლობით სამივე ქვეყანაში ერთდროული გადაწყვეტილებების მიღება უზრუნველყვეს.

პემბროლიზუმაბისა და ლენვატინიბის კომბინაციის ეფექტიანობა საშვილოსნოს კიბოში, სულ მცირე ერთი ხაზის სისტემური ქიმიოთერაპიის შემდეგ პროგრესირებული მეტასტაზური ენდომეტრიული კარცინომის 108 პაციენტის მომცველ ერთჯგუფიან, მრავალცენტრულ, ღია, მრავალკოჰორტულ კლინიკურ კვლევაში სახელწოდებით კვლევა 111 / KEYNOTE-146შეისწავლეს.

პაციენტები მისაღებ გვერდით ეფექტამდე ან დაავადების პროგრესირებამდე ყოველ 3 კვირაში ინტრავენურად (ვენაში) იღებდნენ პემბროლიზუმაბის 200 mg-ს, დღეში ერთხელ პერორალური (პირით) 20 mg ლენვატინიბის კომბინაციასთან ერთად.

108 პაციენტიდან 94-ს MSI-H ან dMMR არმქონე სიმსივნე ჰქონდა, 11-ს — MSI-H ან dMMR მქონე სიმსივნე, ხოლო 3-ის სიმსივნის სტატუსი უცნობი იყო. სიმსივნის MSI სტატუსი პოლიმერაზული ჯაჭვური რეაქციის ტესტით დადგინდა. სიმსივნის dMMR სტატუსი იმუნოჰისტოქიმიური ტესტით განისაზღვრა.

ეფექტიანობის ძირითადი მაჩვენებლები, რომლებიც დამოუკიდებელმა რადიოლოგიური განხილვის კომიტეტმა განსაზღვრა, იყო ობიექტური პასუხის სიხშირე და პასუხის ხანგრძლივობა .

კვლევის შედეგები

• MSI-H ან dMMR არმქონე სიმსივნის 94 პაციენტში ობიექტური პასუხის სიხშირე იყო: 10 სრული პასუხი (% 10.6) და 26 ნაწილობრივი პასუხი (% 27.7), სულ % 38.3.
• ანალიზისას პასუხის ხანგრძლივობის მედიანა არ მიღწეულა და 25 პაციენტი (პასუხის მქონეთა % 69) სულ მცირე 6 თვის განმავლობაში ამ კომბინირებულ მკურნალობაზე პასუხს ინარჩუნებდა.

ამ დამტკიცებამდე შორს წასული საშვილოსნოს კიბოს მე-2 ხაზის სტანდარტული მკურნალობა სხვადასხვა ქიმიოთერაპია იყო და ობიექტური პასუხის სიხშირე %7-15 ფარგლებში აღიწერებოდა. პემბროლიზუმაბი პლუს ლენვატინიბით %40-მდე პასუხი ონკოლოგიურ წრეებში ძალიან საყურადღებო წარმატებად შეფასდა.

ენდომეტრიული კარცინომისას ლენვატინიბისა და პემბროლიზუმაბის ყველაზე ხშირი გვერდითი ეფექტები (≥% 20) იყო დაღლილობა, ჰიპერტენზია, ძვალკუნთოვანი ტკივილი, დიარეა, მადის დაქვეითება, ჰიპოთირეოზი, გულისრევა, სტომატიტი, ღებინება, წონის კლება, მუცლის ტკივილი, თავის ტკივილი, საშარდე გზების ინფექცია, დისფონია (ხმის ჩახლეჩა), ჰემორაგიული მოვლენები (სისხლდენა), ჰიპომაგნიემია (სისხლში მაგნიუმის დაქვეითება), ხელ-ფეხის ერითროდისესთეზია (ხელისგულებისა და ტერფების გამონაყარი), დისპნოე, ხველა და სხეულზე გამონაყარი.

ენდომეტრიული კარცინომისთვის რეკომენდებული დოზაარის ყოველ 3 კვირაში 30-წუთიანი ინტრავენური ინფუზიით შეყვანილი 200 mg პემბროლიზუმაბი და დღეში ერთხელ პერორალურად 20 mg ლენვატინიბი.

ქვემოთ იმუნური საკონტროლო წერტილების ტიპის იმუნოთერაპიებისმიერ დღემდე FDA-ს დამტკიცების მქონე კიბოს ტიპებია ნაჩვენები: