Uşaqlıq xərçənginin müalicəsində ilk: immunoterapiya və hədəfli dərman kombinasiyası FDA təsdiqi aldı

İrəliləmiş mərhələli endometrial karsinoma (uşaqlıq xərçəngi) üçün immunoterapiya pembrolizumab (Keytruda) və hədəfə yönəlmiş xərçəng dərmanı lenvatinib (Lenvima) ilə kombinə müalicəyə ABŞ Qida və Dərman İdarəsi (FDA) 17 Sentyabr 2019-cu ildə sürətləndirilmiş təsdiq verdi. Bu yeni ikili müalicənin uşaqlıq xərçəngində istifadəsi üçün xəstələr;

• Yüksək mikrosatellit qeyri-sabitliyi (MSI-H) göstərməməli,
• Uyğunsuzluqların təmiri çatışmazlığına (dMMR) malik olmamalı
• Həmçinin əvvəllər tətbiq edilmiş sistemik kimyaterapiyadan sonra xəstəlikdə irəliləmə müşahidə edilməli,
• Bununla yanaşı, kurativ (tam sağalma məqsədli) cərrahiyyəyə və ya radioterapiyaya uyğun olmamalıdır.

Bu qiymətləndirmə FDA Onkologiya Mükəmməllik Mərkəzinin təşəbbüsü olan Orbis Layihəsi çərçivəsində aparılıb. Orbis Layihəsi beynəlxalq tərəfdaşlar arasında onkoloji dərmanların eyni vaxtda təqdim edilməsi və nəzərdən keçirilməsi üçün çərçivə təklif edir. FDA, Avstraliya Terapevtik Məhsullar İdarəsi və Kanada Səhiyyə qurumu bu qiymətləndirmədə əməkdaşlıq edərək hər üç ölkədə eyni vaxtda qərarların qəbul edilməsini təmin etdi.

Pembrolizumab və lenvatinib kombinasiyasının uşaqlıq xərçəngində effektivliyi, ən azı bir xətt sistemik kimyaterapiyadan sonra irəliləmiş metastatik endometrial karsinoması olan 108 xəstəni əhatə edən təkqollu, çoxmərkəzli, açıq etiketli, çoxkohortlu klinik tədqiqat olan Tədqiqat 111 / KEYNOTE-146-da araşdırıldı.

Xəstələr qəbuledilən yan təsirə və ya xəstəliyin irəliləməsinə qədər hər 3 həftədən bir venadaxili verilən 200 mg pembrolizumab ilə kombinasiyada gündə bir dəfə ağızdan 20 mg lenvatinib ilə müalicə edildi.

108 xəstənin 94-də MSI-H və ya dMMR olmayan, 11-də MSI-H və ya dMMR olan şişlər vardı və 3 xəstədə şişin MSI-H və ya dMMR statusu məlum deyildi. Şişin MSI statusu polimeraza zəncirvari reaksiyası testindən istifadə edilərək müəyyən edildi. Şişin dMMR statusu immunohistokimya testi ilə müəyyən edildi.

Əsas effektivlik nəticəsi ölçüləri müstəqil radioloji qiymətləndirmə komitəsinin müəyyən etdiyi obyektiv cavab nisbəti və cavab müddəti idi.

Tədqiqatın nəticələri

• Şişləri MSI-H və ya dMMR olmayan 94 xəstədə obyektiv cavab nisbəti 10 tam cavab (% 10.6) və 26 qismən cavab (% 27.7) ilə ümumilikdə % 38.3 idi.
• Təhlil zamanı median cavab müddətinə çatılmadı və 25 xəstə (cavab verənlərin % 69-u) ən azı 6 ay ərzində bu kombinə müalicəyə cavab verməyə davam etdi.

Bu təsdiqdən əvvəl irəliləmiş mərhələli uşaqlıq xərçəngində 2-ci xətt standart müalicə müxtəlif kimyaterapiya tətbiqləri idi və bu müalicələrlə obyektiv cavab nisbətləri %7-15 aralığında bildirilmişdi. Pembrolizumab və lenvatinib ilə %40-a çatan cavabın görülməsi onkologiya dairələrində olduqca diqqətəlayiq uğur kimi qiymətləndirildi.

Endometrial karsinomada lenvatinib və pembrolizumab üçün ən çox müşahidə olunan yan təsirlər (≥% 20) yorğunluq, hipertoniya, əzələ-skelet sistemi ağrısı, ishal, iştahanın azalması, hipotireoz, ürəkbulanma, stomatit, qusma, çəkinin azalması, qarın ağrısı, baş ağrısı, sidik yolu infeksiyası, disfoniya (səs batması), hemorragik hadisələr (qanaxma), hipomaqnezemiya (qanda maqneziumun aşağı olması), palmar-plantar eritrodizesteziya (ovuc və ayaqaltında səpgi), dispnoe, öskürək və bədəndə səpgi idi.

Endometrial karsinoma üçün tövsiyə olunan doza, hər 3 həftədən bir 30 dəqiqəlik venadaxili infuziya ilə verilən 200 mg pembrolizumab və gündə bir dəfə ağızdan 20 mg lenvatinib şəklindədir.

Aşağıda immun sistemi nəzarət nöqtəsi növündə immunoterapiyalarınindiyədək FDA təsdiqi aldıqları xərçəng növlərini görmək olar: