რა არის MSH2 მუტაცია? რაც უნდა იცოდეთ
ამ სტატიაში
რა არის მემკვიდრეობითი MSH2 მუტაცია? ზოგადი ინფორმაცია მატარებლებისთვის
- MSH2-ის სახელწოდება „MutS homolog 2“-დან მოდის. გენი 2. ქრომოსომაზე მდებარეობს და MSH2 გენის ცილა DNA-ის დაზიანების აღდგენაში მნიშვნელოვან როლს ასრულებს.
- MSH2 გენის მუტაციის მატარებლები შეიძლება როგორც ქალები, ისე კაცები იყვნენ.
- MSH2 გენის მემკვიდრეობითი მუტაციები ლინჩის სინდრომთან არის დაკავშირებული. ლინჩის სინდრომის სხვა სახელებია მემკვიდრეობითი არაპოლიპოზური კოლორექტალური კიბო (HNPCC) და Muir Torre-ს სინდრომი(ლინჩის სინდრომის ქვეტიპი იმ ადამიანებში, რომლებსაც კანის იშვიათი სიმსივნეების განვითარების უფრო მაღალი რისკი აქვთ).
- MSH2 მუტაციის მატარებლებს მრავალი კიბოს უფრო მაღალი რისკი აქვთ, განსაკუთრებით კი მსხვილი ნაწლავის (კოლონისა და სწორი ნაწლავის) და საშვილოსნოს (ენდომეტრიუმის) კიბოს რისკი. MSH2 მუტაციის მქონე ადამიანებისთვის გარკვეული კიბოების სკრინინგისა და პრევენციის სახელმძღვანელო რეკომენდაციები არსებობს.
- MSH2 მუტაციის ტესტის დადებითი შედეგის მქონე ადამიანების მონაწილეობისთვის კლინიკური კვლევები არსებობს. ასევე, მემკვიდრეობითი MSH2 მუტაციის მატარებლებს, რომლებსაც კიბო დაუდგინდათ, გარკვეულ მკურნალობასა თუ კლინიკურ კვლევებში მონაწილეობა შეუძლიათ.
- ბავშვებს, რომლებმაც MSH2 მუტაცია როგორც დედისგან, ისე მამისგან მიიღეს მემკვიდრეობით, „კონსტიტუციური შეუსაბამობების რეპარაციის დეფიციტის“ სახელით ცნობილი ძალიან იშვიათი სინდრომი შეიძლება ჰქონდეთ, რაც ბავშვობასა და მოზარდობაში სხვადასხვა კიბოს მაღალ რისკს შეიძლება ნიშნავდეს.
რომელი კიბოების რისკს ზრდის მემკვიდრეობითი MSH2 მუტაცია?
თუ მემკვიდრეობითი MSH2 მუტაციის ტესტის შედეგი დადებითია, თქვენი და თქვენი ოჯახის კიბოს ისტორიის შემფასებელ და კიბოს რისკის მართვის საუკეთესო გეგმის შერჩევაში დამხმარე მულტიდისციპლინურად მომუშავე ონკოლოგიურ გუნდთან დაკავშირება რეკომენდებულია.
| კიბოს ტიპი | სიცოცხლის განმავლობაში კიბოს რისკი MSH2 მუტაციის მატარებლებისთვის | სიცოცხლის განმავლობაში კიბოს რისკი ზოგადი პოპულაციის ადამიანებისთვის | დიაგნოზის დასმის საშუალო ასაკი MSH2 მუტაციის მატარებლებში | დიაგნოზის დასმის საშუალო ასაკი ზოგადი პოპულაციის ადამიანებისთვის |
| კოლორექტალური | 33 – 52% | 4,2% | 44 წელი | 68 – 72 წელი |
| საშვილოსნო | 21 – 57% | 3,1% | 47 – 48 წელი | 60 წელი |
| საკვერცხე | < % 8 – 38 | 1,3% | 43 წელი | 63 წელი |
| თირკმელი / შარდსაწვეთი | 2,2 – 28% | 1,2% | 54 - 61 წელი | მითითებული არ არის |
| შარდის ბუშტი | 4,4 – 12,8% | 2,4% | 59 წელი | 68 წელი |
| კუჭი | 0,2 – 9% | 0,9% | 52 წელი | 68 წელი |
| წვრილი ნაწლავი | 1,1 – 10% | 0,3% | 48 წელი | 60-იანი – 70-იანი წლები |
| პროსტატა | 3,9 – 15,9% | 11,6% | 59 - 63 წელი | 66 წელი |
| თავის ტვინი | 2,5 – 7,7% | 0,6% | მონაცემები არ არის | 59 წელი |
| სანაღვლე გზები | 0,02 – 1,7% | 0,2% | 57 წელი | 70 – 72 წელი |
ცხრილი: კიბოს რისკები MSH2 მუტაციის მატარებლებისთვის. წყარო: NCCN: Genetic / Familiar High – Risk Assessment: Colorectal Version 1.2020
მემკვიდრეობითი MSH2 მუტაციის მატარებლებს სხვა კიბოების უფრო მაღალი რისკიც შეიძლება ჰქონდეთ. კიბოს შემდეგი ტიპებისთვის ზუსტი რისკები უცნობია:
- პანკრეასის კიბო
- კანის სებაცეური (ცხიმოვანი კისტის) წარმონაქმნები
- ძუძუს კიბო ქალებში
კვლევები გრძელდება იმის შესახებ, თუ როგორ მოქმედებს MSH2 გენის მუტაცია კიბოს რისკზე.
როგორ უნდა იმართებოდეს რისკი მემკვიდრეობითი MSH2 მუტაციის მატარებლებში?
კიბოს ეროვნული ყოვლისმომცველი ქსელი (NCCN) MSH2 მუტაციის მქონე კაცებისა და ქალებისთვის რისკის მართვის სახელმძღვანელო რეკომენდაციებს იძლევა. გირჩევენ დაუკავშირდეთ მულტიდისციპლინურად მომუშავე ონკოლოგიურ გუნდს, რომელსაც შეუძლია თქვენი და თქვენი ოჯახის კიბოს ისტორიის შეფასება და რისკის მართვის საუკეთესო გეგმის განსაზღვრაში დახმარება.
MSH2 მუტაციის მატარებლებისთვის NCCN-ის რისკის მართვის სახელმძღვანელო რეკომენდაციები კიბოს შემდეგი ტიპების შესახებ ინფორმაციას შეიცავს:
- კოლორექტალური კიბო
- საშვილოსნოს კიბო
- საკვერცხის კიბო
- პანკრეასის კიბო
- საშარდე გზების კიბო
- თავის ტვინის კიბო
- კუჭის კიბო
- ძუძუს კიბო
კოლორექტალური კიბო
- ჩაიტარეთ კოლონოსკოპია 20 -25 წლის ასაკში (ან, თუ დიაგნოზი 25 წლამდე დაისვა, ოჯახში კოლონის კიბოს ყველაზე ადრეული დიაგნოზის ასაკზე 2 -5 წლით ადრე).
- გაიმეორეთ კოლონოსკოპია ყოველ 1 – 2 წელიწადში. ექიმს ესაუბრეთ იმაზე, სკრინინგი ყოველწლიურად უნდა ჩატარდეს თუ ორ წელიწადში ერთხელ. ყოველწლიური სკრინინგისგან ყველაზე მეტი სარგებელი შეიძლება მიიღონ კაცებმა, 40 წელზე უფროსმა ადამიანებმა და მათ, ვისაც კოლონის კიბოს ან კოლონის პოლიპების ისტორია აქვს.
- ასპირინის ყოველდღიურმა მიღებამ შეიძლება კოლორექტალური კიბოს რისკი შეამციროს. ასპირინის საუკეთესო დოზა და დრო უცნობია. მიმდინარე კვლევებმა აჩვენა, რომ ყოველდღიურად 600 mg ასპირინის მიღება ლინჩის სინდრომის მქონე ადამიანებში კოლორექტალური კიბოს რისკს ამცირებს. სარგებლისა და რისკების, საუკეთესო დროისა და დოზის შესახებ ექიმს ესაუბრეთ.
საშვილოსნოს კიბო
- სიმპტომების ცოდნა და ბიოფსია: საშვილოსნოს კიბოს ადრეულად გამოვლენა ხშირად შეიძლება სიმპტომების საფუძველზე, რომლებსაც ბიოფსია მოჰყვება. ამიტომ ექსპერტები ყველა ქალს ურჩევენ, იცოდეს საშვილოსნოს კიბოს სიმპტომები და ნებისმიერი ხანგრძლივად მიმდინარე გამოვლინება დაუყოვნებლივ აცნობოს ექიმს.
- უჩვეულო ვაგინალური გამონადენი
- მენჯის ან მუცლის ტკივილი
- მუცლის შებერვა
- ჭამის გაძნელება
- შარდის ბუშტის ხშირი გადავსების შეგრძნება
- სკრინინგი: სიმპტომების არარსებობისას ტრანსვაგინალური ულტრაბგერითი კვლევით და / ან ენდომეტრიუმის ბიოფსიით საშვილოსნოს კიბოს რეგულარულ სკრინინგს, როგორც ჩანს, უკეთესი შედეგები არ მოაქვს, ვიდრე სიმპტომების ცოდნასა და სიმპტომიანი ნებისმიერი ქალისთვის ბიოფსიის შემდგომ ჩატარებას. მიუხედავად ამისა, ზოგიერთი ქალი რეგულარულ სკრინინგს ტრანსვაგინალური ულტრაბგერითი კვლევითა და ენდომეტრიუმის ბიოფსიით იტარებს. ტრანსვაგინალური ულტრაბგერითი კვლევა პრემენოპაუზურ ქალებში რეკომენდებული არ არის. სკრინინგის შესახებ გადაწყვეტილების მისაღებად ქალებმა ექიმს უნდა ესაუბრონ ტრანსვაგინალური ულტრაბგერითი კვლევისა და ენდომეტრიუმის ბიოფსიის სარგებელზე, რისკებზე, ღირებულებასა და ჩატარების დროზე.
- ქირურგია: საშვილოსნოს ამოკვეთა (ჰისტერექტომია) ლინჩის სინდრომის მქონე ქალებში საშვილოსნოს კიბოს რისკს ამცირებს. თუმცა არ არის ნაჩვენები, რომ ჰისტერექტომია საშვილოსნოს კიბოთი სიკვდილის რისკს ამცირებს. ბავშვების აღზრდის დასრულების შემდეგ ქალებმა ექიმს უნდა ესაუბრონ ჰისტერექტომიის სარგებელსა და რისკებზე. ოპერაციის საუკეთესო დრო შეიძლება გენის მუტაციისა და ოჯახში კიბოს ისტორიის მიხედვით განსხვავდებოდეს.
- მედიკამენტური მკურნალობა: პერორალურმა კონტრაცეპტივებმა (ჩასახვის საწინააღმდეგო წამლებმა) ლინჩის სინდრომის მქონე ქალებში შეიძლება საშვილოსნოს კიბოს რისკი შეამციროს. კონტრაცეპტივების სარგებლის, რისკებისა და მიღების დროის შესახებ ქალებმა ექიმს უნდა ესაუბრონ.
საკვერცხის კიბო
- ქირურგია: საკვერცხეებისა და ფალოპის მილების ამოკვეთამ (სალპინგო – ოოფორექტომიამ) ლინჩის სინდრომის მქონე ქალებში შეიძლება საკვერცხის კიბოს რისკი შეამციროს. ბავშვების აღზრდის დასრულების შემდეგ ქალებმა ექიმს უნდა ესაუბრონ სალპინგო – ოოფორექტომიის სარგებელსა და რისკებზე. ოპერაციის საუკეთესო დრო გენის მუტაციისა და ოჯახში კიბოს ისტორიის მიხედვით განსხვავდება.
- სიმპტომების ცოდნა: ექსპერტები ყველა ქალს ურჩევენ, იცოდეს საკვერცხის კიბოს სიმპტომები. ქალებმა ექიმს უნდა აცნობონ ქვემოთ ჩამოთვლილი ნებისმიერი სიმპტომის შესახებ, რომელიც რამდენიმე კვირა გრძელდება, და ჩვეულებრივისგან განსხვავებული მდგომარეობების შესახებ:
- მენჯის ან მუცლის ტკივილი
- მუცლის შებერვა
- ჭამის გაძნელება
- სწრაფად დანაყრების შეგრძნება
- შარდის ბუშტის ხშირი გადავსების შეგრძნება
- სკრინინგი: სიმპტომების არარსებობისას რეგულარულ სკრინინგს ტრანსვაგინალური ულტრაბგერითი კვლევითა და სისხლში CA125-ის ტესტებით იტარებს. თუმცა საკვერცხის კიბოს სკრინინგი საკვერცხის კიბოს ადრეულ გამოვლენას არ ეხმარება. ქალები, რომლებიც ოპერაციას არ გეგმავენ, ექიმს უნდა ესაუბრონ ტრანსვაგინალური ულტრაბგერითი კვლევისა და CA125-ის სარგებელზე, რისკებზე, ღირებულებასა და ჩატარების დროზე.
- მედიკამენტური მკურნალობა: პერორალურმა კონტრაცეპტივებმა (ჩასახვის საწინააღმდეგო წამლებმა) ლინჩის სინდრომის მქონე ქალებში შეიძლება საშვილოსნოს კიბოს რისკი შეამციროს. კონტრაცეპტივების სარგებლის, რისკებისა და მიღების დროის შესახებ ქალებმა ექიმს უნდა ესაუბრონ.
პანკრეასის კიბოს სკრინინგი ოჯახური ისტორიის მქონე ადამიანებში
- MSH2 მუტაციის მატარებლებმა, რომლებსაც პანკრეასის კიბოს მქონე პირველი ან მეორე ხარისხის ნათესავი ჰყავთ, სკრინინგის ჩატარება 50-იანი წლების დასაწყისში ან ნათესავის დიაგნოზის ასაკზე 10 წლით ადრე უნდა განიხილონ.
- მათთვის, ვინც პანკრეასის კიბოს სკრინინგს განიხილავს, US-NCCN რეკომენდაციას იძლევა, რომ სკრინინგი გამოცდილ დაწესებულებაში და, იდეალურ შემთხვევაში, კვლევის პირობებში ჩატარდეს. სკრინინგის ჩატარებამდე ადამიანებმა ექიმს უნდა ესაუბრონ სკრინინგის სარგებელზე, რისკებზე, ღირებულებასა და შეზღუდვებზე.
- განიხილეთ ყოველწლიური სკრინინგი კონტრასტული MRI-MRCP-ით (მაგნიტურ-რეზონანსული ქოლანგიოპანკრეატოგრაფია) და / ან EUS-ით (ენდოსკოპიური ულტრაბგერითი კვლევა).
შარდის ბუშტის, თირკმლისა და შარდსაწვეთის კიბო
- განიხილეთ შარდის ყოველწლიური ანალიზის დაწყება 30 – 35 წლის ასაკში, განსაკუთრებით კაცებისა და საშარდე გზების კიბოს ოჯახური ისტორიის მქონე ადამიანებისთვის.
თავის ტვინის კიბო
- განიხილეთ ფიზიკური და ნევროლოგიური გამოკვლევების დაწყება 25 – 30 წლის ასაკში.
კუჭის კიბო
- კუჭის კიბოს ოჯახური ისტორიის მქონე და / ან აზიური წარმოშობის ადამიანებისთვის:
- განიხილეთ კუჭის კიბოს სკრინინგი 40 წლის ასაკში, ყოველ 3 – 5 წელიწადში, მეთოდით, რომელსაც EGD (esophagogastroduodenocopy – ეზოფაგოგასტროდუოდენოსკოპია (ÖGD)) ეწოდება.
- თუ კუჭის სკრინინგი ტარდება, H. Pylori-ის ტესტირება და მკურნალობა განიხილეთ.
ძუძუს კიბო
- ძუძუს კიბოს რისკი ოჯახური ისტორიის საფუძველზე მართეთ. რისკის შემამცირებელი მასტექტომია (ძუძუების ქირურგიული ამოკვეთა), როგორც წესი, რეკომენდებული არ არის.
სხვა კიბოების სკრინინგი და პრევენცია
სახელმძღვანელო რეკომენდაციებში MSH2 მუტაციის მქონე ადამიანებისთვის სხვა კიბოების სკრინინგისა და პრევენციის შესახებ ინფორმაცია მოცემული არ არის. თუმცა კლინიკური კვლევები შეიძლება არსებობდეს.
კიბოს მკურნალობა MSH2 მუტაციის მქონე ადამიანებში
ექსპერტები მემკვიდრეობითი MSH2 მუტაციის მატარებლებისთვის საუკეთესო მკურნალობის შესასწავლად კვლევებს ატარებენ.
მემკვიდრეობითი MSH2 მუტაციის მატარებლებში კიბოების უმეტესობას „MSI – high“ ან „MSI – H“ (მიკროსატელიტური არასტაბილურობის) სახელით ცნობილი სიმსივნური ბიომარკერი ექნება. ეს ბიომარკერი ასევე ცნობილია, როგორც „MMR – D“ (შეუსაბამობების რეპარაციის დეფიციტი). სიმსივნის ტესტირება MMR – D-ზე ან MSI – high-ზე შეიძლება მნიშვნელოვანი იყოს, რადგან ეს სიმსივნეები უფრო დიდი ალბათობით პასუხობს იმუნური საკონტროლო წერტილების ინჰიბიტორების სახელით ცნობილ იმუნოთერაპიის აგენტებს.
MSI – H კოლორექტალური კიბო
- 2. სტადიის კოლორექტალური კიბოს მქონე ადამიანებში MSI – high კიბოებს კარგი პროგნოზი (დაავადების მიმდინარეობა) აქვს და მათ შეიძლება 5 – ფლუოროურაცილით ადიუვანტური თერაპიისგან (კოლორექტალურ კიბოში გამოყენებული იმუნოთერაპია) სარგებელი ვერ მიიღონ.
- Keytruda (პემბროლიზუმაბი), იმუნური საკონტროლო წერტილის ინჰიბიტორია, რომელიც ფლუოროპირიმიდინით, ოქსალიპლატინითა და ირინოტეკანით მკურნალობის შემდეგ პროგრესირებული მეტასტაზური ან გავრცელებული კოლორექტალური კიბოს სამკურნალოდ გამოიყენება.
- Opdivo (ნივოლუმაბი), იმუნური საკონტროლო წერტილის ინჰიბიტორის სახით დამტკიცებულია ფლუოროპირიმიდინით, ოქსალიპლატინითა და ირინოტეკანით მკურნალობის შემდეგ პროგრესირებული მეტასტაზური კიბოსთვის, Yervoy-სთან (იპილიმუმაბთან) კომბინაციაში ან ცალკე გამოყენებით.
იმუნური საკონტროლო წერტილების ინჰიბიტორები ნებისმიერი MSI – H კიბოს სამკურნალოდ
- Keytruda (პემბროლიზუმაბი) დამტკიცდა ნებისმიერი MSI – H-ის მქონე სოლიდური (ორგანოს) სიმსივნის სამკურნალოდ, რომელიც მკურნალობის შემდეგ პროგრესირებს და რომლისთვისაც სხვა სამკურნალო არჩევანი არ არსებობს.
სხვა სამედიცინო საკითხები მემკვიდრეობითი MSH2 მუტაციის მატარებლებისთვის
MSH2 გენის ზოგიერთი მუტაცია ლინჩის სინდრომის ქვეტიპს იწვევს, რომელსაც ზოგჯერ Muir – Torre-ს სინდრომს უწოდებენ. ლინჩის სინდრომთან დაკავშირებული კიბოების გაზრდილი რისკის გარდა, Muir – Torre-ს სინდრომის მქონე ადამიანებს კანის უფრო იშვიათი სიმსივნეების განვითარების მაღალი რისკი აქვთ. კანის ეს იშვიათი სიმსივნეები სებაცეურ ადენომებსა და კარცინომებს მოიცავს, რომლებიც ცხიმოვანი ნივთიერების, სებუმის (ცხიმოვანი ჯირკვლების), წარმომქმნელ ჯირკვლებში ვითარდება. შეიძლება მრავალი სწრაფად მზარდი სიმსივნეც წარმოიქმნას, რომლებსაც კერატოაკანთომები ეწოდება, განსაკუთრებით მზის ზემოქმედების ქვეშ მყოფ კანზე. ოჯახში კანის ამ სიმსივნეების მქონე ადამიანის არსებობის მიუხედავად, მემკვიდრეობითი MSH2 მუტაციის ყველა მატარებლისთვის რეკომენდებულია დერმატოლოგის მიერ კანის ყოველწლიური გამოკვლევა.
ბავშვებს, რომლებმაც MSH2 მუტაცია როგორც დედისგან, ისე მამისგან მიიღეს მემკვიდრეობით, “კონსტიტუციური შეუსაბამობების რეპარაციის დეფიციტის (CMMRD)” სახელით ცნობილი ძალიან იშვიათი სინდრომი შეიძლება ჰქონდეთ. CMMRD ბავშვობასა და მოზარდობაში სხვადასხვა კიბოს მაღალ რისკს შეიძლება ნიშნავდეს. CMMRD სინდრომის მქონე ბავშვებს შეიძლება სისხლის (ჰემატოლოგიური) და თავის ტვინის / ცენტრალური ნერვული სისტემის სიმსივნეები ჰქონდეთ, ხოლო ლინჩის სინდრომის მქონე უფრო ხანდაზმულ პაციენტებში, როგორც წესი, კოლორექტალური და სხვა ტიპის კიბოები გვხვდება. CMMRD-ის მქონე პაციენტების უმეტესობა, თუმცა არა ყველა, ჰგავს ნეიროფიბრომატოზს, გენეტიკურ დარღვევას, რომელიც ნერვულ ქსოვილზე სიმსივნეების წარმოქმნას იწვევს; ეს განსაკუთრებით უვნებელი, კანზე ღია ყავისფერი, „café au lait“-ს შეფერილობის ლაქებით ვლინდება. ბავშვს CMMRD სინდრომი რომ ჰქონდეს, მის დედასაც და მამასაც MSH2 მუტაცია უნდა ჰქონდეს. თუ წყვილის ერთ წევრს ცნობილი მუტაცია აქვს, ბავშვების ყოლამდე წყვილს შეიძლება სურდეს გენეტიკურ კონსულტანტთან საუბარი მეორე წევრის ტესტირების შესახებ.
მშობლებს მემკვიდრეობითი MSH2 მუტაციების არმქონე ემბრიონების შესარჩევად დამხმარე რეპროდუქციული ტექნოლოგიის და პრეიმპლანტაციური გენეტიკური დიაგნოსტიკის გამოყენების შესაძლებლობა აქვთ.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.