შეიძლება რადიოთერაპიამ კიბოს ვაქცინის ეფექტი შექმნას?
ამ სტატიაში
2017 წლის სან-ანტონიოს ძუძუს კიბოს სიმპოზიუმზე წარმოდგენილი კვლევის მიხედვით, რადიოთერაპიით სიმსივნის უბნის დასხივება უჯრედში სიმსივნური დნმ-ის ფრაგმენტების დაგროვებას იწვევს და ერთგვარი კიბოს ვაქცინის ეფექტს ქმნის.
რა არის კიბოს ვაქცინა და როგორ მოქმედებს?
არსებობს 2 ტიპი: პროფილაქტიკური და სამკურნალო.
პროფილაქტიკური კიბოს ვაქცინები, ათწლეულებია წარმატებით გამოიყენება და შესაბამის მიკრობებს ეფექტიანად აცილებს. მაგალითად, B ჰეპატიტის HBV ვაქცინა ღვიძლის კიბოსგან, ადამიანის პაპილომავირუსის საწინააღმდეგო HPV ვაქცინა კი საშვილოსნოს ყელის კიბოსგან ძლიერ დაცვას იძლევა.
სამკურნალო (თერაპიული) კიბოს ვაქცინების ეფექტიანი სახეობები შედარებით ახალია. დღემდე მხოლოდ 2 დამტკიცებული ვაქცინაა: პროსტატის კიბოსთვის sipuleucel-T (Provenge) და კანის ავთვისებიანი მელანომისთვის talimogene laherparepvec (Lmlygic). ისინი შესაბამის კიბოებში სრულ განკურნებას არ გვპირდება; ამიტომ სამკურნალო ვაქცინები პროფილაქტიკურივით ეფექტიანი არ არის. კიბოს წარმოქმნამდე აცილება მკურნალობაზე ადვილია! კვლავ პოპულარული კუბური კიბოს ვაქცინები მნიშვნელოვან ეფექტიანობას ვერ აჩვენებს და დღემდე არცერთი კიბოსთვის გამოყენების თანხმობა არ მიუღია.
სამკურნალო ვაქცინა იმუნიტეტს სიმსივნის შემჩნევასა და მის წინააღმდეგ გააქტიურებაში ეხმარება. კიბოს მიზეზი მეტად სიმსივნის მიერ იმუნიტეტისგან დამალვის მექანიზმების განვითარებაა, ვიდრე უბრალოდ იმუნიტეტის დასუსტება. თუ კიბო, იმუნოთერაპიის მსგავსი ჩარევით, იმუნიტეტისთვის შესამჩნევი გახდა, მკურნალობა ადვილდება. ვაქცინები იმუნოთერაპიის მხოლოდ ერთი სახეა (იხილეთ გრაფიკი ქვემოთ).
როგორ მოქმედებს დასხივება ვაქცინასავით?
დასხივება უჯრედის სიკვდილს იწვევს, ხოლო სიმსივნური დნმ-ის ფრაგმენტებსა და სხვა ნაწილებს დამცავი T უჯრედების გარემოში მიზიდვა ან გააქტიურება შეუძლია. ჩვეულებრივ, სიმსივნის მიკროგარემოში მიძინებული ან სიმსივნესთან შეთანხმებული დამცავი უჯრედები დასხივებით ისევ ორგანიზმის სასარგებლოდ ამოქმედდება.
უჯრედული კულტურების, თაგვის მოდელებისა და ადრეული ადამიანური კვლევების მიხედვით;
- მზარდი დოზით დასხივებულ უჯრედებში ორჯაჭვიანი სიმსივნური დნმ-ის ფრაგმენტები ციტოპლაზმაში გროვდებოდა,
- დეფექტური ფრაგმენტები აღდგენის სისტემის ეგზონუკლეაზა 1 (Trex 1) ფერმენტს ააქტიურებდა,
- ეს კი ინტერფერონ ბეტას (INFb) გზით იმუნიტეტს აღძრავდა.
ასე რადიოთერაპია, in situ კიბოს ვაქცინას ჰგავს; ამას „აბსკოპალური იმუნოგენურობაც“ ეწოდება.
ამის საფუძველზე ჯგუფმა 4. სტადიის არაწვრილუჯრედოვანი ფილტვის კიბოსთვის ახალი იმუნოპრეპარატის იპილიმუმაბის (Yervoy) და რადიოთერაპიის კომბინირებული კლინიკური კვლევა დაიწყო.
დამატებითი კვლევები ადგენს, რომელ კიბოში და რა თანმიმდევრობით იქნება მიდგომა ყველაზე სასარგებლო.
წყაროები
Potential of radiation therapy to convert the tumor into an in situ vaccine.
Oral Presentation at: 2017 San Antonio Breast Cancer Symposium; December 5-9, 2017
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.