შესაძლებელია ჰორმონდადებითი ძუძუს კიბოს 4. სტადიის მკურნალობა ქიმიოთერაპიის გარეშე?

ESMO 2017-ზე აბემაციკლიბის წარმატებული შედეგები გამოცხადდა.

ჰორმონდადებითი, Her2 რეცეპტორის მხრივ უარყოფითი, მეოთხე სტადიის ძუძუს კიბოს მკურნალობაში ქიმიოთერაპია დღეს ხშირად არჩეული მკურნალობაა. მცირე მოცულობის, ანუ მცირე რაოდენობის მეტასტაზების მქონე, ხანდაზმული და ცუდი ზოგადი მდგომარეობის პაციენტების გარდა, მსოფლიოში მკურნალობა ჩვეულებრივ ქიმიოთერაპიით იწყება, ხოლო კარგად მიმდინარე და პასუხის მქონე პაციენტებში ჰორმონული თერაპიით გრძელდება.

ამ პაციენტებში, განსაკუთრებით თუ ღვიძლის, ფილტვისა თუ ტვინის აგრესიული მეტასტაზები არ არსებობს, ქიმიოთერაპიის გვერდითი მოვლენები ხშირია და ეფექტიანობაც დამაკმაყოფილებელი არ არის. ამ ჯგუფისთვის, განსაკუთრებით მენოპაუზის შემდგომი ჰორმონრეცეპტორდადებითი მეტასტაზური ძუძუს კიბოს პაციენტებისთვის, ბოლო სამი წლის განმავლობაში მეტად სასიხარულო მეცნიერული მიღწევები მოხდა.

კიბოს უჯრედშიდა ზრდის სასიგნალო გზების ციკლინდამოკიდებული 4/6 კინაზის მაბლოკირებელი წამლების ჰორმონულ თერაპიასთან კომბინაციამ მკურნალობის წარმატება მნიშვნელოვნად გაზარდა. ამ წამლებიდან პირველი, Palbociclib, PALOMA 1-3 კვლევებში თავდაპირველად უკვე ნამკურნალებ და უპასუხო პაციენტებში გამოსცადეს. წარმატებული შედეგების შემდეგ მეტასტაზური პაციენტების პირველი არჩევანის მკურნალობად ჰორმონულ თერაპიასთან კომბინაციაში Pablociclib გამოიყენეს. ეფექტიანი და რუტინული პრაქტიკის შეცვლის უნარის მქონე კვლევის მონაცემებით მან FDA-ის დამტკიცება მიიღო. Palbociclib-ის შემდეგ მსგავსი სტრატეგიებით MONOLEESA 1-2 კვლევებში Ribociclib სახელწოდების ციკლინდამოკიდებული კინაზის 4/6 ინჰიბიტორი გამოსცადეს. წარმატებული შედეგებით იგი 2017 წელს ამ სფეროში FDA-ის მიერ დამტკიცებული მეორე დადასტურებულად ეფექტიანი პრეპარატი გახდა. მესამე თაობის Abemaciclib პირველ ორ წამალს მსგავსი გზით MONRCH 1-2 კვლევებში გაჰყვა და წარმატების შემდეგ ESMO 2017-ზე ჩატარებული MONARCH 3 კვლევის შედეგები გამოცხადდა. მენოპაუზის შემდგომ ძუძუს კიბოს პაციენტებს, ჰორმონრეცეპტორდადებითი, Her2 რეცეპტორუარყოფითი დაავადებით, ახლად დიაგნოსტირებული მეტასტაზებით და წინასწარი მკურნალობის გარეშე, მიეცათ კარგად ცნობილი და ხშირად გამოყენებული ჰორმონული წამლები ანასტროზოლი და ლეტროზოლი ; ერთ ჯგუფს აბემაციკლიბიც დაუმატეს, მეორეს კი პლაცებო, ანუ მოჩვენებითი წამალი. 328 პაციენტს Abemaciclib-თან კომბინირებული ჰორმონული თერაპია მიეცა, ხოლო 165 პაციენტს — კლასიკური ჰორმონული თერაპია და პლაცებო.

კვლევის გამოცხადებული წინასწარი შედეგებით Abemaciclib-მა დაავადების პროგრესირების რისკი %46-ით შეამცირა. გაზომვადი კერების რეგრესიის მაჩვენებელი Abemaciclib-ის მიმღებებში %59 იყო, კლასიკური მკურნალობის ჯგუფში კი %44. გვერდითი მოვლენები მართვადად შეფასდა. პირველ ორ ციკლინკინაზის 4/6 ინჰიბიტორთან შედარებით Abemaciclib-ისას დიარეა უფრო ხშირი იყო, ხოლო სისხლში ნეიტროფილების (სისხლის თეთრი, დამცავი უჯრედების) დონის დაქვეითება სხვა წამლებთან შედარებით ნაკლებად აღინიშნა. კვლევის დაკვირვების ხანგრძლივობა ჯერ საკმარისი არ არის Abemaciclib-ის ჯგუფში პროგრესირებამდე დროისა და ორივე ჯგუფის საერთო გადარჩენის სრულად შესადარებლად.

მსოფლიო ონკოლოგიურმა ავტორიტეტებმაც ეს მიღწევა შთამბეჭდავად შეაფასეს და აღნიშნეს, რომ ძუძუს კიბოს ამ ჯგუფში ქიმიოთერაპიას თანდათან ანაცვლებს ახალი მიზნობრივი პრეპარატები, რომლებსაც ჭკვიან წამლებს უწოდებენ.

ამ კვლევის გრძელვადიან შედეგებს თქვენთვის თვალს მივადევნებთ და გაგიზიარებთ.