4. mərhələ hormon pozitiv süd vəzi xərçəngi kimyaterapiyasız müalicə oluna bilərmi?

ESMO 2017-də Abemaciclib-in uğurlu nəticələri açıqlandı.

Hormon pozitiv, Her2 reseptoru neqativ, dördüncü mərhələ süd vəzi xərçənginin müalicəsində kimyaterapiya bu gün tez-tez seçilən müalicədir. Aşağı həcmli, yəni az miqdarda metastazı olan, yaşlı və ümumi vəziyyəti yaxşı olmayan süd vəzi xərçəngi xəstələrindən başqa, dünyada müalicə seçimi kimyaterapiya ilə başlanıb prosesi yaxşı gedən və cavab alınan xəstələrdə hormonal müalicə ilə davam etmək şəklindədir.

Bu xəstə qrupunda xüsusilə aqressiv qaraciyər, ağciyər, beyin metastazları yoxdursa, kimyaterapiyanın yan təsir nisbəti yüksək, təsiri isə məmnunedici səviyyədə deyil. Bu qrup, xüsusilə menopauzadan sonrakı hormon reseptoru pozitiv metastatik süd vəzi xərçəngi xəstələri üçün son üç ildə çox sevindirici elmi inkişaflar olmuşdur.

Xərçəng hüceyrədaxili böyümə siqnalı yollarından siklindən asılı 4/6 kinazanı bloklayan dərmanların hormonal müalicələrlə kombinasiyası müalicə uğurunu nəzərəçarpacaq artırdı. Bu dərmanlardan ilki Palbociclib PALOMA 1-3 tədqiqatlarında əvvəl müalicə almış və cavabsız xəstələrdə sınandı. Uğurlu nəticələrdən sonra metastatik xəstələrdə ilk seçim kimi hormonal müalicə ilə birlikdə Pablociclib istifadə edildi. Təsirli və gündəlik praktikanı dəyişdirə biləcək gücdə tədqiqat məlumatları ilə FDA təsdiqi aldı. Palbociclib-dən sonra oxşar strategiyalarla MONOLEESA 1-2 tədqiqatlarında Ribociclib adlı siklindən asılı kinaza 4/6 bloklayıcı dərman sınandı. Uğurlu nəticələri ilə 2017-də bu sahədə FDA təsdiqi alan, təsiri sübut olunmuş ikinci dərman oldu. Üçüncü nəsil Abemaciclib ilk iki dərmana bənzər yolları MONRCH 1-2-də izləyib uğurlu sayıldıqdan sonra ESMO 2017-də MONARCH 3 tədqiqatının nəticələri açıqlandı. Hormon reseptoru pozitiv, Her2 reseptoru neqativ, metastaz diaqnozu yeni qoyulmuş və müalicə almamış, menopauzadan sonrakı süd vəzi xərçəngi xəstələrinə yaxşı tanınan və tez-tez istifadə etdiyimiz Anastrazol və Letrozol adlı hormonal dərmanlarla bir qrupda abemaciclib əlavə edildiyi halda, digər qrupa plasebo, yəni saxta dərman verilmişdir. 328 xəstəyə Abemaciclib ilə kombinə hormonal müalicə, 165 xəstəyə isə klassik hormonal müalicə və plasebo verilmişdir.

Tədqiqatın açıqlanan ilkin nəticələrinə görə Abemaciclib-in xəstəliyin irəliləmə riskini %46 azaltdığı müəyyən edilmişdir. Ölçülə bilən lezyonlarda geriləmə nisbəti Abemaciclib alanlarda %59, klassik müalicə qolunda %44 olmuşdur. Yan təsirlər idarəolunan sayılmışdır. İlk iki siklin kinaza 4/6 bloklayıcısı ilə müqayisədə Abemaciclib-də daha çox ishal görülsə də, digər dərmanlara nisbətən qanda neytrofil (ağ qan, müdafiə hüceyrələri) səviyyəsinin azalması daha az müşahidə edilmişdir. Tədqiqatın izləmə müddəti Abemaciclib qolunda xəstəliyin irəliləməsinə qədər müddəti və iki qrupun ümumi sağqalmasını tam müqayisə etmək üçün hələ yetərli deyil.

Dünya onkologiya qurumları da bu inkişafı diqqətçəkən saymış və süd vəzi xərçənginin bu qrupunda kimyaterapiyanın hər gün yerini ağıllı dərman adlandırılan yeni hədəfə yönəlmiş preparatlara verdiyini bildirmişlər.

Bu tədqiqatın uzunmüddətli nəticələrini sizin üçün izləyib paylaşacağıq.