უფრო ჭკვიანი კურკუმინის (კურკუმის) თაღლითობა
ამ სტატიაში
ქვემოთ მოყვანილი ტექსტი თარგმნილია „ტრადიციული, დამატებითი და ალტერნატიული მკურნალობის“ მსოფლიოში წამყვანი წარმომადგენლის, პროფესორ დოქტორ Edzard Ernst-ის მიერ 23 ივლისს, 2019 წელს ონლაინ გამოქვეყნებული სტატიიდან „Smarter Curcumin for dummer consumers?“.
მტკიცებები კურკუმის (კურკუმინის) შესახებ
ხელს უწყობს კომფორტსა და მოქნილობას
კვლევებმა აჩვენა, რომ კურკუმინს(ბიოლოგიურად აქტიურ ნივთიერებას, რომელიც კურკუმის მცენარის %2-ს შეადგენს) ორგანიზმში ანთების გამაძლიერებელი ზოგი ძირითადი ფერმენტის შემცირება შეუძლია. ზოგ კვლევაში კურკუმინი განიხილება ბუნებრივი დანამატის ალტერნატივად, რომელსაც კომფორტისა და მოქნილობის გაზრდაში წვლილი შეაქვს. სპორტსმენებიც კი იყენებენ მას კუნთებისა და სახსრების ჯანმრთელობის გასაუმჯობესებლად.
ხელს უწყობს სახსრების ჯანმრთელობას
ანტიოქსიდანტები სახსრების ჯანმრთელობის შენარჩუნებაში მონაწილეობს. ორგანიზმი ანტიოქსიდანტებს თავისუფალ რადიკალებთან საბრძოლველად იყენებს. თავისუფალი რადიკალები სხეულში მილიონობით ქიმიური რეაქციის შედეგად წარმოქმნილი არასტაბილური ნაწილაკებია. მათ შეუძლიათ ოქსიდაციური სტრესისა და უჯრედულ დონეზე დაზიანების გამოწვევა. მეცნიერებმა შენიშნეს სახსრების აქტივობის ზრდა და ანტიოქსიდანტების დონის დაქვეითება. კურკუმინი ანტიოქსიდანტებით მდიდარია და შესაძლოა ჯანმრთელობას წაადგეს.
დაბერების საწინააღმდეგო
კურკუმინი DNA-სდამაზიანებელი, დამანგრეველი და ნაადრევი დაბერების გამომწვევი თავისუფალი რადიკალების შემცირებასა და განეიტრალებაში მონაწილეობს. ეს კურკუმინს ხანდაზმული ადამიანებისთვის მნიშვნელოვან ყოველდღიურ დანამატად აქცევს.
ჯანსაღი იმუნური სისტემა
თქვენი იმუნური სისტემა ქსელია, რომელშიც სხვადასხვა ორგანო, ქსოვილი და უჯრედი თქვენი სხეულის დასაცავად ერთად მუშაობს. კურკუმინი არა მხოლოდ იმუნურ სისტემაში ზოგი ანტისხეულისა და უჯრედის პასუხის გაძლიერებას ეხმარება, არამედ ზოგი პროანთებითი ნივთიერების აქტივობის შემცირებასაც უწყობს ხელს.
ხელს უწყობს გულის ჯანმრთელობას
ჯანსაღი გული განსაკუთრებით ჯანსაღი კვებისა და რეგულარული ვარჯიშის მსგავსი ფაქტორებით მიიღწევა. ჯანსაღი კვების ნაწილის სახით რაციონში კურკუმინის დამატება გულის დასაცავად სასარგებლო შეიძლება იყოს. დაჟანგულ LDL ნაწილაკებს (დაბალი სიმკვრივის ლიპოპროტეინი, ცუდი ქოლესტერინი) გულ-სისხლძარღვთა სისტემაში ანთების გამოწვევა შეუძლიათ. კვლევები აჩვენებს, რომ კურკუმინის ანტიოქსიდანტური ეფექტები ამ თავისუფალ რადიკალებთან ბრძოლაში შეიძლება დაგვეხმაროს.
აუმჯობესებს საჭმლის მომნელებელ სისტემას
ნაჩვენებია, რომ კურკუმინი ამშვიდებს საჭმლის მომნელებელ სისტემას და ხელს უწყობს აირების, შებერილობისა და კუჭ-ნაწლავის სხვა პრობლემების შემსუბუქებას. პრობიოტიკებისგანან ფერმენტებისგან განსხვავებულად მოქმედებს. ბუნებრივად ამშვიდებს ნაწლავებს და ჭარბი მჟავის წარმოქმნას ამცირებს.
ხელს უწყობს ღვიძლის ჯანმრთელობას
ღვიძლი სხეულის წონასწორობის შენარჩუნებაში მნიშვნელოვან როლს ასრულებს. მისი ჯანმრთელობა პირდაპირ შეიძლება უკავშირდებოდეს ოქსიდაციურ სტრესსა და პროანთებით ნივთიერებებს. კურკუმინი შესაძლოა ეფექტიანი იყოს ღვიძლის ტოქსიკურობის შემცირებასა და წონასწორობის აღდგენაში.
ხელს უწყობს ტვინის ჯანმრთელობას
ანთებასა და კოგნიტიურ ჯანმრთელობას შორის კავშირი უდავოა. ნეირონები ანთებისადმი განსაკუთრებით მგრძნობიარეა და სხეულში ანთებითი ნაერთების გამოყოფამ შეიძლება ნეიროტოქსიკური ეფექტი გამოიწვიოს. კურკუმინი შესაძლოა ამ ღირებული ტვინის უჯრედების დაცვას დაეხმაროს.
ფაქტები კურკუმის (კურკუმინის) შესახებ
პროფ. დოქტორი დოქტორი Edzard ERNST ამბობს: აქ ჩემი გაოცების მიზეზი კურკუმინის სამკურნალო მტკიცებების სიმრავლე არ არის. რამდენადაც ვხედავ, ამ მტკიცებების უმეტესობა იმით, რასაც სამეცნიერო მტკიცებულებას ვუწოდებ, არ დასტურდება; მორთული და ფსევდომეცნიერული არგუმენტებით მტკიცება ბევრია, მაგრამ ძლიერი სამეცნიერო მტკიცებულება არ არსებობს. ყალბი მტკიცებები უკვე ისე ხშირად გვხვდება!
ამ სტატიაში უჩვეულო გამოსახულებაა, რომელიც პირდაპირ ჩვენი ყურადღების მისაქცევადაა შექმნილი (ზემოთ, მასალის სურათი). ბევრს შეიძლება წარმოდგენაც არ ჰქონდეს, რას გადმოსცემს ის სისხლძარღვში მორბენალი ლეოპარდის გარდა. სხვები მიხვდებიან, რომ გარემო არტერიაა, და იფიქრებენ, რომ მორბენალი ლეოპარდი სისხლძარღვში სისხლის ნაკადს აძლიერებს.
მაგრამ რატომ? არ არსებობს მტკიცებულება, რომ კურკუმინს ასეთი ეფექტი აქვს, ხოლო ზემოთ მოცემული თერაპიული (სამკურნალო) მტკიცებები დიდწილად არ უკავშირდება სისხლის მიმოქცევის გაუმჯობესებას.
სისხლძარღვი დისკოს ფორმის ერითროციტებით (სისხლის წითელი უჯრედებით) არის სავსე. თუმცა სისხლში დინებისას წითელი უჯრედები დისკოს ნაცვლად პარაშუტის მსგავს ფორმას იღებს.
წითელი უჯრედები დისკოს ფორმას მხოლოდ უძრაობისას ქმნის. იქნებ სურათი მიანიშნებს, რომ კურკუმინი სისხლის ნაკადის სტაგნაციას იწვევს? არა, არც ეს შეესაბამება რეალობას; უძრავ სისხლში წითელი უჯრედები გროვდება და ასე გამოიყურება:
ახლა მიხვდით, რა გასაოცრად იყენებენ ამ გამოსახულებას. შეიძლება იფიქროთ, რომ სამედიცინო რამეს აჩვენებს. თუმცა საკმარისი სამედიცინო ცოდნის არმქონე პირები ამ თაღლითობამ შეიძლება მოატყუოს, რეალობა კი განსხვავებულია.
რატომ უნდა შეექმნა ვინმეს ასეთი გამოსახულება? იქნებ ამ ტექსტში მოთხრობილი ზღაპრების მორწმუნე გულუბრყვილო ადამიანებს ამ სურათით თავიანთი ზღაპრებისთვის აზრის მიცემა სურთ?
დაკავშირებული თემები:
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.