Ağciyər xərçənginin birinci xətt müalicəsində Ramucirumab üstəgəl Erlotinib FDA təsdiqi aldı

ABŞ Qida və Dərman İdarəsi (FDA), ramucirumab (Cyramza) ilə birlikdə erlotinib (Tarceva) kombinasiyasını metastatik, epidermal böyümə faktoru reseptorunda (EGFR) ekzon 19 delesiyası və ya ekzon 21 mutasiyası olan qeyri-kiçik hüceyrəli ağciyər xərçənginin (KHDAK) birinci xətt müalicəsi üçün təsdiqlədi. Bu, FDA tərəfindən təsdiqlənən ilk və yeganə “anti-vaskulyar endotelial böyümə faktoru reseptoru (VEGFR) + EGFR tirozin kinaz inhibitoru kombinasiya müalicəsi” oldu. Bu təsdiqlə ramucirumab ağciyər, qaraciyər, mədə və kolorektal kimi xərçəng növləri üçün 6. təsdiqini almış oldu.

Ağciyər xərçəngində ilk dəfə iki ağıllı dərmanın kombinasiyası FDA təsdiqi aldı

Ramucirumabmonoklonal anticisim quruluşlu, antiangiogen sinfə aid hədəflənmiş vasitədir. VEGFR-2 proteinini əngəlləyərək şişi qidalandıran damar strukturlarının inkişafının qarşısını alır.

Erlotinib adlı kiçik molekullu təsiredici maddə ağciyər xərçəngi hüceyrələrinin səthindəki epidermal böyümə faktoru reseptoruna (EGFR) bağlanmaq üçün hazırlanıb. Dərman reseptora bağlandıqda erlotinib xərçəng hüceyrələrinə böyüməyi və bölünməyi bildirən siqnalı əngəlləyir. EGFR reseptoru normalda sağlam hüceyrələrin səthində də olur, ancaq xərçəng hüceyrələrinin səthində çox yüksək miqdarda və ya mutasiyaya uğramış vəziyyətdə ola bilər. Erlotinibə cavab verəcək EGFR mutasiyasının olub-olmadığını müəyyən etmək üçün erlotinibə başlamazdan əvvəl genetik test aparılır.

Ağciyər xərçənginin müalicəsi üçün tədqiqatlar aparan “EGFR Resisters” qrupunun həmtəsisçilərindən Ivy Elkins; “Ramucirumabın aldığı son FDA təsdiqi əsas məqsədimiz olan EGFR-mutasiyalı KHDAK xəstəliyini idarə edilən xroniki xəstəlik anlayışına çevirmək üçün ümid oldu. Hər yeni müalicə seçimi bu xəstəliklə yaşayanlara ümid verir və onkoloqlara daha çox seçim təqdim edir” sözləri ilə açıqlama verdi.

RELAY tədqiqatı

Ramucirumabın erlotinib ilə birlikdə istifadəsinə verilən təsdiq çoxmərkəzli, randomizə edilmiş nəzarətli faza 3 RELAY tədqiqatının effektivlik və təhlükəsizlik nəticələrinə əsaslanır. Bu tədqiqatda müalicə edilməmiş metastatik, EGFR ekzon 19 delesiyası və ya ekzon 21 mutasiyası olan KHDAK xəstələri iki qrupa ayrılıb: ramucirumabın erlotinib ilə kombinasiyasının istifadə olunduğu müalicə qrupu ilə erlotinibin təkbaşına birinci xətt müalicədə istifadə edildiyi xəstə qrupunun nəticələri müqayisə edilir. Ümumilikdə 449 xəstənin daxil olduğu tədqiqatda 224 xəstə rumacirumab tətbiq edilən qrupa, 225 xəstə isə plasebo qrupuna ayrılır.

Tədqiqatın əsas sonlanım nöqtəsi proqressiyasız (irəliləməsiz) sağqalım (PFS), ikincili sonlanım nöqtələri isə təhlükəsizlik, ümumi cavab nisbəti, cavab müddəti və ümumi sağqalım meyarlarıdır. Tədqiqat nəticəsində ramucirumab ilə kombinasiya müalicəsi aparılan xəstə qrupunda proqressiyasız sağqalım müddətinin 7 ay uzandığı görüldü (19,4 ay ramucirumab + erlotinib, 12,4 ay plasebo qrupu). Proqressiyasız sağqalım göstəricilərinin analiz edildiyi vaxt ümumi sağqalım məlumatları hələ tamamlanmadığı üçün bu analiz ən azı 300 məlumatın əldə ediləcəyi vaxta qədər təxirə salındı.

RELAY tədqiqatında müalicələrin təhlükəsizliyi / əlavə təsirlərlə bağlı nəticələr dərmanların təkbaşına istifadədəki təhlükəsizlik profilinə bənzəyir. Ramucirumab və erlotinib ilə müalicə edilən xəstələrdə ən çox müşahidə olunan əlavə təsirlər infeksiyalar, hipertoniya, stomatit, proteinuriya, alopesiya və burun qanamasıdır. Ən geniş yayılmış laborator test anormallıqları isə alanin aminotransferazın (ALT) artması, aspartat aminotransferazın (AST) artması, anemiya, trombositopeniya və neytropeniyadır. Xəstələrin %13-ündə müşahidə olunan əlavə təsirlərə görə müalicə dayandırılıb.

RELAY metastatik KHDAK müalicəsində rumacirumabın müsbət cavab verdiyi ikinci faza 3 tədqiqatıdır. İlk tədqiqat rumacirumab ilə birlikdə dosetakselin əvvəllər platin əsaslı kimyaterapiyadan sonra xərçəngi irəliləmiş metastatik KHDAK xəstələrinin müalicəsində istifadəsinin təsdiqini dəstəkləyən REVEL idi və 2014-cü ildə FDA təsdiqi almışdı (baxın).