EGFR ekzon 20 mutasiyalı ağciyər xərçəngi üçün ilk oral dərman FDA təsdiqi aldı

Epidermal böyümə faktoru reseptoru (EGFR) ekzon 20 insersiya (əlavəolunma) mutasiyalarıolan, yerli irəliləmiş və ya metastatik kiçik hüceyrəli olmayan ağciyər xərçəngi (KHDAK) olan xəstələrin müalicəsi üçün mobocertinib (Exkivity, Takeda) adlı kapsul şəklində dərmana 15 sentyabr 2021-ci ildə FDA (ABŞ Qida və Dərman İdarəsi) sürətləndirilmiş təsdiq verdi.

Dərman platin əsaslı kimyaterapiya zamanı və ya sonrasında xəstəliyi irəliləyən və FDA təsdiqli testdə EGFR ekzon 20 insersiya mutasiyası aşkarlanan xəstələrin istifadəsi üçün, yəni ikinci sıra müalicə kimi təsdiqlənmişdir.

EGFR Exon 20 insersiya mutasiyası

Mobocertinib ağciyər xərçəngində daha üstünlük təşkil edən digər EGFR mutasiyalarından daha az yayılmış bu ekzon 20 mutasiyalarını hədəfləmək üçün xüsusi hazırlanmış ilk oral tirozin kinaza inhibitorudur (TKI).

Mobocertinib EGFR ekzon 20 insersiya mutasiyası üçün FDA təsdiqi alan 2-ci dərmandır. Daha əvvəl, 21 may 2021-ci ildə FDA təsiredici maddəsi amivantamab-vmjw olan Rybrevant adlı dərmanı şişlərində EGFR ekzon 20 insersiya mutasiyası olan xəstələr üçün təsdiqləmişdi.

EGFR Exon20 əlavəolunma mutasiyaları KHDAK xəstələrinin təxminən %1-2-ni təşkil edir və Qərb cəmiyyətləri ilə müqayisədə Asiya cəmiyyətlərində daha çox rast gəlinir.

Mobocertinibə FDA təsdiqi gətirən tədqiqat

Yeni təsdiq 114 xəstədən ibarət təkqollu faza 1/2 klinik tədqiqatından gəlir. Tədqiqatın ölçmək istədiyi əsas sonlanım nöqtələri obyektiv cavab göstəricisi və cavab müddətidir. Xəstələrin hamısı əvvəllər platin əsaslı kimyaterapiya almışdılar və mobocertinib dozası gündəlik 160 mg idi.

• Müstəqil qiymətləndirmə komitəsinə görə, mobocertinib %28 təsdiqlənmiş obyektiv cavab göstəricisi və median 17.5 aylıq cavab müddəti göstərdi.
• Median ümumi sağqalım müddəti 24 ay və proqressiyasız (irəliləməsiz) sağqalım müddəti 7.3 ay idi.

Mobocertinibə uyğunluğu müəyyənləşdirmək üçün FDA yeni nəsil sekvensləmə (NGS) testi kimi Thermo Fisher Scientific şirkətinin EGFR Exon20 əlavələri olan KHDAK xəstələrini müəyyən edən Oncomine Dx Hədəf Testini təsdiqlədi.

NGS testi EGFR Exon20 əlavələrinin %50-dən azını aşkarlayan polimeraza zəncirvari reaksiyası (PCR) testi ilə müqayisədə daha doğru diaqnozları təmin edə bildiyi üçün bu xəstələr baxımından kritik əhəmiyyət daşıyır.

Mobocertinib ilə görülən ən geniş yayılmış (> %20) yan təsirlər ishal, səpki, ürəkbulanma, stomatit, qusma, iştahanın azalması, paronixiya (dırnaqətrafı iltihab), yorğunluq, dəri quruluğu və əzələ-skelet ağrısı idi.