Tüklü hüceyrəli leykemiyanın müalicəsində Moxetumomab Pasudotox-tdfk FDA təsdiqi aldı

Tüklü hüceyrəli leykemiya (hairy cell leukemia) müalicəsi üçün moxetumomab pasudotoks-tdfk (ticarət adı Lumoxiti) adlı yeni dərman 13 sentyabr 2018-ci ildə FDA təsdiqi aldı.

Təsdiqin təfərrüatlarına baxsaq, purin nukleozid analoqu da daxil olmaqla əvvəllər ən azı 2 xətt sistemik müalicə almış residiv (təkrarlanmış) və ya refrakter (müalicəyə davamlı) tüklü hüceyrəli leykemiyası olan yetkin xəstələrin müalicəsində venadaxili istifadə üçün moxetumomab pasudotoks-tdfk (Lumoxiti) inyeksiyası FDA təsdiqi aldı.

Moksetumomab pasudotoks-tdfk nədir və necə işləyir?

Moxetumomab pasudotox-tdfk, immun sistemi hüceyrələri olan B hüceyrələrinin səthindəki CD22 molekuluna yönəlmiş sitotoksindir və tüklü hüceyrəli leykemiya xəstələri üçün bu növdə təsdiq alan ilk müalicədir. CD22 immun sisteminin həddindən artıq aktivləşməsinin və autoimmun xəstəliklərin inkişafının qarşısını alan tənzimləyici molekuldur. Bu baxımdan moxetumomab pasudotox-tdfk anti-CD22 immunotoksindir.

Tüklü hüceyrəli leykemiya nədir?

Tüklü hüceyrəli leykemiya nadir xərçənglərdən biridir. Leykemiyanın bu növündə sümük iliyi nümunəsində mikroskop altında tüklü / saçlı görünən B hüceyrələri var; nadir görülən və yavaş böyüyən xərçəngdir. Leykemiyalı B hüceyrələrinin sayı artdıqca daha az sağlam ağ qan hüceyrəsi, qırmızı qan hüceyrəsi və trombosit istehsal edilir; bu da infeksiya, qanazlığı və qanama kimi leykemiya əlamətlərinə yol aça bilər.

Tüklü hüceyrəli leykemiyanın əlamətləri hansılardır?

Tüklü hüceyrəli leykemiyada xəstələr adətən qan göstəricilərinin aşağı olması, splenomeqaliya (dalağın böyüməsi) kimi şikayətlərlə həkimə müraciət edirlər. Tüklü hüceyrələr anormal B limfositləri olsa da, adətən limfa düyünlərinin böyüməsinə səbəb olmurlar. Sonra tüklü hüceyrələr sümük iliyində, qaraciyərdə və dalaqda (yəqin ki, bu orqanlarda daha yaxşı çoxaldıqlarına görə) yığılmağa başlayır.

Buna görə dalaq böyüməsi və gözlənilməyən qan göstəricisi azalması tüklü hüceyrəli leykemiya diaqnozuna yönəldən iki mühüm tapıntıdır.

Tüklü hüceyrəli leykemiyanın standart müalicəsi nədir?

Adətən indolent (yavaş gedişli) hematoloji xərçəng növüdür. Lakin simptomatik olarsa (şikayət yaradarsa), müalicəsində pentostatin, kladribin və interferon-alfa həm xəstəliyin proqnozunu (gedişini) nəzərəçarpacaq yaxşılaşdırır, həm də residiv (təkrarlanma) olarsa təsirli görünür. Ağır qan göstəricisi azalmasına səbəb olan splenomeqaliyası (dalaq böyüməsi) olan xəstələrdə splenektomiya (dalağın götürülməsi əməliyyatı) aparıla bilər. Bu standart müalicələrdən hər hansı birinə başlandıqdan sonra 5 illik yaşama şansı %85-dən yuxarı olur.

Son vaxtlarda rituximab (anti-CD20 monoklonal anticismi), anti- CD25 (LMB-2) və anti-CD22-nin (moxetumomab pasudotox-tdfk) istifadəsi ilə tüklü hüceyrəli leykemiyada müalicə seçimlərinin sayı artmışdır.

Moksetumomab pasudotoks-tdfk-ya FDA təsdiqi qazandıran tədqiqat

Moxetumomab pasudotoks-tdfk-nin effektivliyi purin nukleozid analoqu daxil olmaqla ən azı iki xətt sistemik müalicə almış 80 tüklü hüceyrəli leykemiya xəstəsinin daxil edildiyi faza III təkqollu, açıq etiketli klinik tədqiqatda göstərildi. Tədqiqat tam cavab əldə edildikdən 180 gün sonra hematoloji remissiyanın saxlanması (heç bir xəstəlik əlamətinin olmaması) kimi müəyyən edilən davamlı tam cavabı ölçdü. Tədqiqatın nəticəsində xəstələrin % 30-unda davamlı tam cavab əldə edildi və ümumi cavab göstəricisi % 75 idi.

Moxetumomab pasudotox-tdfk-nin tez-tez görülən əlavə təsirləri arasında dərmanın tətbiqi ilə əlaqəli allergik reaksiyalar, ödem, ürəkbulanma, yorğunluq, baş ağrısı, qızdırma, qəbizlik, anemiya (qanazlığı) və ishal sayıla bilər.

Tövsiyə edilən moxetumomab pasudotoks-tdfk dozası ən çox 6 dövr üçün və ya xəstəlik irəliləyənədək, yaxud qəbuledilməz toksiklik (əlavə təsirlər) yarananadək hər 28 gündən bir, 1-ci, 3-cü və 5-ci günlərdə 30 dəqiqəlik venadaxili infuziya kimi tətbiq edilən kiloqram başına 0.04 mg-dır.

Moxetumomab pasudotox-tdfk resept məlumatlarında tibb işçiləri və xəstələrdə kapilyar sızma sindromu yaranma riski barədə xəbərdarlıq var. Bu vəziyyət maye və zülalları kiçik qan damarlarını əhatə edən toxumalara sızdırır. Kapilyar sızma sindromunun əlamətləri arasında tənəffüs çətinliyi; çəki artımı; hipotoniya (qan təzyiqinin düşməsi); yaxud qolların, ayaqların və / və ya üzün şişməsi var.

Xəbərdarlıqlar arasında həmçinin qırmızı qan hüceyrələrinin anormal parçalanmasının səbəb olduğu hemolitik uremik sindrom riski də var. Xəstələr kifayət qədər maye qəbulunun əhəmiyyətini bilməli və qan göstəriciləri tez-tez izlənməlidir. Digər ciddi xəbərdarlıqlar arasında böyrək funksiyasının azalması, infuziya (tətbiq) ilə əlaqəli reaksiyalar və elektrolit anormallıqları sayıla bilər. Süd verən qadınlara moxetumomab pasudotox-tdfk verilməməlidir.

Nəticədə anti-CD22 immunotoksini olan moxetumomab pasudotox-tdfk digər müalicələr sınaqdan keçirildikdən sonra xəstəliyi irəliləyən tüklü hüceyrəli leykemiya xəstələri üçün yeni müalicə seçimi kimi qarşımıza çıxır.