ნივოლუმაბმა შარდის ბუშტის კიბოს ოპერაციის შემდგომი დამცავი მკურნალობისთვის FDA-ს დამტკიცება მიიღო

2021 წლის 19 აგვისტოს FDA-მ, წინა ნეოადიუვანტური ქიმიოთერაპიის, ლიმფური კვანძების დაზიანებისა თუ PD-L1 სტატუსის მიუხედავად, რადიკალური ოპერაციის შემდეგ რეციდივის (განმეორების) მაღალი რისკის მქონე უროთელური (შარდის ბუშტისა და საშარდე გზების) კარცინომის მქონე პაციენტების ადიუვანტური (დამცავი) მკურნალობისთვის ნივოლუმაბი (Opdivo) სახელწოდების იმუნოთერაპია დაამტკიცა.

ეს დამტკიცება მნიშვნელოვანი ეტაპია პაციენტებისთვის, რომლებმაც შარდის ბუშტის ან საშარდე გზების ნაწილის ამოსაკვეთად დიდი ოპერაცია გადაიტანეს და საჭიროებენ დამატებით მკურნალობას, რომელიც უროთელური კარცინომის რეციდივის რისკის შემცირებაში დაეხმარებათ.

საკონტროლო წერტილების ინჰიბიტორების კლასის ახალი თაობის იმუნოთერაპიის, ნივოლუმაბის, ადიუვანტური მკურნალობის სახით მაღალი ეფექტიანობა იმ პაციენტებში, რომლებსაც კუნთოვან შრეში შეჭრილი უროთელური კარცინომის გამო ოპერაცია ჩაუტარდათ, 2021 წლის გენიტოურინარული კიბოს სიმპოზიუმზე CheckMate 274 კვლევით გამოცხადდა. ეს კვლევა ონკოლოგიაში ბოლო 5 წლის ერთ-ერთ ყველაზე მნიშვნელოვან მიღწევად იქცა.

• კვლევის ყველაზე მნიშვნელოვანი შედეგი იყო დაავადების გარეშე გადარჩენადობის მედიანის მონაცემი: იმუნოთერაპიით 20,8 თვე (95% სანდოობის ინტერვალი: 16,5 - 27,6), პლაცებოს შემთხვევაში კი 10,8 თვე (95% სანდოობის ინტერვალი: 8,3 - 13,9).
• ნივოლუმაბმა, პლაცებოსთან შედარებით, დაავადების რეციდივის ან სიკვდილის რისკის 30%-ით შემცირება გამოიწვია (HR, 0,70; 95% სანდოობის ინტერვალი: 0,57 - 0,86; P  = 0,0008).

პაციენტებში, რომელთა სიმსივნეებში PD-L1 დადებითობა 1% ან მეტი იყო, ნივოლუმაბით დაავადების გარეშე გადარჩენადობის მედიანა ჯერ მიღწეული არ იყო (95% სანდოობის ინტერვალი: 21,2 - შეუფასებელი). ამ ჯგუფში პლაცებოთი დაავადების გარეშე გადარჩენადობის მედიანა 8,4 თვე იყო (95% სანდოობის ინტერვალი: 5,6 - 21,2). ამ ქვეჯგუფში იმუნოთერაპიამ დაავადების რეციდივის ან სიკვდილის რისკის 45%-ით შემცირება გამოიწვია (HR, 0,55; 95% სანდოობის ინტერვალი, 0,39 - 0,77; P  = 0,0005).

CheckMate-274-ის მონაცემები დამადასტურებელი მტკიცებულებაა ნივოლუმაბის გამოყენებისთვის იმ პაციენტებში, რომლებსაც პლატინის შემცველი ქიმიოთერაპიის დროს ან მის შემდეგ დაავადების პროგრესირება (წინსვლა) ჰქონდათ ან დაავადება 1 წლის განმავლობაში პროგრესირდა და აქვთ ადგილობრივად შორს წასული ან მეტასტაზური უროთელური კარცინომა. ამ გამოყენებისთვის მიღებული FDA-ს 2017 წლის დაჩქარებული დამტკიცება მიმდინარე კვლევის შედეგებით დასტურდება. ეს მონაცემები ამ ვითარებაში დაჩქარებული დამტკიცების სრულ დამტკიცებად გარდაქმნას უჭერს მხარს.

კვლევის დეტალები

მულტიცენტრულ, ორმაგად ბრმა, პლაცებოკონტროლირებულ CheckMate-274 კვლევაში ჩართეს პაციენტები კუნთში ინვაზიური უროთელური კარცინომით (MIUC), ypT2-ypT4a ან yPN-დადებითი სტატუსით, რომლებმაც ნეოადიუვანტური ცისპლატინით ქიმიოთერაპია მიიღეს. კვლევაში მონაწილეობა ასევე ნებადართული იყო pT3-pT4a ან pN-დადებითი კუნთში ინვაზიური უროთელური კიბოს მქონე პაციენტებისთვის, რომლებსაც მანამდე ნეოადიუვანტური ცისპლატინის ქიმიოთერაპია არ მიუღიათ და ადიუვანტური ცისპლატინის ქიმიოთერაპიის კანდიდატები არ იყვნენ ან მისი მიღება არ სურდათ.

გარდა ამისა, პაციენტებს ბოლო 120 დღის განმავლობაში რადიკალური ოპერაცია უნდა ჰქონოდათ ჩატარებული და კვლევის პრეპარატის პირველი დოზის შემდეგ 4 კვირის განმავლობაში დაავადებისგან თავისუფალი სტატუსი უნდა ჰქონოდათ.

კვლევის მონაწილეები რანდომიზებულად, 1:1 თანაფარდობით იღებდნენ 240 mg ნივოლუმაბს ყოველ 2 კვირაში (353 პაციენტი) ან IV პლაცებოს ყოველ 2 კვირაში (356 პაციენტი). ადიუვანტურ მკურნალობას ისინი 1 წლამდე იღებდნენ.

პაციენტები დაჯგუფდნენ PD-L1 ექსპრესიის (<1% ≥1%-თან შედარებით), წინა ნეოადიუვანტური ცისპლატინზე დაფუძნებული ქიმიოთერაპიის (დიახ ან არა) და პათოლოგიური კვანძოვანი სტატუსის მიხედვით.

კვლევის პირველადი საბოლოო წერტილები იყო მკვლევრის მიერ შეფასებული დაავადების გარეშე გადარჩენადობა ყველა პაციენტში და დაავადების გარეშე გადარჩენადობა ყველა პაციენტში, რომლის PD-L1 ექსპრესია 1% ან მეტი იყო. მეორეული საბოლოო წერტილები მოიცავდა არაუროთელური რეციდივის გარეშე გადარჩენადობას, დაავადების სპეციფიკურ გადარჩენადობასა და საერთო გადარჩენადობას. საძიებო საბოლოო წერტილები მოიცავდა შორეული მეტასტაზების გარეშე გადარჩენადობას, უსაფრთხოებასა და ჯანმრთელობასთან დაკავშირებულ ცხოვრების ხარისხს.

2021 წლის გენიტოურინარული კიბოს სიმპოზიუმზე წარმოდგენილი მონაცემებით, ჯგუფებში მონაწილეთა საშუალო ასაკი 65,6 წელი იყო, 76,1% მამაკაცი იყო, 48,1% — ევროპიდან და 62,8%-ს ECOG ფუნქციური სტატუსი 0 ჰქონდა. ასევე, საწყისი დიაგნოზისას სიმსივნე პაციენტების 78,9%-ში შარდის ბუშტიდან მომდინარეობდა, დანარჩენებში კი ზედა საშარდე გზების დაავადება იყო. პაციენტების 39,8%-ში PD-L1 ექსპრესია 1% ან მეტი იყო. გარდა ამისა, პაციენტების 43,4%-ს მანამდე ნეოადიუვანტური ცისპლატინის ქიმიოთერაპია ჰქონდა მიღებული.

ნივოლუმაბის ჯგუფის 98,9%-ს და პლაცებოს ჯგუფის 95,4%-ს ნებისმიერი მიზეზით გამოწვეული გვერდითი ეფექტი ჰქონდა; შესაბამისად, პაციენტების 42,7%-სა და 36,8%-ს მე-3 ან უფრო მაღალი ხარისხის გვერდითი ეფექტები ჰქონდა. იმუნოთერაპიის მიმღებთა 12,8%-მა პრეპარატის მიღება მკურნალობასთან დაკავშირებული ტოქსიკურობის გამო შეწყვიტა, ხოლო პლაცებოს მიმღებთა 2%-მა — გვერდითი ეფექტების გამო.

ნივოლუმაბთან დაკავშირებული მე-3 ან უფრო მაღალი ხარისხის ყველაზე ხშირი გვერდითი ეფექტები იყო დიარეა (0,9%), კოლიტი (0,9%) და პნევმონიტი (0,9%). პლაცებოს ჯგუფში ყველაზე ხშირი გვერდითი ეფექტები იყო კოლიტი (0,6%), დიარეა (0,3%), გამა-გლუტამილტრანსფერაზის მომატება (0,3%) და ჰეპატიტი (0,3%).