იმუნოთერაპიამ შარდის ბუშტის კიბოს მკურნალობაში ვითარება შეცვალა

ახალი თაობის იმუნოთერაპია საკონტროლო წერტილების ინჰიბიტორების კლასიდან, ნივოლუმაბი, ძალიან ეფექტიანი აღმოჩნდა კუნთოვან შრეში შეჭრილი უროთელური კარცინომის (შარდის ბუშტისა და საშარდე გზების კიბოს) გამო ოპერირებულ პაციენტებში ადიუვანტურ (დამცავ) მკურნალობად გამოყენებისას. ეს შედეგები 2021 წლის შარდსასქესო სისტემის კიბოების სიმპოზიუმზეCheckMate 274 კვლევით გამოცხადდა.

ბოლო 5 წლის ერთ-ერთი უმნიშვნელოვანესი კვლევა

ეს კლინიკური კვლევაპაციენტებს სიმსივნის PD-L1 სტატუსისა და ნეოადიუვანტური (ოპერაციამდელი) ქიმიოთერაპიის მიღებისგან დამოუკიდებლად რთავდა.

ადიუვანტური ნივოლუმაბის მიმღებ პაციენტებში დაავადებისგან თავისუფალი გადარჩენის მედიანა 21 თვე იყო; ხოლო პლაცებოს მიმღებებში 10.9 თვე — ანუ თითქმის ორმაგი განსხვავება.

დაავადებისგან თავისუფალი გადარჩენაარის ოპერაციის შემდეგ კიბოს განმეორებამდე ან მეტასტაზირებამდე გასული დრო. ამ კვლევის მთავარ გამოსავლად „დაავადებისგან თავისუფალი გადარჩენის მედიანური ხანგრძლივობა“ შეირჩა.

როგორც მოსალოდნელი იყო, მკურნალობასთან დაკავშირებული გვერდითი მოვლენები ნივოლუმაბით უფრო ხშირი იყო, თუმცა ჯანმრთელობასთან დაკავშირებული ცხოვრების ხარისხი პლაცებოს მსგავსი იყო.

ნივოლუმაბი ონკოლოგიის ისტორიაში შევიდა როგორც პირველი სისტემური იმუნოთერაპია, რომელმაც კუნთოვან შრეში გავრცელებული შარდის ბუშტის კიბოს პაციენტებში ადიუვანტურად გამოყენებისას შედეგების სტატისტიკურად და კლინიკურად მნიშვნელოვანი გაუმჯობესება აჩვენა!

კვლევის წარმდგენმა ექიმმა დინ F. ბაჯორინმა თქვა: „ეს შედეგები უჭერს მხარს ნივოლუმაბის მონოთერაპიას, როგორც ახალ სტანდარტს ადიუვანტურ გარემოში, შარდის ბუშტის ქირურგიული მოცილების შემდეგ მაღალი რისკის უროთელური კიბოს მქონე პაციენტებში, PD-L1 სტატუსისა და წინა ნეოადიუვანტური ქიმიოთერაპიისგან დამოუკიდებლად“.

CheckMate 274 კვლევის დეტალები

ამ საერთაშორისო ფაზა-3 კვლევაში ჩაერთო შარდის ბუშტის, შარდსაწვეთის ან თირკმლის მენჯის კუნთოვან შრეში გავრცელებული უროთელური კიბოს გამო ოპერირებული მაღალი რისკის 709 პაციენტი .

პაციენტთა ჯგუფის % 20-ს შარდსაწვეთსა და თირკმლის მენჯში წარმოშობილი სიმსივნეები ჰქონდა, ხოლო %80-ში სიმსივნე შარდის ბუშტში იყო.

პაციენტების დაახლოებით % 43-ს ცისპლატინზე დაფუძნებული ნეოადიუვანტური ქიმიოთერაპია ჰქონდა მიღებული, ხოლო % 40-ში სიმსივნე PD-L1-ზე დადებითი იყო.

პაციენტები ორმაგად ბრმა წესით შემთხვევითად ორ ჯგუფად განაწილდა, რათა 1 წლამდე ადიუვანტური ნივოლუმაბი ან პლაცებო მიეღოთ.

დაახლოებით 20-თვიანი მედიანური დაკვირვებისას კლინიკურმა კვლევამ პირველადი გამოსავალი დააკმაყოფილა და ნივოლუმაბმა პლაცებოსთან შედარებით დაავადებისგან თავისუფალი გადარჩენის მედიანის მნიშვნელოვანი გახანგრძლივება აჩვენა: შესაბამისად 21 თვე და 10.9 თვე (საფრთხეთა თანაფარდობა, 0.70;  P  <.001).

დაავადების ადგილის მიხედვით ქვეჯგუფების ანალიზში აღინიშნა, რომ შარდის ბუშტის სიმსივნის მქონე პაციენტები იმუნოთერაპიისგან უფრო მეტი იყვნენ.

დაავადებისგან თავისუფალ გადარჩენაში სარგებელი დიდი იყო პაციენტებში, რომელთა სიმსივნე PD-L1-ზე დადებითი იყო. PD-L1-დადებით პაციენტებში ნივოლუმაბის ჯგუფში დაავადებისგან თავისუფალი გადარჩენის მედიანა ვერ მიიღწა, რადგან კიბო პაციენტთა ნახევარზე მეტში არ განმეორებულა; პლაცებოს ჯგუფში კი 10.8 თვე იყო (HR, 0.53;  P  <.001).

ნივოლუმაბის ჯგუფში პაციენტებს ჰქონდათ მძიმე (3. ხარისხის ან უფრო მაღალი) მკურნალობასთან დაკავშირებული გვერდითი მოვლენები (% 17.9, შედარებით % 7.2-თან), ძირითადად ამილაზისა და ლიპაზის დონის მატების უფრო მაღალი სიხშირის გამო. თუმცა პლაცებოსთან შედარებით ჯანმრთელობასთან დაკავშირებული ცხოვრების ხარისხი არ გაუარესებულა.

ნივოლუმაბთან დაკავშირებული, პოტენციურად იმუნური მექანიზმით განვითარებული ყველაზე გავრცელებული 3. ხარისხის ან უარესი გვერდითი მოვლენებია, მკურნალობით გამოწვეული პნევმონიის გამო ორი სიკვდილის ჩათვლით, დიარეა (% 0,9), კოლიტი (% 0,9) და პნევმონიტი (% 0,9).

• დაკავშირებული თემა: რა გვერდითი მოვლენები აქვს იმუნოთერაპიის წამლებს და როგორ მკურნალობენ მათ?

კვლევის წარმდგენმა ექიმმა ბაჯორინმა აღიარა, რომ საერთო გადარჩენისა და ბიომარკერების მონაცემებს უფრო ხანგრძლივი დაკვირვება დასჭირდება. კვლევა დაახლოებით 7 წლის წინ დაიგეგმა და დისკუსიების შემდეგ პირველად გამოსავლად დაავადებისგან თავისუფალი გადარჩენის ხანგრძლივობა შეირჩა.