Sidik kisəsi xərçənginin müalicəsində immunoterapiya vəziyyəti dəyişdirdi

Nəzarət nöqtəsi inhibitorları sinfindən yeni nəsil immunoterapiya olan nivolumab, əzələ qatına yayılmış urotelial karsinoma (sidik kisəsi və sidik yolları xərçəngi) üçün əməliyyat keçirilmiş xəstələrdə adyuvant (qoruyucu) müalicə kimi istifadə edildikdə olduqca effektiv tapıldı. Bu nəticələr 2021 Genitourinar Xərçənglər Simpoziumunda CheckMate 274 tədqiqatı ilə elan edildi.

Son 5 ilin ən mühüm tədqiqatlarından biri

Bu klinik tədqiqat, şişin PD-L1 vəziyyətindən və neoadyuvant (əməliyyatdan əvvəl) kimyaterapiya alınmasından asılı olmayaraq xəstələri daxil etdi.

Median xəstəliksiz sağqalım adyuvant nivolumab verilən xəstələrdə 21 ay idi; buna qarşılıq plasebo verilənlərdə 10.9 ay idi; yəni təxminən ikiqat fərq.

Xəstəliksiz sağqalım, əməliyyatdan sonra xərçəngin təkrarlanmasına və ya metastaz verməsinə qədər keçən müddətdir. Bu tədqiqatın əsas sonlanım nöqtəsi “median xəstəliksiz sağqalım müddəti” seçilmişdir.

Təəccüblü deyil ki, müalicə ilə əlaqəli yan təsirlər nivolumab ilə daha çox idi, lakin sağlamlıqla əlaqəli həyat keyfiyyəti plasebo ilə oxşar idi.

Nivolumab əzələ qatına yayılmış sidik kisəsi xərçəngi olan xəstələrdə adyuvant müalicə kimi tətbiq edildikdə nəticələrdə statistik və klinik əhəmiyyətli yaxşılaşma göstərən ilk sistemli immunoterapiya kimi onkologiya tarixinə keçdi!

Tədqiqatı təqdim edən Dr. Dean F. Bajorin: “Bu nəticələr sidik kisəsi əməliyyatla çıxarıldıqdan sonra yüksək riskli urotelial xərçəngi olan xəstələr üçün PD-L1 vəziyyətindən və əvvəlki neoadyuvant kimyaterapiyadan asılı olmayaraq adyuvant şəraitdə yeni standart kimi nivolumab monoterapiyasını dəstəkləyir” dedi.

CheckMate 274 tədqiqatının təfərrüatları

Bu beynəlxalq faza-3 tədqiqatına sidik kisəsi, sidik axarı və ya böyrək ləyənində əzələ qatına yayılmış urotelial xərçəng üçün əməliyyat keçirilmiş yüksək riskli 709 xəstə daxil edildi.

Xəstə qrupunun % 20-sində sidik axarı və böyrək ləyəni nahiyəsindən qaynaqlanan şişlər olduğu halda, %80-ində şiş sidik kisəsində idi.

Xəstələrin təxminən % 43-ü sisplatin əsaslı neoadyuvant kimyaterapiya almışdı və % 40-ında PD-L1 üçün müsbət şişlər vardı.

Xəstələr ikiqat kor üsulla 1 ilə qədər adyuvant nivolumab və ya plasebo almaq üçün təsadüfi olaraq iki qrupa ayrıldı.

Təxminən 20 aylıq median izləmə müddətində klinik tədqiqat əsas sonlanım nöqtəsinə çatdı və nivolumab müalicəsi plaseboya nisbətən median xəstəliksiz sağqalımda əhəmiyyətli uzanma göstərdi: müvafiq olaraq 21 ay və 10.9 ay (təhlükə nisbəti, 0.70;  P  <.001).

Xəstəliyin yerləşdiyi yer üzrə altqrup təhlillərində sidik kisəsi şişi olan xəstələrdə immunoterapiyanın daha çox olduğu bildirildi.

Xəstəliksiz sağqalım faydası şişləri PD-L1 üçün müsbət olan xəstələrdə böyük idi. PD-L1 müsbət xəstələrdə nivolumab qrupunda xəstəliksiz sağqalımın medianına çatılmadı, çünki xəstələrin yarısından çoxunda xərçəng təkrarlanmamışdı; plasebo qrupunda isə 10.8 ay idi (HR, 0.53;  P  <.001).

Nivolumab qrupundakı xəstələrdə əsasən amilaza və lipaza səviyyələrinin artmasının daha yüksək tezliyindən qaynaqlanan ciddi (3-cü dərəcə və ya daha yüksək), müalicə ilə əlaqəli yan təsirlər daha çox idi (% 17.9-a qarşı % 7.2). Lakin plaseboya nisbətən sağlamlıqla əlaqəli həyat keyfiyyətində heç bir pisləşmə olmadı.

Nivolumab ilə potensial immun vasitəli ən çox rastlanan 3-cü dərəcə və ya daha ağır müalicə ilə əlaqəli yan təsirlər, müalicə ilə bağlı pnevmoniya səbəbindən iki ölüm də daxil olmaqla, ishal (% 0,9), kolit (% 0,9) və pnevmonitdir (% 0,9).

• Əlaqəli mövzu: İmmunoterapiya dərmanlarının yan təsirləri nədir, necə müalicə edilir?

Tədqiqatı təqdim edən Dr. Bajorin ümumi sağqalım və biomarker məlumatları üçün daha uzun izləmə lazım olduğunu qəbul etdi. Sınaq təxminən 7 il əvvəl planlaşdırılmışdı və müzakirələrdən sonra əsas sonlanım nöqtəsi xəstəliksiz sağqalım müddəti seçilmişdi.