Sidik kisəsi xərçəngində əməliyyatdan sonrakı qoruyucu müalicə kimi nivolumab FDA təsdiqi aldı

19 avqust 2021-ci ildə FDA, əvvəlki neoadyuvant kimyaterapiya, limfa düyünü tutulması və ya PD-L1 vəziyyətindən asılı olmayaraq, radikal əməliyyatdan sonra residiv (təkrarlanma) riski yüksək olan urotelial (sidik kisəsi və sidik yolları) karsinomalı xəstələrin adyuvant (qoruyucu) müalicəsi üçün nivolumab (Opdivo) adlı immunoterapiyanı təsdiqlədi.

Bu təsdiq sidik kisəsini və ya sidik yolunun bir hissəsini çıxarmaq üçün böyük əməliyyat keçirmiş və urotelial karsinomanın təkrarlanma riskini azaltmağa kömək edə biləcək əlavə müalicə yanaşmalarına ehtiyacı olan xəstələr üçün mühüm mərhələdir.

Nəzarət nöqtəsi inhibitoru sinfindən yeni nəsil immunoterapiya olan nivolumabın əzələ qatına keçmiş urotelial karsinomaya görə əməliyyat olunan xəstələrdə adyuvant müalicə kimi istifadə edildikdə yüksək effektiv olduğu 2021 Genitourinar Xərçənglər Simpoziumundatəqdim edilən CheckMate 274 tədqiqatı ilə elan edilmişdi. Bu tədqiqat onkologiyada son 5 ilin ən mühüm yeniliklərindən biri kimi diqqət çəkmişdi.

• Tədqiqatın ən mühüm nəticəsi median xəstəliksiz sağqalım məlumatı idi: immunoterapiya ilə 20,8 aya (%95 GA: 16,5 - 27,6) qarşı plasebo ilə 10.8 ay (%95 GA: 8,3 - 13,9).
• Nivolumab plasebo ilə müqayisədə xəstəliyin təkrarlanması və ya ölüm riskinin %30 azalması ilə nəticələnmişdir (HR, 0.70; %95 GA: 0,57 - 0,86; P = .0008).

Şişlərində PD-L1 müsbətliyi %1 və ya daha yüksək olan xəstələrdə nivolumabla median xəstəliksiz sağqalıma hələ çatılmadı (%95 GA: 21.2 - qiymətləndirilə bilməz). Bu xəstə qrupunda plasebo ilə median xəstəliksiz sağqalım 8,4 ay (%95 GA: 5,6 - 21,2) tapıldı. Bu alt qrupda immunoterapiya xəstəliyin təkrarlanması və ya ölüm riskinin %45 azalması ilə nəticələnmişdir (HR, 0,55; %95 GA, 0,39 - 0,77; P = .0005).

CheckMate-274-dən əldə edilən məlumatlar platin tərkibli kimyaterapiya zamanı və ya sonrasında xəstəlik proqressiyası (irəliləməsi) yaşayan və ya 1 il ərzində xəstəlik proqressiyası olan yerli irəliləmiş və ya metastatik urotelial karsinomalı xəstələrdə istifadə üçün nivolumaba verilmiş 2017-ci il sürətləndirilmiş FDA təsdiqi üçün təsdiqləyici sübut rolunu oynayır. Hazırkı tədqiqatın tapıntıları bu şəraitdə sürətləndirilmiş təsdiqin müntəzəm təsdiqə çevrilməsini dəstəkləyir.

Tədqiqatın təfərrüatları

Çoxmərkəzli, ikiqat kor, plasebo nəzarətli CheckMate-274 tədqiqatına neoadyuvant sisplatin kimyaterapiyası almış ypT2-ypT4a və ya yPN-müsbət əzələyə invaziv urotelial karsinoması (MIUC) olan xəstələr daxil edildi. Əvvəl neoadyuvant sisplatin kimyaterapiyası almayan və adyuvant sisplatin kimyaterapiyasına namizəd olmayan və ya onu almaq istəməyən pT3-pT4a və ya pN-müsbət əzələyə invaziv urotelial xərçəngli xəstələrin də iştirakına icazə verildi.

Bundan əlavə, xəstələr son 120 gün ərzində radikal cərrahiyyə keçirmiş olmalı və tədqiqat dərmanının ilk dozasından sonrakı 4 həftə ərzində xəstəliksiz vəziyyətdə olmalı idilər.

İştirakçılar 2 həftədən bir 240 mg nivolumab (353 xəstə) və ya 2 həftədən bir IV plasebo (356 xəstə) almağa 1:1 nisbətində təsadüfi bölündülər. 1 ilə qədər adyuvant müalicə aldılar.

Xəstələr PD-L1 ifadəsinə (<%1-ə qarşı ≥%1), əvvəlki neoadyuvant sisplatin əsaslı kimyaterapiyaya (bəli və ya xeyr) və patoloji düyün vəziyyətinə görə təsnif edildi.

Tədqiqatın birincili sonlanım nöqtələri tədqiqatçının qiymətləndirdiyi bütün xəstələrdə xəstəliksiz sağqalım və PD-L1 ifadəsi %1 və ya daha yüksək olan bütün xəstələrdə xəstəliksiz sağqalım idi. İkincili sonlanım nöqtələri qeyri-urotelial residivsiz sağqalım, xəstəliyə xas sağqalım və ümumi sağqalımdan ibarət idi. Kəşfiyyat məqsədli sonlanım nöqtələri uzaq metastazsız sağqalımı, təhlükəsizliyi və sağlamlıqla bağlı həyat keyfiyyətini əhatə edirdi.

2021 Genitourinar Xərçənglər Simpoziumundabildirildiyinə görə qollardakı iştirakçıların orta yaşı 65.6 idi, %76.1-i kişi, %48.1-i Avropadan və %62.8-inin ECOG fəaliyyət vəziyyəti 0 idi. Həmçinin ilk diaqnozda şişin mənşəyi xəstələrin %78,9-da sidik kisəsi idi, qalanlarında yuxarı sidik yolu xəstəliyi vardı. Xəstələrin %39,8-də PD-L1 ifadəsi %1 və ya daha yüksək idi. Bundan əlavə, xəstələrin %43.4-ü əvvəllər neoadyuvant sisplatin kimyaterapiyası almışdı.

Nivolumab qolundakıların %98,9-u və plasebo qolundakıların %95,4-ü hər hansı səbəbli yan təsir yaşadı; müvafiq olaraq xəstələrin %42.7-si və %36.8-i 3-cü dərəcəli və ya daha yüksək yan təsirlər yaşadı. İmmunoterapiya alan xəstələrin %12.8-i müalicəyə bağlı toksikliklərə görə dərmanı dayandırdığı halda, plasebo alanların %2-si yan təsirlərə görə dərmanı dayandırdı.

Nivolumabla bildirilən ən geniş yayılmış 3-cü dərəcəli və ya daha yüksək müalicə ilə əlaqəli yan təsirlər ishal (%0.9), kolit (%0.9) və pnevmonit (%0.9) idi. Plasebo qolunda ən çox görülən yan təsirlər kolit (%0.6), ishal (%0.3), qamma-qlutamiltransferaz artımı (%0.3) və hepatit (%0.3) idi.