4-cü mərhələ kolon və düz bağırsaq xərçəngi üçün nivolumab FDA təsdiqi aldı

31 iyul 2017-ci ildə ABŞ Qida və Dərman İdarəsi FDA fluoropirimidin, oksaliplatin və irinotekan müalicəsindən sonra xəstəliyi irəliləməyə davam edən, DNA təmir genlərində çatışmazlıq (Mismatch Repair System, dMMR) və yüksək mikrosatellit qeyri-sabitliyi (MSI-H) olan 12 yaş və yuxarı metastatik kolorektal xərçəngli xəstələrin müalicəsində immunoterapiya dərmanı nivolumaba (ticarət adı Opdivo) sürətləndirilmiş təsdiq verdi.

Mikrosatellitlər: DNA hər bir nukleotidin qarşısına uyğun nukleotid (məsələn, adeninin (A) qarşısına timin (T); sitozinin (C) qarşısına quanin (G)) gətirilərək köçürülür. 3 milyard nukleotidin uyğunlaşdığı DNA köçürülməsində bəzi səhvlər (məsələn, yanlış uyğunlaşmalar) ola bilər. Bunlar normalda DNA təmir genləri tərəfindən tapılıb düzəldilir. Lakin bəzi xərçənglərdə yanlış uyğunlaşmalar təmir edilə bilmir və bu vəziyyət yanlış uyğunlaşmanın təmiri defekti adlandırılır. Mikrosatellit adlandırılan, uyğunlaşmayan bu DNA ardıcıllıqları təkrarlanıb toplanır və mutasiyalara səbəb olaraq genomik qeyri-sabitlik yaradır.

Bu FDA təsdiqi genetik analiz ilə müəyyən edilmiş dMMR və ya yüksək MSI olan, əvvəlki fluoropirimidin, oksaliplatin və irinotekan əsaslı kimyaterapiya zamanı və ya sonrasında müalicələrə baxmayaraq xəstəliyi irəliləmiş və ya bu müalicələrə dözə bilməmiş 53 metastatik kolorektal (yoğun bağırsaq) xərçəngli xəstədə aparılmış çoxmərkəzli, açıq etiketli, təkqollu tədqiqat məlumatlarına əsaslandırılır. Tədqiqata daxil edilən xəstələr metastatik xəstəlik üçün əvvəlcə ən az bir dəfə fluoropirimidinlə kombinə oksaliplatin və ya irinotekan almış 74 metastatik kolorektal xərçəng xəstəsinin böyük hissəsini təşkil edir.

Bütün xəstələrə qəbuledilməz yan təsirlər yarananadək və ya radioloji olaraq xəstəliyin irəliləməyə davam etdiyi göstərilənədək iki həftədən bir venadaxili (intravenoz) infuziya ilə 3 mg/kg nivolumab tətbiq edilmişdir.

Müstəqil radioloji qiymətləndirmə komitəsi tərəfindən qiymətləndirilən obyektiv cavab nisbəti əvvəllər fluoropirimidin, oksaliplatin və irinotekan almış 53 xəstədə %28 (n=15 xəstə) tapılmışdır. Xəstələrin %67-sində cavabın ən az 6 ay davam etdiyi bildirilmişdir. Bir xəstədə tam, 14 xəstədə isə qismən cavab müşahidə edilmişdir. Ümumi qrupdakı 74 xəstədə isə obyektiv cavab nisbəti %32 (n = 24 xəstə) bildirilmişdir.

Pediatrik (uşaq) xəstələrdə nivolumab tədqiqatı aparılmamışdır. Yüksək MSI və ya dMMR olan 4-cü mərhələ yoğun bağırsaq xərçəngli yeniyetmə (12 yaş və yuxarı) xəstələr üçün təsir göstəricisi müvafiq yetkin qrupun nəticələrindən çıxarılmışdır.

Tək preparat kimi istifadə edilən nivolumabın ən çox rast gəlinən yan təsirləri yorğunluq, səpki, əzələ-skelet ağrısı, qaşınma, ishal, ürəkbulanma, öskürək, nəfəs almaqda çətinlik, qəbizlik, iştahanın azalması, bel ağrısı, oynaq ağrısı, yuxarı tənəffüs yolu infeksiyası və qızdırmadır.

Marağınızı çəkə bilər:

• İmmunoterapiyanın yan təsirləri hansılardır və necə idarə edilir?

Bu göstəriş üçün tövsiyə edilən nivolumab dozası, hər 2 həftədən bir 240 mg-dır.

Nivolumabın təsir mexanizmi necədir?

Nivolumab adlı immunoterapiya dərmanı immun sistemi hüceyrələrinin xərçəng hüceyrələrinə daha təsirli hücum etməsini təmin edən immun nəzarət nöqtəsi inhibitorudur. PD-1/PD-L1 qarşılıqlı təsirini hədəfləyərək xərçəng hüceyrəsinin immun sistemi hüceyrələri tərəfindən “dost” kimi qəbul edilməsinə mane olur.

Marağınızı çəkə bilər:

• Daha əvvəl pembrolizumab (Keytruda) adlı immunoterapiya dərmanı da MMR defekti və MSI-H xərçəngi olan xəstələr üçün FDA təsdiqi almışdı.