İmmunoterapiya ilə hər 4 ağciyər xərçəngi xəstəsindən biri 5 ildən çox yaşadı

Əvvəllər müalicə almamış kiçikhüceyrəli olmayan ağciyər xərçəngi (KHDAK) xəstələrinin təxminən dörddə biri pembrolizumab (Keytruda) immunoterapiyası ilə ən az 5 il sağ qalır; bu göstərici PD-L1 müsbət şişi olanlarda daha yüksəkdir. İmmunoterapiyalar irəli mərhələ ağciyər xərçəngində tətbiq edilməzdən əvvəl 5 illik sağqalım cəmi %5 ətrafında idi.

Amerika Klinik Onkologiya Cəmiyyətinin (ASCO) 2019 Konqresində təqdim edilən nəticələr irəli mərhələ kiçikhüceyrəli olmayan ağciyər xərçəngində (KHDAK) pembrolizumabüçün uzunmüddətli effektivlik və təhlükəsizlik izləməsi olan KEYNOTE- 001 adlı klinik tədqiqatdan əldə edilmişdir.

Son 1-2 ilə qədər, metastatik (4-cü mərhələ) KHDAK xəstəsi görəndə 5 il sağqalma şansının %5, bəzən daha az olduğu barədə çox qaranlıq mənzərə çəkməli olurduq.

İndi bu məlumatlara görə pembrolizumab alan irəli mərhələ KHDAK-li hər 4 xəstədən 1-inin ən az 5 il yaşayacağı ağciyər xərçənginə baxışımızı dəyişəcək.

KEYNOTE- 001 tədqiqatının xülasəsi

• Tədqiqat əvvəlcə, EGFR və ya ALK gen mutasiyaları olmayan 550 xəstədən ibarət idi; 100-dən çoxu başlanğıcda əvvəllər müalicə almamışdı.
• ASCO 2019-da median 60 aylıq izləmədən sonra hələ yaşayan 100 xəstə barədə məlumat verildi. Onlar ən az 2 il pembrolizumab almışdılar.
• 5-ci ilin sonunda əvvəllər müalicə almamış xəstələrin % 23-ü, əvvəl müalicə alanların % 16-sı sağ idi.
• PD-L1 ən az %50 müsbət olanlarda bu nisbət müalicə almamışlarda %30, əvvəllər müalicə alanlarda %25 oldu. 
• PD-L1 müsbətliyi %1 ilə %49 arasında olan, əvvəllər müalicə almışlarda 5 illik sağqalım %13, müalicə almamışlarda %16 idi.
• Xüsusilə ən az 2 il pembrolizumab ala bilənlərdə 5 illik ümumi sağqalım müalicə almamışlarda % 78.6, əvvəl müalicə alanlarda %75.8 idi.
• İmmunoterapiya ilə əlaqəli yan təsir 92 xəstədə (%17) bildirildi; ən çox hipotireoz (%9) idi. Ən ciddi yan təsir pnevmonit idi, lakin xəstələrin % 5-indən azında görüldü.
• Pembrolizumab gözlənilməz «uzunmüddətli» yan təsir yaratmamışdı.

- Əlaqəli mövzu: İmmunoterapiya dərmanlarının yan təsirləri nələrdir, necə müalicə olunur?

Şərh

İmmunoterapiyaların ağciyər xərçəngi daxil 10-dan çox əsas xərçəng növünün taleyini 5 ildə əhəmiyyətli dəyişdirdiyinə şahidik. Ən az 2 il pembrolizumab alan kiçikhüceyrəli olmayan ağciyər xərçəngində cavab göstəriciləri çox yüksək, tam cavab isə azdır. Radioloji olaraq aydın cavab verən, amma tam itməyən metastazların uzunmüddətli taleyi bir qədər qeyri-müəyyəndir. Biopsiyada bəzilərinin aktiv xərçəng, digərlərinin çapıq toxuması və ya qranuloma olduğu bildirilir. Bu, gələcək araşdırmalar üçün maraqlı sahə ola bilər. PD-L1 müsbətliyi %1 ilə %49 arasında olanlarda ən uyğun müalicəni – kimyaterapiya ilə birləşdirilməli olub-olmadığını – aydınlaşdırmaq üçün davam edən araşdırmaların nəticələrini gözləməliyik.