Sidik kisəsi xərçəngində əməliyyatdan əvvəl immunoterapiya effektiv və təhlükəsiz hesab edildi

2018 Amerika Xərçəng Tədqiqatları İllik Toplantısında təqdim edilmiş tədqiqata görə əməliyyatdan əvvəl kiçildici (neoadyuvant) məqsədlə tətbiq edilən immunoterapiya dərmanı pembrolizumab (ticarət adı Keytruda), əzələ qatına yayılmış sidik kisəsi xərçəngində təhlükəsiz və effektiv hesab edilmişdir.

Əzələ qatına yayıldığı aşkarlanmış sidik kisəsi xərçənginin müalicəsində müxtəlif yanaşmalar mövcuddur. Bu qrup xəstələrin əməliyyatdan əvvəl kiçildici məqsədlə tətbiq edilən sisplatin əsaslı kombinə kimyaterapiyalardan faydalandığı və bu müalicənin ömrü uzatdığı məlum olsa da, tez-tez radikal sistektomiya adlanan, sidik kisəsinin əməliyyatla tam çıxarılması xəstə və cərrah tərəfindən seçilir. Bu seçimə sidik kisəsi xərçəngində median diaqnoz yaşının 72 olması və bəzi xəstələrin ümumi vəziyyətinin sistemli müalicəyə uyğun olmaması da təsir edir. Bununla belə, 2012-ci ildən sonra klinik praktikamıza daxil olmuş immunoterapiyalar sidik kisəsi xərçənglərində olduqca effektiv hesab edilmişdir. Buna görə kimyaterapiyalardan daha az yan təsirə malik və sidik kisəsi xərçəngində faydalı olduğu göstərilmiş immunoterapiyalar radikal sistektomiya əməliyyatından əvvəl kiçildici müalicə kimi gündəmə gəlmişdir.

• Sidik kisəsi və sidik yolları xərçəngi üçün 3 yeni immunoterapiya təsdiqi

Radikal sistektomiya, xərçəng sidik kisəsinin əzələ qatına və ya səthi olsa da, sidik kisəsinin böyük hissəsinə yayıldıqda tətbiq edilən cərrahi üsuldur. Bu üsulda sidik kisəsi, bütün xərçəngli limfa düyünləri və yaxın orqanlar cərrahi yolla çıxarılır. Sidik kisəsi tam çıxarıldıqda sidiyi saxlayaraq orqanizmdən xaric edəcək sistem yaradılmalıdır.

Əzələ qatına sirayət etmiş sidik kisəsi xərçəngində əməliyyatdan əvvəl kiçildici immunoterapiyanın xəstəlik nəticələrinə təsirini araşdırmaq üçün faza-2 PURE-01 klinik tədqiqatı aparıldı. Tədqiqat çərçivəsində radikal sistektomiya planlaşdırılan 2-ci və 3-cü mərhələ sidik kisəsi xərçəngi olan 34 xəstəyə əməliyyatdan əvvəl kiçildici 3 kurs pembrolizumab 200 mg dozada tətbiq edildi.

Tədqiqatın nəticələri:

• Tədqiqatda 22 xəstənin nəticələri qiymətləndirməyə uyğun hesab edildi.
• Tədqiqatın ən mühüm nəticəsi kimi xəstələrin 7-sində (%31) neoadyuvant müalicəyə patoloji tam cavab əldə edildi. Yəni əməliyyatdan əvvəl tətbiq edilən pembrolizumab ilə bütün xərçəng hüceyrələrinin yox olduğu müəyyənləşdirildi.
• 3 xəstədə isə şişin qeyri-invaziv xəstəlik / karsinoma in situ (pTa / is) mərhələsinə gerilədiyi görüldü.
• Patoloji tam cavab alınmış xəstələrin hamısının PD-L1 baxımından müsbət olduğu görüldü.
• Müalicəyə cavab verən xəstələrin şiş mutasiya yükü (tumor mutation burden, TMB) digər xəstələrə nisbətən əhəmiyyətli dərəcədə yüksək tapıldı.
• Yan təsir kimi 1 xəstədə 3-cü dərəcəli qaraciyər fermenti (ALT) yüksəlməsi, 5 xəstədə daha yüngül digər immun sistemi ilə əlaqəli yan təsirlər müşahidə edildi.

Nəticədə, bu aralıq məlumatlar sonrakı faza-3 tədqiqatı ilə təsdiqlənərsə, sidik kisəsinin əzələ divarına sirayət etmiş xərçənglərin müalicəsində klinik praktikamız dəyişə bilər.

ƏLAQƏLİ MÖVZULAR

• drozdogan.com/mesane-kanseri-tedavisi-erken-evre
• drozdogan.com/idrarda-kan-gelmesinin-10-nedeni