İrəliləmiş mərhələli üçlü mənfi süd vəzi xərçəngi üçün pembrolizumab FDA təsdiqi aldı

13 noyabr 2020-ci ildə ABŞ Qida və Dərman İdarəsi (FDA) şişləri PD-L1 (CPS ≥10) baxımından müsbət olan, metastatik və ya yerli təkrarlanmış, əməliyyat edilə bilməyən üçlü mənfi süd vəzi xərçəngi olan xəstələrin müalicəsi üçün kimyaterapiya ilə birlikdə pembrolizumab (Keytruda) adlı immunoterapiyaya sürətləndirilmiş təsdiq verdi.

FDA həmçinin pembrolizumab üçün üçlü mənfi süd vəzi xərçəngli xəstələrin seçilməsində köməkçi genetik test vasitəsi kimi PD-L1 IHC 22C3 PharmDx-i (Dako North America, Inc.) təsdiqlədi.

KEYNOTE-355 tədqiqatı

Təsdiq əvvəllər metastatik vəziyyətdə kimyaterapiya ilə müalicə edilməmiş, yerli təkrarlayan və cərrahi çıxarıla bilməyən və ya metastatik üçlü mənfi süd vəzi xərçəngli xəstələrdə aparılmış çoxmərkəzli, ikiqat kor, randomizə, plasebo nəzarətli klinik tədqiqat olan KEYNOTE-355-ə əsaslanırdı. Xəstələr venadaxili infuziya ilə hər 3 həftədən bir 1-ci gündə 200 mg pembrolizumab və ya müxtəlif kimyaterapiya müalicələri (nab-paklitaksel və ya paklitaksel, yaxud gemsitabin üstəgəl karboplatin) ilə kombinasiyada plasebo almaq üçün 2:1 nisbətində randomizə edildi.

Əsas effektivlik nəticə ölçüsü PD-L1 ≥10 olan xəstə alt qrupunda yoxlanılmış, korlaşdırılmış müstəqil qiymətləndirmə ilə müəyyən edilən proqressiyasız sağqalım (PFS).

Tədqiqatın əsas nəticəsi

Median PFS pembrolizumab üstəgəl kimyaterapiya qrupunda 9,7 ay (% 95 CI: 7,6, 11,3), plasebo qrupunda isə 5,6 ay (% 95 CI: 5,3, 7,5) idi (HR 0,65;% 95 CI: 0,49, 0,86; birtərəfli p-dəyəri = 0,0012).

Yan təsirlər

KEYNOTE-355-də pembrolizumab üstəgəl kimyaterapiya alan xəstələrdə ən geniş yayılmış (≥ % 20) yan təsirlər yorğunluq, ürəkbulanma, ishal, qəbizlik, qusma, alopesiya, səpgi, öskürək, iştahanın azalması və baş ağrısıdır.

Pembrolizumab üstəgəl kimyaterapiya alan xəstələrdə ən geniş yayılmış (≥ % 20) laborator anormallıqlar anemiya, leykopeniya, neytropeniya, limfopeniya, trombositopeniya, yüksək ALT və AST, hiperqlikemiya, hipoalbuminemiya, artmış qələvi fosfataza, hipokalsemiya, hiponatremiya, hipofosfatemiya və hipokalemiya idi.

Tövsiyə edilən doza

Yerli residivli, rezeksiya edilə bilməyən və ya metastatik üçlü mənfi süd vəzi xərçəngi olan yetkin xəstələr üçün tövsiyə edilən pembrolizumab dozası kimyaterapiyadan əvvəl, xəstəlik irəliləyənədək, qəbuledilməz toksiklik yarananadək və ya 24 ayadək hər 3 həftədən bir 200 mg və ya 6 həftədən bir 400 mg-dır.

Pembrolizumabla birlikdə verildikdə nab-paklitaksel hər 28 gündə 1, 8 və 15-ci günlərdə 100 mg/m2, yaxud pankştaksel hər 28 gündə 1, 8 və 15-ci günlərdə 90 mg/m2, yaxud gemsitabin 1000 mg/m2 üstəgəl karboplatin AUC 2 mg/ml/dk hər 21 gündə 1-ci və 8-ci günlərdə venadaxili infuziya ilə tətbiq edilir.

Üçlü mənfi süd vəzi xərçəngində immunoterapiyalar

Daha əvvəl, 8 mart 2019-cu ildə FDA PD-L1 müsbət, cərrahi çıxarıla bilməyən yerli irəliləmiş və ya metastaz vermiş üçlü mənfi süd vəzi xərçənginin birinci sıra müalicəsi üçün nab-paklitalsek kimyaterapiyası ilə birlikdə atezolizumaba (Tecentriq) sürətləndirilmiş təsdiq vermişdi. Yeni Keytruda təsdiqi ilə süd vəzi xərçəngində 2 fərqli immunoterapiya təsdiqləndi. Əvvəlki atezolizumab təsdiqi ilə yeni pembrolizumab təsdiqi arasındakı diqqətçəkən fərq budur: atezolizumab bütün PD-L1 müsbət hallar üçün təsdiqləndiyi halda, pembrolizumab PD-L1 ≥10 olan xəstələr üçün təsdiqləndi və pembrolizumab nab-paklitakseldən başqa kimyaterapiyalarla da istifadə edilə bilər.

Üçlü mənfi süd vəzi xərçəngində kimyaterapiyaya atezolizumab əlavə edildikdə bildirilən median proqressiyasız sağqalım müddəti 7.5 ay, plasebo qrupunda isə 5 ay idi.