პემბროლიზუმაბის იმუნოთერაპიამ ადრეული სამმაგად უარყოფითი ძუძუს კიბოსთვის FDA-ს დამტკიცება მიიღო

2021 წლის 26 ივლისს FDA -მ (აშშ-ის სურსათისა და მედიკამენტების ადმინისტრაციამ), ნეოადიუვანტური (ოპერაციამდე შემამცირებელი) მკურნალობის სახით ქიმიოთერაპიასთან ერთად, შემდეგ კი ოპერაციის შემდგომი ადიუვანტური მონოთერაპიის გასაგრძელებლად მაღალი რისკის, ადრეული სტადიის სამმაგად (ტრიპლ) უარყოფითი ძუძუს კიბოს დროს პემბროლიზუმაბი (Keytruda, Merck) სახელწოდების იმუნოთერაპია დაამტკიცა.

FDA-მ ასევე ქიმიოთერაპიასთან კომბინაციაში პემბროლიზუმაბის სრული დამტკიცება გასცა იმ პაციენტებისთვის, რომელთა სიმსივნე FDA-ს მიერ დამტკიცებული ტესტით PD-L1-ს (კომბინირებული დადებითი ქულა [CPS] ≥10) ექსპრესირებს და აქვთ ადგილობრივად მორეციდივე არაოპერაბელური ან მეტასტაზური სამმაგად უარყოფითი ძუძუს კიბო. FDA-მ ამ ჩვენებისთვის პემბროლიზუმაბს 2020 წლის ნოემბერში დაჩქარებული დამტკიცება მისცა.

კვლევა, რომელმაც პემბროლიზუმაბს ადრეული ძუძუს კიბოს დროს FDA-ს დამტკიცება მოუტანა

პემბროლიზუმაბის ეფექტიანობა ნეოადიუვანტურ ქიმიოთერაპიასთან კომბინაციაში, შემდგომი ოპერაციითა და პემბროლიზუმაბის მონოთერაპიით გაგრძელებული ადიუვანტური მკურნალობით, შეისწავლეს 1174 პაციენტში ჩატარებულ რანდომიზებულ, მულტიცენტრულ, ორმაგად ბრმა, პლაცებოკონტროლირებულ KEYNOTE-522 კვლევაში.

პაციენტებს ჰქონდათ ახლად დიაგნოსტირებული და მანამდე უმკურნალებელი მაღალი რისკის ადრეული სამმაგად უარყოფითი ძუძუს კიბო. მაღალი რისკი ასე განისაზღვრა: სიმსივნე 1 cm-ზე მეტია, მაგრამ დიამეტრი ≤2 cm და ლიმფური კვანძებია ჩართული, ან სიმსივნის დიამეტრი 2 cm-ზე მეტია კვანძების სტატუსის მიუხედავად; სხვა სიტყვებით, T1c N1-2 ან T2-4 N0-2. პაციენტები სიმსივნის PD-L1 ექსპრესიისგან დამოუკიდებლად ჩაირთნენ კვლევაში.

პაციენტები შემთხვევითად, 2:1 თანაფარდობით 2 ჯგუფში გადანაწილდნენ: პემბროლიზუმაბი ქიმიოთერაპიასთან ერთად ან პლაცებო ქიმიოთერაპიასთან ერთად.

შედეგები

ეფექტიანობის ძირითადი საზომები იყო პათოლოგიური სრული პასუხის მაჩვენებელი და მოვლენის გარეშე გადარჩენადობა .

• პემბროლიზუმაბისა და ქიმიოთერაპიის კომბინაციის მიმღებ პაციენტებში პათოლოგიური სრული პასუხის მაჩვენებელი 64,8% იყო (95% სანდოობის ინტერვალი: 59,5, 66,4), მხოლოდ ქიმიოთერაპიის ჯგუფში კი — 51% (95% სანდოობის ინტერვალი: 50,6, 60,6).
• მოვლენის გარეშე გადარჩენადობის მაჩვენებლები, შესაბამისად, 91,3% და 85,3% იყო (HR 0,63; 95% სანდოობის ინტერვალი: 0,43, 0,93).

გვერდითი ეფექტები

პემბროლიზუმაბისა და ქიმიოთერაპიის კომბინაციის კვლევებში პაციენტების ≥ 20%-ში ყველაზე ხშირად აღწერილი გვერდითი ეფექტები იყო დაღლილობა/ასთენია, გულისრევა, შეკრულობა, დიარეა (ფაღარათი), მადის დაქვეითება, გამონაყარი, ღებინება, ხველა, დისპნოე (სუნთქვის გაძნელება), სიცხე, ალოპეცია (თმის ცვენა), პერიფერიული ნეიროპათია, ლორწოვანი გარსის ანთება, სტომატიტი (პირის წყლულები), თავის ტკივილი, წონის კლება, მუცლის ტკივილი, ართრალგია, მიალგია და უძილობა.

სამმაგად უარყოფითი ძუძუს კიბოსთვის პემბროლიზუმაბის რეკომენდებული დოზაა 200 mg ყოველ 3 კვირაში ან 400 mg ყოველ 6 კვირაში, ყოველ 30 წუთში ინტრავენური ინფუზიის სახით. პემბროლიზუმაბი 24 კვირის განმავლობაში ნეოადიუვანტურად ქიმიოთერაპიასთან ერთად გამოიყენება, შემდეგ კი 27 კვირამდე ადიუვანტურად ერთი პრეპარატის სახით.

*

ქვემოთ ნაჩვენებია პათოლოგიური სრული პასუხის მქონე პაციენტების ანალიზი სხვადასხვა ქვეჯგუფის მიხედვით: