Ağciyər və qalxanabənzər vəzi xərçənglərində görülən RET mutasiyasına yönəlmiş İLK MÜALİCƏ FDA təsdiqi aldı: Selpercatinib

8 may 2020-ci ildə ABŞ Qida və Dərman İdarəsi (FDA) şişlərində RET genetik dəyişikliyi (mutasiya və ya fuziya) olan kiçik hüceyrəli olmayan ağciyər xərçəngi, medullyar qalxanabənzər vəzi xərçəngi və digər qalxanabənzər vəzi xərçəngi növləri olmaqla üç şiş tipinin müalicəsi üçün selpercatinib (Retevmo) kapsullarına sürətləndirilmiş təsdiq verdi. Selpercatinib RET gen dəyişiklikləri olan xərçəng xəstələrinə xüsusi təsdiqlənmiş ilk müalicədir.

Xərçəngi başladan və yayılmasına səbəb olan müəyyən gen dəyişikliklərini hədəfləyən müalicələrdəki yeniliklər – bunlara ağıllı xərçəng dərmanları deyirik – sürətlə onkologiya praktikasına daxil olmağa davam edir.

Selpercatinibin müalicə üçün FDA təsdiqi aldığı xərçənglər bunlardır:

• İrəliləmiş RET fuziyası müsbət kiçik hüceyrəli olmayan ağciyər xərçəngi (KHDAK),
• Sistemli müalicəyə ehtiyacı olan RET mutasiyası müsbət, 12 yaş və yuxarı irəliləmiş medullyar qalxanabənzər vəzi xərçəngi və
• Radioaktiv yod müalicəsinə cavab verməyən və ya radioaktiv yod müalicəsinə uyğun olmayan, sistemli müalicə tələb edən 12 yaş və yuxarı xəstələrdə irəliləmiş RET fuziyası müsbət qalxanabənzər vəzi xərçəngi.

Selpercatinib kinaza inhibitorudur, yəni bir ferment növünü (kinaza) bloklayır və xərçəng hüceyrələrinin böyüməsinin qarşısını almağa kömək edir. Müalicədən əvvəl laboratoriya testi ilə RET gen dəyişikliyi müəyyən edilməlidir.

RET geni bir protoonkogendir və tirozin kinaza hüceyrə səthi reseptoru olan RET reseptorunu kodlayır. Bu genin həm funksiya itkisi (məsələn, Hirschsprung xəstəliyi), həm də həddindən artıq/səhv aktivləşməsi (məsələn, xərçənglər) müxtəlif xəstəliklər yaradır.

Aşağıda RET genetik dəyişikliklərinin növlərini və bu 3 xərçəng növündə və başqa xərçənglərdə tezliklərini görmək olar.

Selpercatinibə (Retevmo) FDA təsdiqi gətirən klinik tədqiqat: LIBRETTO-001

FDA Retevmonu üç şiş tipinin hər birini əhatə edən faza I/II LIBRETTO-001 adlı klinik tədqiqatın nəticələri ilə təsdiqlədi. Klinik tədqiqat zamanı xəstələrə xəstəlik irəliləyənə və ya qəbuledilməz yan təsir yaranana qədər gündə iki dəfə 160 mg selpercatinib kapsulu içirildi. Əsas effektivlik nəticə ölçüləri şişi müəyyən qədər kiçilən xəstələrin faizini və cavab müddətini əks etdirən ümumi cavab nisbəti idi.

Əvvəllər platin əsaslı kimyaterapiya ilə müalicə edilmiş RET fuziyası müsbət kiçik hüceyrəli olmayan ağciyər xərçəngli (KHDAK) 105 yetkin xəstədə selpercatinibin effektivliyi qiymətləndirildi. 105 xəstə üçün ümumi cavab nisbəti % 64 idi. Müalicəyə cavab verən xəstələrin % 81-də cavabları ən azı 6 ay davam etdi. Effektivlik əvvəllər heç müalicə almamış RET fuziyası müsbət KHDAK olan 39 xəstədə də qiymətləndirildi. Bu xəstələr üçün ümumi cavab nisbəti % 84 idi. Müalicəyə cavab verən xəstələrin % 58-də cavablar ən azı altı ay davam etdi.

Yetkinlərdə və pediatrik medullyar qalxanabənzər vəzi xərçəngində (MTK) selpercatinibin effektivliyi RET-mutant 12 yaş və yuxarı xəstələrdə qiymətləndirildi. Tədqiqata əvvəllər cabozantinib, vandetanib və ya hər ikisi ilə müalicə edilmiş irəliləmiş və ya metastatik RET-mutant MTK olan 143 xəstə və əvvəllər cabozantinib və ya vandetanib ilə müalicə edilməmiş irəliləmiş və ya metastatik RET-mutant MTK olan xəstələr daxil edildi. Əvvəllər müalicə almış 55 xəstə üçün ümumi cavab nisbəti % 69 idi. Müalicəyə cavab verən xəstələrin % 76-da cavabları ən azı 6 ay davam etdi. Əvvəllər müalicə almamış 88 xəstə üçün ümumi cavab nisbəti % 73 idi. Bu xəstələr arasında müalicəyə cavab verənlərin % 61-də cavabları ən azı 6 ay davam etdi.

RET fuziyası müsbət qalxanabənzər vəzi xərçəngi üçün selpercatinibin effektivliyi 12 yaş və yuxarı yetkin və pediatrik xəstələrdə qiymətləndirildi. Tədqiqata radioaktiv yod (RAİ) müalicəsinə müqavimət yaranan və əvvəllər başqa sistemli müalicə almış RET fuziyası müsbət qalxanabənzər vəzi xərçəngli 19 xəstə və əvvəllər başqa sistemli müalicə almamış, lakin radioaktiv yod müalicəsinə müqavimət yaranmış RET fuziyası müsbət qalxanabənzər vəzi xərçəngli 8 xəstə qeydiyyata alındı. Əvvəllər müalicə edilmiş 19 xəstə üçün ümumi cavab nisbəti % 79 idi. Müalicəyə cavab verən xəstələrin % 87-də cavabları ən azı 6 ay davam etdi. RAİ-dən başqa müalicə almamış 8 xəstədə ümumi cavab nisbəti % 100 idi. Bu xəstələr arasında müalicəyə cavab verənlərin % 75-də cavabları ən azı 6 ay davam etdi.

Selpercatinib ilə bildirilən ən geniş yayılmış yan təsirlər qaraciyərdə aspartat aminotransferaza (AST) və alanin aminotransferaza (ALT) fermentlərinin artması, qan şəkərinin yüksəlməsi, ağ qan hüceyrələrinin sayının azalması, qanda albuminin azalması, qanda kalsiumun azalması, ağız quruluğu, ishal, kreatinin artması (böyrək funksiyasını ölçür), qələvi fosfatazanın artması (qaraciyər və sümüklərdəki ferment), hipertoniya, yorğunluq, bədəndə və ya ətraflarda şişmə, qan trombositlərinin sayının azalması, xolesterinin artması, səpgi, qəbizlik və qanda natriumun azalmasıdır.

Selpercatinib hepatotoksiklik (qaraciyər zədəsi), yüksək qan təzyiqi, ürək qrafikası EKQ-də QT uzanması (ürək əzələsinin vurğular arasında dolması normaldan uzun çəkir), qanaxma və allergik reaksiyalar kimi ciddi yan təsirlər yarada bilər. Xəstədə hepatotoksiklik görülərsə, selpercatinib dozası azaldılmalı və ya həmişəlik dayandırılmalıdır. Selpercatinib qrupu dərmanlar yara sağalmasında ciddi gecikmələr yarada bilər, buna görə əməliyyatdan əvvəl və sonra diqqətlə planlaşdırılmalıdır.

Selpercatinib inkişaf edən dölə və ya yenidoğulmuş körpəyə zərər verə bilər. Səhiyyə mütəxəssisləri hamilə qadınları bu risk barədə məlumatlandırmalı və həm reproduktiv potensialı olan qadınlara, həm də belə qadın partnyoru olan kişilərə selpercatinib müalicəsi zamanı və son dozadan bir həftə sonra effektiv doğum nəzarəti üsulu istifadə etməyi tövsiyə etməlidir. Həmçinin qadınlar selpercatinib qəbul edərkən süd verməməlidirlər.

Selpercatinib (Retevmo) ciddi və ya həyati təhlükəli xəstəlikləri müalicə edən, adətən mövcud müalicələrə nisbətən əhəmiyyətli üstünlük verən dərmanların təsdiqinə imkan yaradan FDA-nın “Sürətləndirilmiş Təsdiq” yolu ilə təsdiqlənib. Bundan əlavə Retevmo nadir xəstəliklər üçün dərmanların inkişafına kömək və təşviq üçün stimullar verən “Yetim Dərman” statusunu da almışdı.

*

Xarici məzmunu görmək üçün seçimləri tənzimləyin

Xarici məzmunu görmək üçün seçimləri tənzimləyin