Xərçəngin təkrar qorxusunun öhdəsindən gəlmək üçün 6 tövsiyə
Xərçəng müalicəsinin sonunda gözlənilməz qarışıq duyğular yarana bilər. Müalicənin bitməsi və sağalmanın verdiyi xoşbəxtliklə bir tərəfdən daha sağlam ola, digər tərəfdən gələcəkdə sizi nəyin gözlədiyindən əmin olmayıb narahatlıq keçirə bilərsiniz. Xüsusilə xərçəngin təkrar, yəni residiv ehtimalı təşviş və stress səviyyənizi artıra bilər. Bu yazıda duyğuların öhdəsindən gəlməyə kömək edən 6 tövsiyə verəcəyik.
1- Sizi tətikləyən şeyi tapın
Əksər insanlar xərçəngin təkrarı barədə güclü narahatlıq yaşayarkən bu hissləri xüsusilə tətikləyib daha güclü hiss etdirən vəziyyətlər ola bilər. Məsələn, diaqnoz və ya əməliyyatın ildönümü və ya xərçəng səbəbindən itirdiyiniz şəxsin doğum günü kimi anlar əziyyət hisslərini tətikləyə və unutmağa çalışdığınız çətin vaxtları xatırlada bilər. Digər tərəfdən, bədəninizdə dəyişiklik və ya bir yerdə düyün hiss etsəniz, bunlar da tətikləyici ola bilər. Məsələn, sadə baş ağrısı xərçəng müalicəsindən sonra bu şəxslərə beyin şişi kimi görünə və təşviş yarada bilər. Sizi tətikləyən vəziyyətləri tapın.
2- Plan qurun
Xərçəng müalicəsindən sonra müəyyən fasilələrlə testlər etdirməlisiniz. Test görüşünün gününü düşünmək stress yarada bilər. Həmin günə dair mənfi düşüncələri uzaqlaşdırmaq və xərçəngi düşünməmək üçün fəaliyyət siyahısı hazırlayın. Özünüzü gəzinti, dostlarla görüş, əl işi, oyun oynamaq kimi fəaliyyətlərə sövq edin və bu duyğunun keçəcəyini unutmayın.
3- Bu barədə danışın
Xərçəng müalicəniz zamanı ailəniz və dostlarınız ən mühüm dəstəkçilərinizdir. Lakin müalicə bitdikdən sonra təşvişinizin davam etdiyini anlamaya bilərlər. Müalicə zamanı emosional dəstəklərindən məmnun olduğunuzu bildirin və təşəkkür edin.
Sizin yaşadıqlarınızı yaşamış başqa insanlarla danışmaq rahatladır. Narahatlıqlarınızı müzakirə edə biləcəyiniz dəstək qruplarının proqramlarına qoşula bilərsiniz. Xərçəng müalicəsi alan və müalicəsi bitmiş şəxslərin dərnəyinə və ya icmasına qoşulmaq onların arasında qorxularınızı müzakirə etmək imkanı da verir.
4- Sağlamlığınıza fokuslanın
Təşvişi azaltmaq və daha rahat hiss etmək üçün tamamlayıcı müalicələrdən dəstək ala bilərsiniz, məsələn; akupunktur, musiqi terapiyası, art-terapiyalar, yoqa, meditasiya. Sizə daha yaxşı hiss etdirirsə, dua və ibadət də rahatladıcı ola bilər.
Ümumi sağlamlığınız üçün sağlam və balanslı pəhriz zəruridir. Sağlam qidalanma ilə yanaşı idman da çox vacibdir. Bu vərdişləri qazandıqda daha yaxşı hiss edəcək və həyatınızdakı bəzi şeylərə nəzarət edilə bildiyini anlayacaqsınız.
5- Məsləhət dəstəyi alın
Sosial xidmət mütəxəssisləri, üstünlük olaraq psixoonkologiya sahəsində təcrübəli psixoloq və psixiatrlar xərçəng təcrübəsinin normal hissəsi kimi xəstəliyin təkrar riskini qəbul etməyə kömək edirlər. Məsləhətləşə biləcəyiniz bu mütəxəssislər qorxularınızı aradan qaldırmağa və həyatınız barədə planlar qurmağa kömək edə bilərlər. Xərçəngin təkrar qorxusuna qarşı təşviş və depressiyanı azaltmağa kömək etdiyi göstərilmiş psixoterapiya forması kimi koqnitiv davranış terapiyası faydalı ola bilər. Koqnitiv terapiya öz-özünə yaranan düşüncə nümunələrini müəyyən edib dəyişdirməyə kömək edən danışıq terapiyasıdır. Davranış terapiyası ilə birləşdirilərək qeyri-sağlam inanc və davranışların müəyyən edilməsinə və müsbət dəyişməsinə kömək edir. Dayandırıla bilməyən və həyat keyfiyyətinə təsir edən bəzi düşüncələr üçün dərman dəstəyi lazım ola bilər. Mütəxəssislə görüşmək faydalıdır.
6- Özünüzə qarşı səbirli olun
Adətən xərçəngin təkrar qorxusu zamanla yüngülləşir. Tam yox olmasa da, həkim və test görüşləri arasındakı vaxt uzandıqca, fərqli fəaliyyətlərə və sağlam həyat vərdişlərinə fokuslandıqca bu qorxu azalır.
ƏLAQƏLİ MÖVZULAR:
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.
Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.