HPV-დადებითი თავისა და კისრის კიბოს ფსიქოლოგიურ და სოციალურ გავლენასთან გამკლავება

ადამიანის პაპილომავირუსი (HPV) და თავისა და კისრის არეში ყველაზე ხშირი კიბო, ბრტყელუჯრედოვანი კარცინომა, მათ შორის კავშირი ონკოლოგიის ერთ-ერთი ახალი საკითხია და კიბოს სფეროში მომუშავე ყველა წრის ყურადღება მიიპყრო.

საყურადღებოა, რომ HPV-დადებითი თავისა და კისრის კიბო ჩვეულებრივ უფრო ახალგაზრდა, კარგ ფიზიკურ ფორმაში მყოფ და ჯანმრთელობის სხვა პრობლემების არმქონე პირებში გვხვდება. თავისა და კისრის კიბოს ეს სახე შეიძლება მოწევასა და ალკოჰოლის მსგავს რისკფაქტორებთან დაკავშირებულიც არ იყოს. HPV-თან დაკავშირებული თავისა და კისრის კიბოს მქონე პაციენტები, რომელთა საშუალო ასაკიც კლასიკურ შემთხვევებზე უფრო ახალგაზრდაა, დიაგნოზისას HPV-თან კავშირის გაგების შედეგად თავს დაუცველად შეიძლება გრძნობდნენ. მიუხედავად იმისა, რომ დიაგნოსტიკისა და მკურნალობისას ფსიქოლოგიური დისკომფორტი მეტად მნიშვნელოვანია, ამაზე მიმანიშნებელი კვლევა ძალიან ცოტაა.

HPV ინფექციასთან დაკავშირებული თავისა და კისრის კიბოს მკურნალი ექიმები უნდა ავითარებდნენ ამ დაავადების სპეციფიკურ კომუნიკაციას, ასევე სქესობრივი ჯანმრთელობის, ფსიქოსოციალური მხარდაჭერისა და HPV-ზე სხვა შიშების განეიტრალების უნარებს. ეს სტატია მოვამზადეთ როგორც ექიმების, ისე თავისა და კისრის კიბოს მქონე პაციენტებისა და მათი ახლობლების გზამკვლევად.

HPV-თან დაკავშირებული თავისა და კისრის კიბოს სიხშირე და მნიშვნელობა

HPV ინფექციასთან დაკავშირებული ბრტყელუჯრედოვანი თავისა და კისრის კიბოს წილი ბოლო ოცი წლის განმავლობაში მნიშვნელოვნად გაიზარდა. თავისა და კისრის კიბოებს შორის HPV-დადებითი შემთხვევების წილი 2002-დან 2011 წლამდე მამაკაცებში % 47-ით და ქალებში % 38-ით გაიზარდა.

თავისა და კისრის კიბოებს შორის განსაკუთრებით ენის, სასისა და ტონზილის (ნუშურა ჯირკვლის) კიბოს სიხშირე იზრდება. HPV-დადებითი თავისა და კისრის კიბოს რისკფაქტორებად შეიძლება დასახელდეს მრავალი სქესობრივი პარტნიორი, საშუალო ასაკი, მოწევა და დაბალი სოციალურ-ეკონომიკური დონე.

ეს ოროფარინქსის (პირის ღრუსა და ცხვირ-ხახის არე) კიბოები სიცოცხლის განმავლობაში 6 და მეტი სქესობრივი პარტნიორისა და 4 ან მეტი ორალური სექსის პარტნიორის ისტორიას უკავშირდება. ნუშურა ჯირკვლის კიბო დაკავშირებულია სიცოცხლის განმავლობაში 4 ან მეტ ორალური სექსის პარტნიორთან და მამაკაცთა ჰომოსექსუალურ ურთიერთობებში უფრო ადრეულ ასაკში ორალურ სექსთან. ქალებში ენის ფუძის კიბო ორალურ სექსს დაუკავშირდა. თუმცა ეს რისკი, მართალია, რამდენიმე სქესობრივი პარტნიორისას მეტია, მაგრამ ერთი პარტნიორის შემთხვევაშიც არსებობს.

- დაკავშირებული თემა: თავისა და კისრის კიბოების სიმპტომები

კავშირი გამოვლინდა დროთა განმავლობაში სქესობრივი ქცევის ცვლილებასა და HPV-თან დაკავშირებული თავისა და კისრის კიბოს რისკის ზრდას შორის.

აზიის მოსახლეობის მონაცემებით, ორსული ქალიდან ბავშვს HPV (განსაკუთრებით HPV 16 ქვეტიპი) როგორც საკეისრო კვეთით, ისე ბუნებრივი მშობიარობით შეიძლება გადაეცეს. ლიტერატურაში არსებობს კვლევები, რომლებიც აჩვენებს, რომ საკეისრო კვეთა დედიდან შვილზე HPV-ის გადაცემას % 46-ით ამცირებს, თუმცა HPV-დადებითი დედებისგან საკეისრო კვეთით დაბადებული ბავშვების % 15-შიც გამოვლინდა HPV. უფრო ახალი კვლევები კი მივიდა დასკვნამდე, რომ დედიდან შვილზე HPV-ის გადაცემაში საკეისროსა და ბუნებრივ მშობიარობას შორის განსხვავება არ არის.

- დაკავშირებული თემა: გადადის HPV ორსულობისას დედიდან შვილზე? როგორ გადადის HPV და შესაძლებელია მისგან დაცვა? (დაწვრილებით)

რეკომენდაციები HPV-თან დაკავშირებული ბრტყელუჯრედოვანი თავისა და კისრის კიბოს მკურნალობისას

HPV-დადებითი თავისა და კისრის კიბოს მკურნალმა ონკოლოგებმა უნდა გაითვალისწინონ:

• დიაგნოზის განხილვა, 
• პაციენტის ინფორმირება, თუ მისი თავისა და კისრის კიბო HPV-დადებითია (სიმსივნურ ქსოვილში PZR ტესტით HPV DNA-ის სკრინინგით შეიძლება ამ დიაგნოზის დადგენა),
• მზადყოფნა HPV-სა და სქესობრივ ქცევაზე კონკრეტულ კითხვებზე პასუხისთვის,
• პაციენტის ემოციურ რეაქციებთან გამკლავება,
• პაციენტის ფსიქოსოციალური საჭიროებების შეფასება.

კომუნიკაციის თვალსაზრისით, ონკოლოგებმა თავისა და კისრის კიბოსა და HPV ინფექციას შორის კავშირზე უნდა ისაუბრონ. HPV სქესობრივი გზით გადამდები ინფექციაა, რის გამოც ამ პაციენტებში დანაშაულისა და შფოთვის გრძნობებმა კიბოს დიაგნოსტიკის პროცესის მიღება შეიძლება გაართულოს. მეუღლეებისა და ნათესავების რეაქციებმაც შეიძლება დიაგნოზთან გამკლავება გაუძნელოს.

- დაკავშირებული თემა: როგორი უნდა იყოს პაციენტის, ახლობლისა და ექიმის კომუნიკაცია?

ონკოლოგის მიერ დიაგნოზის ახსნისას წარმართული დიალოგის ფორმამ შემდგომი ურთიერთობის დონესა და ბუნებაზე შეიძლება იმოქმედოს. HPV-დადებითი თავისა და კისრის კიბოს დიაგნოზთან დაკავშირებული გაურკვევლობებისა და დროთა განმავლობაში წარმოქმნილი მრავალი კითხვისთვის მოსამზადებლად პაციენტებს შეიძლება სასწავლო მასალა მიეწოდოს და კომუნიკაციის არხები ღია დარჩეს.

ონკოლოგები და სხვა ექიმები მზად უნდა იყვნენ რისკფაქტორებზე, HPV-ის გადაცემის გზებსა და ზოგჯერ სექსუალობასთან დაკავშირებულ შიშებზე სასაუბროდ.

ონკოლოგებს შეიძლება მოუწიოთ სქესობრივი გზით გადამდებ ინფექციებსა და წინა სქესობრივ ჩვევებზე რჩევების მიცემა, სქესობრივ აქტთან, ვირუსის გადაცემის რისკთან და ზოგჯერ ერთგულებასთან დაკავშირებულ შიშებთან გამკლავება.

როგორ და როდის შეიძლებოდა პირის ღრუს HPV ინფექცია მიმეღო?

HPV ინფექციის მქონე ზოგი ადამიანისგან, განსაკუთრებით ორალური, ვაგინალური ან ანალური სქესობრივი კონტაქტით, HPV თქვენს კანზე ან ლორწოვანზე (კანის ნოტიო ნაწილებზე, როგორიცაა პირის ღრუ) შეიძლება გადმოვიდეს და გავრცელდეს.

პირში კოცნით HPV-ის გადაცემა სადავოა. სექსის სათამაშოების მსგავსი პროდუქტების, სიგარეტის, ტუჩსაცხის ან კბილის ჯაგრისის გაზიარებით გადაცემა კი შესაძლებელია. მიუხედავად იმისა, რომ პირის ღრუს HPV ინფექცია ანალურ და გენიტალურ ინფექციაზე ნაკლებად ხშირია, საწყისი ადგილის ზუსტად დადგენა ძალიან რთულია. ინფექცია შეიძლება მრავალი წლის ან ათწლეულების წინ მიიღეთ, ანუ HPV კიბოს გამოვლენამდე დიდი ხნით ადრე შეიძლებოდა გადმოგცემოდათ.

ზოგი კვლევის მიხედვით, ორალური სექსი ოროფარინქსის (პირის ღრუსა და ცხვირ-ხახის არე) HPV-16 ინფექციის მთავარი წყაროა. ბევრი მოხსენებაც აჩვენებს ორალურ სექსსა და HPV-თან დაკავშირებულ ოროფარინქსის კიბოს შორის კავშირს. მიუხედავად ამ მდგომარეობისთვის მიზეზშედეგობრივი კავშირის ნათელი მტკიცებულებისა, კარცინოგენეზის (კიბოს წარმოქმნის) პროცესის მოლეკულური დეტალები დაზუსტებული არ არის.

ექიმებმა პაციენტის სქესობრივი აქტივობების გამოკითხვის გარეშე უნდა ახსნან HPV ინფექციასა და თავისა და კისრის კიბოს შორის მიზეზშედეგობრივი კავშირი და მისი მნიშვნელობა.

პრეზერვატივის გამოყენებით HPV ინფექციის გადაცემის რისკი შეიძლება შემცირდეს. თუმცა არსებული მონაცემები არათანმიმდევრულია და ვერ ვიტყვით, რომ პრეზერვატივი HPV-ის გადაცემას უპირობოდ აფერხებს. სამწუხაროდ, პირის ღრუს HPV-ის გადაცემისას ზუსტი გზა არ არსებობს იმის წინასწარმეტყველებისთვის, ვისი ინფექცია გაივლის თავისით ან, პირიქით, ვის განუვითარდება კიბო.

HPV ინფექციის დაწყების შემდეგ პირებში 2 წლის განმავლობაში იმუნური სისტემაინფექციას %90 შემთხვევაში აკონტროლებს.

- დაკავშირებული თემა: სექსუალობა და სქესობრივი ცხოვრება კიბოს დროს

ჩემს ოჯახის წევრს / მეუღლეს HPV-დადებითი თავისა და კისრის კიბო დაუდგინდა, რა უნდა გავაკეთო?

სამედიცინო პერსონალი უნდა ცდილობდეს პაციენტის სქესობრივი ცხოვრების ნორმალიზების ხელშემწყობი მხარდაჭერისა და ინფორმაციის მიწოდებას. პაციენტის HPV სტატუსსა და კიბოს შორის კავშირი მიუკერძოებლად და განსჯის გარეშე უნდა ეცნობოს, რათა დანაშაულის გრძნობის შესაძლებლობა შემცირდეს. HPV-დადებითი თავისა და კისრის კიბოს მქონე ბევრ პაციენტს მრავალი სქესობრივი პარტნიორი არ ჰყოლია; HPV შეიძლება წინა პარტნიორებისგან იყოს მიღებული, მთელი სიცოცხლე ატარებდნენ და წლების განმავლობაში მიძინებული რჩებოდეს.

უნდა იცოდეთ, რომ ეს ჩვეულებრივი/ნორმალური ფიზიკური კონტაქტით გავრცელებული ვირუსი არ არის. ასევე არ არსებობს მონაცემი, რომელიც საერთო ტუალეტით გადაცემას ამტკიცებს. თუ HPV-დადებითი თავისა და კისრის კიბო წარმატებით განიკურნა, მომავალ პარტნიორებზე ინფექციის გადაცემის ალბათობაც დაბალია.

ჩემი HPV-დადებითი კიბოს გამო მეუღლესაც კიბოს მაღალი რისკი აქვს? რა უნდა გაკეთდეს ამ რისკისგან დასაცავად?

ქალებმა საშვილოსნოს ყელის ნაცხის სკრინინგის შემცველი ჩვეულებრივი გინეკოლოგიური შემოწმებები რეგულარულად უნდა ჩაიტარონ. მამაკაცი პარტნიორებისთვის HPV-ის სტანდარტული სკრინინგული ტესტი არ არსებობს. HPV-დადებითი კიბოს დიაგნოზის შემდეგ პარტნიორის კიბოს რისკი კვლავ სადავოა. ზოგ კვლევაში, საშვილოსნოს ყელის კიბოს მქონე ქალების — ხოლო საშვილოსნოს ყელის კიბოს თითქმის ყველა შემთხვევა HPV ინფექციითაა გამოწვეული — მამაკაც პარტნიორებში HPV-დადებითი ენისა და ნუშურა ჯირკვლის კიბოს რისკი 2.4-დან 2.7-ჯერ გაზრდილი იყო. სხვა კვლევები კი აჩვენებს, რომ HPV-დადებითი თავისა და კისრის კიბოს მქონე პაციენტთა პარტნიორებს ზოგად პოპულაციასთან შედარებით პირის ღრუს HPV ინფექციის რისკი არ ეზრდებათ.

კიბოს მკურნალობის შემდეგ HPV DNA ჩვეულებრივ პირის ღრუს უჯრედებში აღარ ვლინდება. თუმცა ინფექცია შეიძლება ფარულად/მიძინებულად დარჩეს და მოგვიანებით კვლავ გააქტიურდეს.

რას ნიშნავს ჩემი კიბოს HPV-დადებითობა?

ვიცით, რომ HPV-დადებითი თავისა და კისრის კიბოს დროს, HPV-უარყოფითთან შედარებით, სიცოცხლის ხანგრძლივობა და დაავადების შედეგები უფრო ხელსაყრელია . სიმსივნის HPV-დადებითი სტატუსი გადარჩენის მაჩვენებელს მნიშვნელოვნად ზრდის და HPV-დადებითობა თავისა და კისრის კიბოს ყველაზე მნიშვნელოვანი პროგნოზული (დაავადების მიმდინარეობის წინასწარმეტყველი) ფაქტორია.

არსებობს რისკი, რომ HPV ინფექციამ AIDS ან HIV ინფექცია გამოიწვიოს?

AIDS-ის გამომწვევი HIV და HPV ორი განსხვავებული ვირუსია, რომელთა შორის პირდაპირი კავშირი არ არის. ორივე ვირუსი შეიძლება სქესობრივი გზით გადაეცეს; თუ სქესობრივი აქტივობისას პრეზერვატივის მსგავს დაცვას არ იყენებთ, შეიძლება HIV-ით დაინფიცირდეთ, თუმცა HPV-სა და HIV-ს კავშირი არ აქვს.

- დაკავშირებული თემა: HIV ინფექციასთან დაკავშირებული კიბოები და სხვა დაავადებები (დაწვრილებით)

როგორია თამბაქოსა და ალკოჰოლის კავშირი თავისა და კისრის კიბოსთან?

სიგარეტისა და ალკოჰოლის მოხმარება თავისა და კისრის კიბოს ორი დამოუკიდებელი და წამყვანი რისკფაქტორია. თუმცა HPV-დადებითი კიბო შეიძლება განვითარდეს იმის მიუხედავად, ეწევა თუ სვამს ადამიანი. ამასთან, მოწევა თავისა და კისრის არეში HPV ინფექციის რისკს ზრდის. გარდა ამისა, მწეველებში განვითარებული HPV-დადებითი თავისა და კისრის კიბოს პროგნოზი (დაავადების მიმდინარეობა და შედეგები) ზოგადად უარესია.

სიგარეტისა და ალკოჰოლის კომბინირებული მოხმარება თავისა და კისრის კიბოს რისკს ზრდის როგორც HPV-დადებით, ისე HPV-უარყოფით პირებში.

- დაკავშირებული თემა: მოწევის შეწყვეტის 4 რჩევა — თანამედროვე მიდგომები

როგორი სიფრთხილის ზომები შემიძლია მივიღო ჩემი შვილებისთვის და მოქმედებს HPV ვაქცინა?

HPV ვაქცინებირეკომენდებულია არა HPV-ისა და მასთან დაკავშირებული დაავადებების სამკურნალოდ, არამედ მათი პრევენციისთვის . HPV ვაქცინების გაკეთება აქტიური სქესობრივი ცხოვრების დაწყებამდეა რეკომენდებული. ბევრ ქვეყანაში 11-14 წლის გოგონებისა და ბიჭებისთვის გაკეთებული ეს ვაქცინები იცავს HPV-ის იმ ქვეტიპებისგან, რომლებიც გენიტალურ მეჭეჭებს, საშვილოსნოს ყელის კიბოს, თავისა და კისრის კიბოს და სხვა ანალურ-გენიტალური არეს კიბოებსიწვევს.

- დაკავშირებული თემა: ბიჭებსაც უნდა ჩაუტარდეთ HPV ვაქცინაცია — ჭკუის სასწავლებელი ისტორია

დღეს HPV ვაქცინის 3 სახე არსებობს: 2-ვალენტიანი (ბივალენტური), 4-ვალენტიანი (კვადრივალენტური) და 9-ვალენტიანი (ნონავალენტური) HPV ვაქცინა.

ჩვენს ქვეყანაში ოთხვალენტიანი HPV ვაქცინა Gardasil (HPV ტიპების 6, 11, 16, 18-ის წინააღმდეგ) და ორვალენტიანი ვაქცინა Cervarix (HPV 16-ისა და 18-ის წინააღმდეგ) არის ხელმისაწვდომი. ცხრავალენტიანმა ვაქცინამ 2014 წელს FDA-ის დამტკიცება მიიღო.

თუმცა უფრო გვიან ასაკში (მაგალითად 18-45 შუალედში) გაკეთებული HPV ვაქცინები მათთან დაკავშირებული დაავადებებისგან საკმარის დაცვას უზრუნველყოფს თუ არა, ნათელი არ არის. მიუხედავად ზოგი დადებითი კვლევისა, უფრო გვიან ასაკში გამოყენების დამტკიცება ჯერ არ არსებობს.

პრევენციული ვაქცინების გარდა, სამკურნალო HPV ვაქცინის კვლევებიც მიმდინარეობს. ამ მიზნით ჯერ კიბოდ არგარდაქმნილი, თუმცა გარდაქმნის რისკის მქონე საშვილოსნოს ყელის უჯრედული ცვლილებების სამკურნალო HPV ვაქცინის პრეკლინიკური შედეგები დადებითად გამოიყურება, თუმცა არც ამ მდგომარეობისთვის არსებობს გამოყენების დამტკიცება.

ფსიქოსოციალური მხარდაჭერა HPV-დადებითი თავისა და კისრის კიბოს დიაგნოზის მქონე პაციენტებში

HPV-დადებითი თავისა და კისრის კიბოს დიაგნოზის გაცნობებისას პაციენტის ემოციური რეაქციები შეიძლება ბევრად განსხვავდებოდეს მოწევითა და ალკოჰოლით გამოწვეული თავისა და კისრის კიბოსადმი ემოციური რეაქციებისგან.

სამედიცინო პერსონალს სჭირდება სწავლება, რათა HPV-ით ინფიცირებულ ქალებში საკუთარი თავის დადანაშაულებას, განსჯის განცდასა და ინტიმურ ურთიერთობებში შიშს საუკეთესოდ მიუდგეს. HPV-ის უარყოფითი ფსიქოსოციალური შედეგების შესამცირებლად უნდა ჩატარდეს მტკიცებულებებზე დაფუძნებული და პაციენტზე ორიენტირებული კონსულტაცია. თავისა და კისრის კიბოს დიაგნოზისას პაციენტთა ჩვეულებრივმა ემოციურმა რეაქციებმა (შფოთვამ, შოკმა, შიშმა, სირცხვილმა) ამ სამედიცინო მდგომარეობის გაგება შეიძლება შეაფერხოს და დამატებით HPV დიაგნოზის აღქმა კიდევ უფრო რთული გახდეს.

პაციენტებს დიაგნოზთან, მკურნალობასა და შედეგებთან გამკლავების სხვადასხვა გზა შეიძლება განუვითარდეთ:

• საკუთარი თავის უარყოფა და HPV დიაგნოზის ემოციური რეაქციებით დაკნინება,
• მკურნალობისას უკიდურესი ემოციების განცდა, რაც ზოგჯერ ბრაზითა და აგრესიულობით შეიძლება გაგრძელდეს,
• განსაკუთრებით შეზღუდული მოძრაობისა და მოვლის საჭიროების მქონე პაციენტები შეიძლება მეტ დისკომფორტს განიცდიდნენ და დაავადებასთან ბრძოლის ძალას ვერ პოულობდნენ.

პაციენტის ფსიქოსოციალური საჭიროებების შეფასება დასაწყისიდან მკურნალობის მიმდინარეობამდე

ექიმებისთვის მნიშვნელოვანი გამოწვევაა HPV-დადებითი კიბოს დიაგნოზთან დაკავშირებული ფსიქოსოციალური სირთულეების ამოცნობა.

HPV-დადებითი თავისა და კისრის კიბოს მქონე პაციენტთა ფსიქოსოციალური საჭიროებების შესახებ წარმოდგენა შეიძლება HPV-თან დაკავშირებული გინეკოლოგიური (ქალებისთვის სპეციფიკური) კიბოებისგანშევიქმნათ. არსებობს გარკვეული სახელმძღვანელო რეკომენდაციები HPV-ისა და გენიტალური მეჭეჭების, საშვილოსნოს ყელის კიბოს სკრინინგისა და HPV ტესტებისთვის.

HPV-თან დაკავშირებული ოროფარინქსის (პირის ღრუსა და ცხვირ-ხახის არე) კიბოს მკურნალობის შემდეგ 10 ადამიანში ჩატარებულმა მცირე კლინიკურმა კვლევამ აჩვენა, რომ მათ ჰქონდათ დანაშაულის, ბრაზის, სევდის, უმწეობისა და HPV-ის სქესობრივი გზით გადამდები ბუნების გამო სირცხვილის მსგავსი გრძნობები.

HPV ინფექციის მქონე პაციენტებს მეჭეჭებისა და თავისა და კისრის კიბოს მსგავსი სხვა მდგომარეობების გამო სხეულის გარეგნობის დარღვევის შიშით შეიძლება ჰქონდეთ ფსიქოლოგიური დისკომფორტი, პროფესიული სირთულეები (უმუშევრობა და სამუშაოს პოვნის შეუძლებლობა), კოგნიტიურ დარღვევებთან დაკავშირებული ფსიქოსოციალური და ფსიქოსექსუალური სირთულეები და სქესობრივი ფუნქციის დარღვევები, რამაც კიბოს მკურნალობისადმი ერთგულებაზე შეიძლება იმოქმედოს.

- დაკავშირებული თემა: დეპრესია და შფოთვა კიბოს მქონე პაციენტში — მიზეზები, სიმპტომები და მკურნალობა

ერთ კვლევაში HPV ინფექციის მქონე, მაგრამ HPV-თან დაკავშირებული თავისა და კისრის კიბოს არმქონე 837 პირს შორის 489-ში HPV-ის სერიოზული ფსიქოსოციალური გავლენა დაფიქსირდა. გამოკითხულთა სამ მეოთხედზე მეტმა ბრაზის ან დეპრესიის განცდა აღწერა და ორმა მესამედმა სირცხვილი აღნიშნა. HPV-მ სქესობრივ აქტივობაზეც უარყოფითად იმოქმედა. ადამიანთა დიდმა უმრავლესობამ ჯანდაცვის მომწოდებელთა ემოციურ და სქესობრივ საკითხებზე კონსულტაციით უკმაყოფილება გამოთქვა.

სწავლება

თავისა და კისრის კიბოს სფეროში მომუშავე ჯანდაცვის სპეციალისტებმა HPV-დადებით თავისა და კისრის კიბოზე ცოდნის ნაკლებობის შესამცირებლად ინფორმაცია სხვადასხვა წყაროდან უნდა მიაწოდონ. სწავლება უნდა ფოკუსირდეს დაავადებაზე, მკურნალობაზე, შესაძლო ჩივილებსა და სქესობრივ ქცევებზე, რომლებიც HPV-ის გადაცემის გაზრდილ რისკს უკავშირდება. ეს სწავლება პაციენტებისა და ნათესავებისთვის თავისა და კისრის კიბოსა და HPV ვაქცინაციის პროგრამებზე ბროშურებისა და ვიდეოების მიწოდებით შეიძლება განხორციელდეს. ქვემოთ მაგალითის ნახვაა შესაძლებელი:

ამასთან, თავისა და კისრის კიბოს შესახებ ინტერნეტით ინფორმაციის მიწოდება და მიღება კიდევ ერთი საყურადღებო საკითხია. თავისა და კისრის კიბოები მედიცინის ერთ-ერთი ვიწრო სფეროა, რომლის შესახებ ჯანდაცვის სპეციალისტებსაც ნაკლები ცოდნა აქვთ. პაციენტებისა და ახლობლებისთვის საინფორმაციო შინაარსის მომზადებისას, ამ არეს დაავადებების რთული ბუნების მიუხედავად, ყურადღება უნდა მიექცეს გასაგებ და სწორად გზის მიმანიშნებელ შინაარსს და პაციენტთა უკუკავშირსაც.

კონსულტაცია

ემოციური მხარდაჭერის კონსულტაცია შეიძლება განხორციელდეს გამკლავების გაუმჯობესებული ტექნიკების, ბუკლეტების, სანდო ვებსაიტებისა და / ან სამედიცინო კონსულტაციების გზით ინფორმაციის მიწოდებით.

უნდა გამოიკვეთოს HPV-დადებითი ბრტყელუჯრედოვანი თავისა და კისრის კიბოს დიაგნოზის ფსიქოსოციალური გავლენა და პაციენტებს მიეწოდოს შესაბამისი წყაროები მათთვის საინტერესო საკითხებზე. დიაგნოზის სქესობრივ ცხოვრებაზე გავლენის გამო პაციენტები დაბნეულნი არიან. ონკოლოგმა საჭიროებისას მეორე შეხვედრაზე პირადი და სქესობრივი საკითხების კონსულტაციისთვის შეიძლება რეკომენდაცია მისცეს.

დასკვნა

HPV-ის 16 სახელწოდების ქვეტიპი დაკავშირებულია ბრტყელუჯრედოვან თავისა და კისრის კიბოსთან ახალგაზრდა, არამწეველ ან ალკოჰოლის არმომხმარებელ სქესობრივად აქტიურ პირებში. HPV-სა და თავისა და კისრის კიბოს შორის კავშირის გარკვევამ ამ კიბოების მკურნალობა და პაციენტებისადმი მიდგომა შეცვალა. HPV-დადებითი თავისა და კისრის კიბოს მკურნალმა ექიმებმა ყოველდღიურ პრაქტიკაში უნდა განავითარონ ახალი საკომუნიკაციო უნარები, რომლებიც ინფექციის რისკზე, სქესობრივ საკითხებზე (მაგალითად ჩვევები და პირადი ცხოვრება) და სწავლებაზე ფოკუსირდება. HPV-ზე საუბრის ემოციური რეაქციები პაციენტებისთვის შეიძლება მტკივნეული იყოს და ექიმებისთვის HPV-სა და სექსუალობაზე პირადი კითხვების დასმა გამოიწვიოს.

ბევრი კიბოს ცენტრი ამ საკითხზე ფსიქოსოციალურ მხარდაჭერაში სუსტია და დამტკიცებული კითხვარების ნაცვლად მდგომარეობას ინდივიდუალური მიდგომებით მართავენ. თუმცა პაციენტზე ორიენტირებული ინფორმაციისა და კონსულტაციის გაუმჯობესებამ და საერთაშორისო გაიდლაინების უზრუნველყოფამ ექიმებს შეიძლება მეტი თავდაჯერება და უნარი მისცეს HPV-თან დაკავშირებული თავისა და კისრის კიბოს მქონე პაციენტთა მხარდასაჭერად.

*